អ្នកគ្រូបង្រៀនជនជាតិថៃរូបស្រស់ស្អាតម្នាក់ ត្រូវបានរកឃើញត្រូវគេសម្លាប់ «លាក់បាំង» សពក្នុងទឹកស្រះដ៏គួរឲ្យអាសូរ បន្ទាប់ពីបាត់ខ្លួនរយៈពេល ១៥ ថ្ងៃ ជាមួយរថយន្ត Toyota Revo 4X4 ពណ៌ប្រផេះ មិនអាចទាក់ទងបាន កាលពីយប់នៅថ្ងៃទី២៦ ខែឧសភា ឆ្នាំ ២០២២ ខណៈជនដៃដល់ជាតឃាតករ ត្រូវបានដឹងថា ជាសង្សារជាមន្រ្តីយោធា។
ដោយឡែក កាលពីថ្ងៃទី១០ ខែមិថុនា ឆ្នាំ២០២២ ទូរទស្សន៍ប៉ុស្តិ៍លេខ៣ បានរាយការណ៍ថា នៅវេលាម៉ោង១០ និង៣០នាទីយប់ នៅថ្ងៃទី៩ ខែមិថុនា មន្ត្រីបានរកឃើញសពអ្នកគ្រូ Ning ដែលត្រូវបានសម្លាប់ដោយមន្រ្តីយោធាឈ្មោះ Surin អាយុ ៣៨ ឆ្នាំ។
ដំបូង ជនដៃដល់បានសារភាពថា ខ្លួនពិតជាបានសម្លាប់ជនរងគ្រោះដោយច្របាច់ក រួចយកសាកសពទៅទម្លាក់ក្នុងស្រះទឹកមួយកន្លែង នៅភូមិ១ ឃុំដនយ៉ាង ស្រុកមឿង ខេត្តផាត់ឆាបូរី ដោយចងសពភ្ជាប់ដុំឥដ្ឋ ដែក និងថែមទាំងកាប់ដើមចេកជាង ២០ ដើម រាយប៉ាយលើផ្ទៃទឹក ដើម្បីកុំឲ្យសពអណ្តែតឡើង។
ជនដៃដល់ជាមន្រ្តីយោធារូបនេះ បានប្រាប់ថា មូលហេតុដែលរូបគេឈានដល់ដាច់ចិត្តសម្លាប់អ្នកគ្រូ Wanida ឬ Ning ដែលជាគូស្នេហ៍ គឺធ្វើឡើងដោយសារតែភ្លើងប្រច័ណ្ឌ និងបានសម្លាប់ ខណៈកំពុងជិះរថយន្តធ្វើដំណើរជាមួយគ្នា។ ហើយខណៈពេលនោះ ដោយសារមិនដឹងធ្វើយ៉ាងម៉េច រូបគេក៏បានយកសពទម្លាក់ចូលក្នុងទឹកស្រះតែម្តងទៅ៕ រក្សាសិទ្ធិដោយ៖ លឹម ហុង