ប្រិយមិត្តបានស្គាល់រួចហើយ តារាបណ្តាញសង្គមដ៏ល្បីឈ្មោះ កក្កដា សុភ័ណ្ណ ដែលជាបុគ្គលមួយរូប តែងត្រូវបានមហាជនរិះគន់ ព្រោះតែហួសចិត្តខ្លាំង ទៅនឹងទង្វើនៃការសម្ញែងភាពហឺុហា ជាពិសេសការស្លៀកពាក់ដ៏មិនសមទំនង តាំងកាលពីខ្លួននៅជាអ្នកបួសម្ល៉េះ។
តែដោយឡែក ថ្មីៗនេះ អន្ទិត សុភ័ណ្ណ បានធ្វើឲ្យមហាជនមានការភ្ញាក់ផ្អើលជាខ្លាំង ខណៈនៅសុខៗ ស្រាប់តែត្រូវគេនាំគ្នាព្រួតវាយឡើងទ្រោម នៅហាងផឹកស៊ីមួយកន្លែង ស្ថិតតាមបណ្ដោយផ្លូវព្រះសុធារស សង្កាត់ទន្លេបាសាក់ខណ្ឌចំការមន រាជធានីភ្នំពេញវេលាម៉ោងប្រមាណជាង ១០ យប់ថ្ងៃទី១៦ ខែមិថុនា ឆ្នាំ២០២២។
ទាក់ទងករណីនេះ កក្កដា សុភ័ណ្ណ បានធ្វើការអះអាងថា ខ្លួនត្រូវបានមនុស្សប្រុសស្រីមួយក្រុមហៅជល់កែវផឹកស៊ី ហើយខ្លួនក៏បានបង្ហាញភាពស្និទ្ធស្នាលជាមួយមនុស្សប្រុសម្នាក់ ក្នុងនាមរាប់អានគ្នាជា Friend ប៉ុណ្ណោះ ប៉ុន្តែ មិននឹកស្មានថា ពួកគេមានបំណងចង់ធ្វើស៊ី ហៅចេញក្រៅព្រួតវាយយ៉ាងចាស់ដៃ។ តែបើតាមអ្នករត់កង់បី បានប្រាប់ថា មីក្តា ហ្នឹង ត្រូវបានគេចោទទៅដណ្តើមប្រុសគេ ទើបមានរឿងបែបនេះ។
ទោះជាយ៉ាងណា ក្រោយត្រូវគេព្រួតវាយឡើងទ្រោម កក្កដា សុភ័ណ្ណ និងមិត្តភក្តិ បានទៅដាក់ពាក្យបណ្ដឹងចំពោះជនសង្ស័យដែលប្រើប្រាស់អំពើហិង្សាទៅលើខ្លួននៅប៉ុស្តិ៍នគរបាលរដ្ឋបាលទន្លេបាសាក់ ខណ្ឌចំការមន រាជធានីភ្នំពេញ វេលាម៉ោង១២:៥០នាទីយប់រំលងអាធ្រាត្រ ឈានចូលថ្ងៃទី ១៧ ខែមិថុនា ឆ្នាំ២០២២៕ រក្សាសិទ្ធិដោយ៖ លឹម ហុង
