យោងតាម Sina បានចុះផ្សាយឲ្យដឹងថា គូស្នេហ៍វ័យក្មេង១គូដែលមានវ័យប្រហែល២០ឆ្នាំដូចគ្នា មកពីទីក្រុង Hangzhou ស្ថិតនៅភាគខាងកើតនៃប្រទេសចិន បានសម្រេចចិត្តចែកផ្លូវគ្នា បន្ទាប់ពីរកឃើញថា ពួកគេទាំងពីររស់នៅពុំចុះសម្រុងនឹងគ្នា ។
កាលពីថ្ងៃទី៦ ខែឧសភា ឆ្នាំ២០១៨ គូស្នេហ៍នេះបានសម្រេចណាត់ជួបគ្នានៅបារមួយកន្លែង ប៉ុន្តែ បានមកដល់ដាច់ដោយឡែកពីគ្នា ។ ខាងស្រីបានចូលទៅក្នុងបារនោះជាមួយមិត្តភក្តិរបស់នាង នៅវេលាម៉ោង ១១ យប់ ដើម្បីរង់ចាំអតីតមិត្តប្រុសបង្ហាញខ្លួននៅទីនោះ ។
នាងត្រូវបានអមដំណើរដោយមិត្តភក្តិរបស់នាង ហើយអ្នកទាំងពីរបានបង្ហាញខ្លួនក្នុងសម្លៀកបំពាក់ស្អាតបាត ។ អ្នកទាំងពីរបានហៅស្រាមកផឹក ហើយភ្លាមៗនោះ ក៏ស្រាប់តែឃើញបុរសវ័យក្មេងខ្ពស់ម្នាក់ បានមកដល់ដោយយូរវ៉ាលីពណ៌ប្រផេះធំមួយ ដោយពុំដឹងថាខាងក្នុងនោះមានរបស់អ្វី? ទោះយ៉ាងណា នៅពាក់កណ្តាលអាធ្រាត្រ ពួកគេទាំង៣នាក់ បានចាប់ផ្តើមឈ្លោះប្រកែកគ្នា ។
បុរសនោះបានបោះវ៉ាលីដែលគាត់កាន់ចោល ហើយមិនយូរប៉ុន្មានបន្ទាប់នោះ ស្ត្រី២នាក់ក៏បានចាកចេញពីបារ ប៉ុន្តែ មិនបាននាំយកវ៉ាលីនោះទេ ។ បុគ្គលិកបម្រើការនៅក្នុងបារនោះ បានរកឃើញវ៉ាលី ប៉ុន្តែ ពុំអាចរកម្ចាស់វាឃើញទេ ។
ពួកគេបានសម្រេចដាក់វាចូលទៅក្នុងផ្នែក «របស់បាត់បង់ និងរកឃើញ» ដើម្បីឲ្យម្ចាស់របស់វាចូលមកយក និងអះអាងថាជារបស់ពួកគេ ។ ទោះយ៉ាងណា នៅពេលពួកគេនាំយកវ៉ាលីដ៏ធ្ងន់នេះបើកចំហរ ពួកគេពិតជាមានការភ្ញាក់ផ្អើលយ៉ាងខ្លាំង ព្រោះនៅក្នុងវ៉ាលីនោះផ្ទុកទៅដោយលុយដែលជាប្រភេទក្រដាសប្រាក់ ១០០ យ៉ន់ ។ ហើយបុគ្គលិកនៅទីនោះ ក៏បានហៅប៉ូលីសចុះមក ហើយពួកគេក៏បាននាំយកវ៉ាលីនេះទៅកាន់ប៉ុស្តិ៍ ។ គេបានរកឃើញថា ចំនួនលុយទាំងអស់នៅក្នុងវ៉ាលីនោះមានរហូតដល់ ២លានយ័ន (ស្មើនឹង ៣១៤១១០ ដុល្លារអាមេរិក) ។
ទោះយ៉ាងណា នៅថ្ងៃបន្ទាប់មក បុរសវ័យក្មេងនោះបានមកទាក់ទងនៅបារនោះ ដើម្បីស្វែងរកវ៉ាលីរបស់គាត់ ហើយគាត់ត្រូវបានគេនាំទៅកាន់ប៉ុស្តិ៍ប៉ូលីស ។ យោងតាមប៉ូលីស បុរសរូបនោះមានអាយុ ២៣ ឆ្នាំ ធ្វើការនៅក្នុងវិស័យព័ត៌មានវិទ្យា (IT) ។
គាត់បានពន្យល់ទៅប៉ូលីសថា គាត់បាននាំយកលុយមួយវ៉ាលីមកទីនេះ ព្រោះតែអតីតមិត្តស្រីរបស់គាត់ស្នើសុំលុយចំនួន ៥ លានយ័ន ជាថ្នូរនឹងការចែកផ្លូវគ្នា ។ គាត់បានបញ្ជាក់អំពីរឿងរ៉ាវកើតឡើងនេះថា៖ «ខ្ញុំចង់បែកបាក់នឹងមិត្តស្រីរបស់ខ្ញុំ ប៉ុន្តែ នាងបានស្នើសុំលុយ ៥ លានយ័ន ជាថ្លៃបែកបាក់គ្នា ។ នៅពេលខ្ញុំបានមកជួបនាងនៅបារនោះ ខ្ញុំបានយកលុយមកត្រឹមតែ ២ លានយ័ន ប៉ុណ្ណោះ ។ ខ្ញុំក៏បានប្រាប់នាងថា ខ្ញុំមានត្រឹមតែ ២ លានយ័ន ប៉ុណ្ណោះ ហើយខ្ញុំបានទុកវានៅទីនោះ និងបានចាកចេញទៅវិញ» ។
ប៉ូលីសបានកោះហៅអតីតមិត្តស្រីរបស់មកសួរនាំ ហើយនាងបានប្រាប់ថា នាងពុំយកវ៉ាលីនោះទេ ព្រោះលុយ ២ លានយ័ន តិចណាស់សម្រាប់រូបនាង ។ នាងនិយាយថា៖ «គាត់គ្រាន់តែប្រគល់លុយឲ្យខ្ញុំ ២លានយ័ន ប៉ុន្តែ ខ្ញុំពុំព្រមទទួលយកវាទេ ហេតុដូច្នេះ ខ្ញុំក៏បានចាកចេញពីទីនោះដែរ ។ ខ្ញុំបានទូរស័ព្ទទៅគាត់ឲ្យប្រាប់ថា ខ្ញុំពុំបានយកវ៉ាលីនោះទេ ហើយខ្ញុំក៏បានឲ្យគាត់មកយកវាវិញខ្លួនឯង» ។
ទោះយ៉ាងណា ដំណើររឿងរ៉ាវរបស់អ្នកទាំងពីរពុំដឹងថានឹងវិវត្តន៍យ៉ាងណាទៀតទេ បន្ទាប់ពីប៉ូលីសបានប្រគល់វ៉ាលីទៅឲ្យបុរសនោះវិញ ៕ ចន្ទី 
