ប្រិយមិត្ត បានទទួលជ្រាបរួចហើយថា កាលពីយប់ថ្ងៃទី១៦ ខែមិថុនា ឆ្នាំ២០២២ កក្កដា សោភ័ណ្ណ ហៅកូនកណ្ដុរតូច ត្រូវជនប្រុសស្រីមានគ្នា៣នាក់ (ប្រុស១នាក់-ស្រី១នាក់-ភេទទី៣ម្នាក់) បានព្រួតវាយដោយយកស្បែកជើងវាយក្បាលឡើងបែក នៅហាងផឹកសុីមួយកន្លែងស្ថិតតាមបណ្ដោយផ្លូវព្រះសុធារស សង្កាត់ទន្លេបាសាក់ ខណ្ឌចំការមនវេលាម៉ោង១០:៣០នាទីយប់ បង្កឲ្យមានការភ្ញាក់ផ្អើលយ៉ាងខ្លាំង។
ជុំវិញករណីនេះ កក្កដា សុភ័ណ្ឌ បានចេញមុខឡាយវីដេអូបកស្រាយឲ្យដឹងថា តាមពិតទៅ ខ្លួន និងជនម្នាក់ក្នុងចំណោម៣នាក់ ដែលជាភេទទី៣ដែរ គឺជាអ្នកស្គាល់គ្នា ហើយកាលពី២ឆ្នាំ ខ្លួនក៏ត្រូវជននោះនាំបក្ខពួកព្រួតវាយនៅមុខសួនវត្តបទុមវតី ម្តងរួចមកហើយ (៣ទល់១)។ ហើយបន្ទាប់ពីនោះមក ក៏មានរឿងគុំកួនគ្នា រហូតដល់ប៉ុន្មានខែមុននេះ ក៏ចាប់ផ្តើមមានរឿងទៀត ទាក់ទងដណ្តើមសង្សារគ្នា ដោយម្នាក់ស្រីភេទទី៣ហ្នឹង យកសង្សារចាស់ខ្លួន ៣ ទៅ ៤ នាក់ ហើយថែមទាំងឆាតជេរទៀតផង។
កក្កដា សុភ័ណ្ឌ បានបន្តថា ប៉ុន្តែ អ្វីដែលមិននឹកស្មាននោះ គឺនៅយប់កើតហេតុ ជនបង្កនោះ ក៏បានធ្វើជាមកសុំទោស និងសុំជល់កែវ (បញ្ច្រកលើកដាច់ៗ) តែម្តង ប៉ុន្តែ នៅពេលខ្លួនចេញមកខាងក្រៅ ស្រាប់តែម្នាក់ភេទទី៣ហ្នឹង ស្ទុះចេញមកអូសដៃ ក៏បានទង្គិចធ្វើឲ្យជ្រុះទូរស័ព្ទមិត្តភក្តិស្រីរបស់គេបែក ហើយក៏ទាមទារឲ្យខ្លួនសងចំនួន 50$ ។ តែទោះយ៉ាងណា កក្កដា សុភ័ណ្ឌ បានអះអាងថា ពួកគេមានបំណងធ្វើសុីខ្លួនតែម្តង ដោយធ្វើជាជ្រុះទូរស័ព្ទ និងស្នើឲ្យម្ចាស់ហាងឆែកកាមេរ៉ាសុវត្ថិភាព ដើម្បីបញ្ជាក់ការពិត។
កក្កដា សុភ័ណ្ឌ ថា ហិង្សាបានកើតឡើង គឺដោយសារតែខ្លួនមិនព្រមសង ព្រោះខ្លួនមិនបានធ្វើខុសឲ្យជ្រុះទូរស័ព្ទគេនោះទេ។ តែទោះយ៉ាងណា អន្ទិត កក្កដា សុភ័ណ្ឌ បាននិយាយថា ខ្លួនមិនធ្វើការប្តឹងផ្តល់ទាំងនោះទេ ដោយតែមានក្តីអាណិតទៅដល់ឪពុកម្តាយរបស់ជនភេទទី៣ម្នាក់នោះក្រលំបាក ព្រោះខ្លួនជាអ្នករៀនអ្នកបួសចិត្តមិនដាច់នោះទេ និងសំណូមពរគ្រប់គ្នាកុំស្អប់ជននោះអី ព្រោះគេជាមនុស្សភ្លើតភ្លើន ធ្វើខ្លួនហាយសូ មិនគិតទៅដល់ម្តាយខំរកសុីយ៉ាងតត្រុកនោះទេ៕ រក្សាសិទ្ធិដោយ៖ លឹម ហុង
