នៅថ្ងៃទី២០ ខែមិថុនា ប៉ូលីសសង្កាត់ Binh Thanh (ក្រុងហូជីមិញ) បានបញ្ជាក់ថា នាង NTTN (អាយុ ១៦ ឆ្នាំមកពី Phu Yen) បានត្រលប់មកផ្ទះវិញដោយសុវត្ថិភាពហើយ បន្ទាប់ពីបាត់ខ្លួនជាច្រើនថ្ងៃ នៅពេលនាងឡើងមករកការងារធ្វើនៅក្នុងទីក្រុងហូជីមិញ។
ចំណែកប៉ូលីសនៃឃុំ Xuan Binh ទីក្រុង Song Cau (Phu Yen) ក៏បានបញ្ជាក់ដែរថា គ្រួសាររបស់ NTTN បានរាយការណ៍ថា ពួកគេបានរកឃើញកូនស្រីហើយ។
តាមព័ត៌មានបឋម នាង N. បានត្រឡប់មកផ្ទះវិញនៅល្ងាចថ្ងៃទី ១៩ មិថុនា ហើយបានទៅផ្ទះបងស្រីនៅខេត្ត Quang Binh នារសៀលថ្ងៃទី ២០ មិថុនា។
អាជ្ញាធរមូលដ្ឋានបាននិយាយថា ពួកគេនឹងធ្វើការជាមួយក្រុមគ្រួសាររបស់ក្មេងស្រីវ័យក្មេងនេះ ដើម្បីបំភ្លឺពីការបាត់ខ្លួនរបស់នាង ដែលបង្កឱ្យមានការភ្ញាក់ផ្អើលជាសាធារណៈ កាលពីពេលថ្មីៗនេះ។
គួរបញ្ជាក់ថា កាលពីរសៀលថ្ងៃទី៥ មិថុនា នាង NTTN បានជិះរថយន្តក្រុងពីក្រុង Song Cau (Phu Yen) ទៅទីក្រុងហូជីមិញ ដើម្បីធ្វើការក្រោមការណែនាំពីអ្នកស្គាល់គ្នាតាមបណ្តាញសង្គម។ បន្ទាប់ពីមកដល់ចំណតរថយន្តនៅសង្កាត់ Binh Thanh (ហូជីមិញ) នារីវ័យក្មេងនេះបានទូរស័ព្ទទៅក្រុមគ្រួសាររបស់នាងថាបានមកដល់ហើយ ប៉ុន្តែ ក្រោយមក ក៏បាត់ទំនាក់ទំនងជាច្រើនថ្ងៃតែម្តង។
ទាក់ទិននឹងករណីនេះ លោក Nguyen Van Huong ឪពុករបស់ N. ដែលបានឡើងមកក្រុងហូជីមិញ ដើម្បីស្វែងរកកូនស្រី បានឲ្យដឹងថា គ្រួសាររបស់គាត់បានទទួលទូរស័ព្ទពីកូនស្រី ដែលបានប្រាប់ថា នៅពេលនេះ នាងកំពុងនៅក្នុងប្រទេសកម្ពុជា និងមានការងារផងដែរ។ តែទោះយ៉ាងណា ពួកគាត់ពិតជាស្លុតចិត្តយ៉ាងខ្លាំង នៅពេលមានគេទូរស័ព្ទមកថា ទាមទារប្រាក់លោះចំនួន ៧០ លានដុង (ស្មើប្រមាណ ៣ ពាន់ដុល្លារ) ជាថ្នូរនាំនាងត្រឡប់មកស្រុកវិញ៕ រក្សាសិទ្ធិដោយ៖ លឹម ហុង
