កាលពីពេលថ្មីៗនេះ មហាជននៅក្នុងបណ្តាញសង្គម ពិតជាមានការភ្ញាក់ផ្អើលនិងព្រឺសម្បុរជាខ្លាំង ខណៈបានឃើញបុរសម្នាក់ កំពុងដេកជាមួយសពនារីជាសង្សារនៅក្នុងបន្ទប់ជួល រហូត៣យប់៣ថ្ងៃ បន្ទាប់សម្លាប់នាងដោយសារភ្លើងប្រច័ណ្ឌ។
ហេតុការណ៍មួយនេះ បានកើតឡើងនៅចំណុចបន្ទប់ជួលមួយកន្លែង នៅខាងក្រោយសាលារៀនបន្ទាយចាស់ ស្ថិតនៅភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប និងបង្កឲ្យមានការភ្ញាក់ផ្អើល កាលពីវេលាម៉ោង ៧ និង៣០នាទី យប់ថ្ងៃទី២៣ ខែមិថុនា ឆ្នាំ២០២២។
តែយ៉ាងណាមិញ អ្វីដែលគួរឲ្យស្លុតចិត្តនោះ គឺបន្ទាប់ករណីនេះបានកើតឡើង គេក៏បានរកឃើញថា មុនត្រូវសង្សារសម្លាប់ នារីរងគ្រោះប្រហែលជាបានដឹងថា បុរសជាសង្សារមានប្រពន្ធកូន ហាក់យកនាងគ្រាន់តែជាល្បែងស្នេហា បានបង្ហោះសារបែបនេះថា៖ «ទំនាក់ទំនងមិនច្បាស់លាស់ ខ្ញុំជឿថា អ្នកគ្រប់គ្នាធ្លាប់បានឆ្លងកាត់ ទំនាក់ទំនងមួយដែលមិនមានភាពប្រាកដប្រជា ស្រលាញ់គ្នាគ្រាន់តែដើម្បីស្រលាញ់គ្នា មិនមែនដើម្បីគោលដៅរួមគ្នា ដំបូងគ្រប់យ៉ាងគឺល្អខ្លាំងណាស់ សឹងតែយកអ្វីមកប្តូរមិនបាន គ្រប់យ៉ាងពោរពេញដោយក្ដីរីករាយ ស្នាមញញឹម និងរឿងល្អៗ តែចុងក្រោយមានតែភាពឈឺចាប់ និងទឹកភ្នែក ដែលកំដរទំនាក់ទំនងមិនច្បាស់លាស់មួយនេះ»។
ក្រោយពីបានឃើញបែបនេះ អ្នកលេងបណ្តាញសង្គមម្នាក់ បានលើកឡើងក្នុងន័យជាសារដាស់តឿនដល់មនុស្សស្រីដទៃគួរគិតពិចារណាថា៖ «ពិបាកត្រង់ថា ដឹងហើយ លឺហើយ ហេតុអី នៅតែទទួលយកទៀត»។
គួរបញ្ជាក់ថា បុរសជាជនង្ស័យមានឈ្មោះថា សេង គឹមហួរ គឺរូបគេមានប្រពន្ធកូនរួចមកហើយ និងទើបរៀបការកាលថ្ងៃទី២១ ខែឧសភា ឆ្នាំ២០២២ កន្លងទៅនេះ ប៉ុន្តែ បានលួចលាក់ប្រពន្ធទៅទាក់ទងជាមួយនារីរងគ្រោះ រហូតឈានដល់ប្រព្រឹត្តអំពើឃាតកម្មនេះកើតឡើង ហើយបានបែកធ្លាយបង្កឲ្យមានការភ្ញាក់ផ្អើលខ្លាំងតែម្តង៕ រក្សាសិទ្ធិដោយ៖ លឹម ហុង
