រដ្ឋធានីវ៉ាស៊ីនតោន៖ រថភ្លើងមួយខ្សែ បានបើកបុកគ្នាជាមួយនឹងរថយន្ដធំ ក៏រត់ខុសផ្លូវ ក្រឡាប់ផ្ងារចង្គ្រាង បណ្ដាលឲ្យមានស្លា.ប់៣នាក់ និង របួសយ៉ាងតិច៥០នាក់ កាលពីថ្ងៃទី២៧ ខែមិថុនា នៅសហរដ្ឋអាមេរិក។
សារព័ត៌មាន CNN បានចេញផ្សាយ កាលពីព្រឹក ថ្ងៃទី២៨ ខែមិថុនា ថា ក្រុមហ៊ុនអយស្ម័យយានអាមត្រាក់ (Amtrak) បានអះអាងថា មានអ្នកដំណើរ ប្រមាណ ២៤៣ នាក់ និង ក្រុមអ្នកបើកបរ ចំនួន១២នាក់ ស្ថិតក្នុងរថភ្លើង ខណៈចេញពីឡូសអេនជែឡែស (Los Angeles) ឆ្ពោះទៅកាន់ទីក្រុងឈីកាហ្កូ (Chicago)។
អាជ្ញាធរផ្លូវដែក បានបញ្ជាក់ថា នៅក្នុងហេតុការណ៍ រថភ្លើងបានបុករថយន្តដឹកសំរាម រួចហើយក្រឡាប់ធ្លាក់ ចេញពីលើផ្លូវដែកនោះ បានបណ្ដាលឲ្យមនុស្សយ៉ាងតិច៣នាក់បាត់បង់ជីវិត និងជាច្រើននាក់ផ្សេងទៀត រងរបួស។ ហេតុការណ៍នេះ បានកើតឡើង នៅក្នុងតំបន់ដាច់ស្រយាលមួយ ស្ថិតក្នុងរដ្ឋមីសស៊ូរី (Missouri) សហរដ្ឋអាមេរិក។
ក្រុមហ៊ុនអយស្ម័យយាន បានបញ្ជាក់ថា «បច្ចុប្បន្ន អាជ្ញាធរមូលដ្ឋាន កំពុងតែជួយដល់អ្នកដំណើរ ស្ថិតក្នុងរថភ្លើងនោះ។ ចំណែកក្រុមឆ្លើយតបនឹងឧបទ្ទវហេតុរបស់យើង ក៏បានធ្វើសកម្ម ហើយយើងកំពុងតែដាក់ពង្រាយបុគ្គលិកសង្គ្រោះបន្ទាន់ ទៅកាន់កន្លែងកើតហេតុ ដើម្បីជួយអ្នកដំណើរ បុគ្គលិករបស់យើង និង ក្រុមគ្រួសាររបស់ពួកគេ ជាមួយនឹងតម្រូវការរបស់ពួកគេផងដែរ»៕ រក្សាសិទ្ធិដោយ ៖ សារាយSN
