វីដេអូដែលបង្ហោះដោយ Daily Mail បង្ហាញទាហានអ៊ុយក្រែន បានបាញ់ទម្លាក់ឧទ្ធម្ភាគចក្ររុស្ស៊ី ជាមួយនឹងកាំជ្រួចពីដីទៅអាកាសដែលផលិតដោយអង់គ្លេស ឃើញថាបានធ្លាក់ស្តែងៗតែម្តង។
ទាហានមកពីកងពលតូច Assault Brigade ទី៩៥ របស់ប្រទេសអ៊ុយក្រែន ដែលមានមូលដ្ឋាននៅទីក្រុង Zhytomyr បានប្រើប្រាស់មីស៊ីលបាញ់លើស្មា Martlet ដែលត្រូវបានគេស្គាល់ថា Starstrecks ផលិតដោយចក្រភពអង់គ្លេស ដើម្បីវាយប្រហារលើឧទ្ធម្ភាគចក្រ Kamov Ka-52 របស់រុស្ស៊ី។
ឧទ្ធម្ភាគចក្រវាយប្រហារតែមួយកៅអីរបស់រុស្សីនេះ ត្រូវបានគេដាក់រហស្សនាមថា “Black Shark” ហើយត្រូវបានពិពណ៌នាថាជា “ឧទ្ធម្ភាគចក្រគ្រោះថ្នាក់បំផុត” សម្រាប់យោធាអ៊ុយក្រែន ដោយសារប្រព័ន្ធគ្រប់គ្រងសមរភូមិរបស់វា អនុញ្ញាតឱ្យវាចែករំលែកទិន្នន័យជាមួយយន្តហោះផ្សេងទៀត ដើម្បីសម្របសម្រួលក្នុងការវាយប្រហារ។ តែទោះជាយ៉ាងណា វាហាក់ដូចជាមិនបានរកឃើញកាំជ្រួចអ៊ុយក្រែនទាន់ពេលវេលា ហើយក៏ត្រូវបានយោធាអ៊ុយក្រែនឆ្មក់បាញ់ទម្លាក់បានមុន។
ទោះបីជានៅក្នុងវីដេអូ មិនបង្ហាញពីឧទ្ធម្ភាគចក្រនេះ រងការខូចខាតក៏ដោយ តែប្រភពការពារជាតិអ៊ុយក្រែន បានអះអាងថា វាត្រូវបានបាញ់ទម្លាក់ហើយ។
Martlet គឺជាកាំជ្រួចពីដីទៅអាកាស (ស្រាល) ដែលផលិតដោយក្រុមហ៊ុនអង់គ្លេស Thales Air Defense។ ឈ្មោះរបស់វា ត្រូវបានយកមកពីបក្សីទេវកថាគ្មានជើង។
វាត្រូវបានរចនាឡើង ដើម្បីដាក់ឱ្យដំណើរការពីវេទិកាផ្លូវអាកាស ដីគោក និងសមុទ្រ ដើម្បីវាយប្រហារគោលដៅផ្សេងៗ។ ដោយសារតែការផ្តោតទៅលើភាពត្រឹមត្រូវ ថាមពលរបស់វាត្រូវបានគេនិយាយថា មិនអស្ចារ្យពេកទេ ដូច្នេះវាស័ក្តិសមសម្រាប់ប្រើប្រាស់ក្នុងបេសកកម្មវាយប្រហារមិនស៊ីមេទ្រី។
យ៉ាងណាមិញ សម្រាប់ព័ត៌មានដែលថា ឧទ្ធម្ភាគចក្ររុស្ស៊ីត្រូវបានបាញ់ទម្លាក់ គឺបានលេចចេញចំពេលមានការវាយប្រហារដោយកាំជ្រួចទៅលើមជ្ឈមណ្ឌលលក់ទំនិញក្នុងទីក្រុង Kremenchuk ប្រទេសអ៊ុយក្រែន ដែលធ្វើឲ្យមនុស្សជាច្រើនព្រួយបារម្ភអំពីការកើនឡើងចំនួនអ្នកស្លាប់។ ប្រទេសអ៊ុយក្រែន និងប្រទេសលោកខាងលិច បានចោទប្រកាន់រុស្ស៊ីថា ជាអ្នកនៅពីក្រោយការវាយប្រហារនេះ បើទោះជាទីក្រុងម៉ូស្គូធ្វើការបដិសេធក៏ដោយ។
ភាគីក្រុងគៀវ បាននិយាយថា មនុស្សយ៉ាងតិច១០នាក់ បានស្លាប់ និងជាង៤០នាក់រងរបួស បន្ទាប់ពីយន្តហោះទម្លាក់គ្រាប់បែក Tu-22M3 របស់រុស្ស៊ី បានបាញ់បង្ហោះកាំជ្រួចរយៈចម្ងាយឆ្ងាយ X-22 ចំនួនពីរគ្រាប់ ទៅលើមជ្ឈមណ្ឌលនេះ។ នៅក្នុងការបង្ហោះ Telegram ប្រធានាធិបតីអ៊ុយក្រែនលោក Volodymyr Zelensky បាននិយាយថា ចំនួនជនរងគ្រោះគឺ “នឹកស្មានមិនដល់” ដោយលើកឡើងពីរបាយការណ៍មួយចំនួនដែលថា ជនស៊ីវិលជាង ១,០០០ នាក់ នៅខាងក្នុងផ្សារទំនើប នៅពេលកើតហេតុ។
សូមបញ្ជាក់ថា កាលពីដើមខែនេះ អង់គ្លេសបានប្រកាសថា ខ្លួននឹងចូលរួមជាមួយសហរដ្ឋអាមេរិកក្នុងការបញ្ជូនកាំជ្រួចរយៈចម្ងាយឆ្ងាយទៅកាន់អ៊ុយក្រែន ដើម្បីជួយទប់ទល់នឹងរុស្ស៊ី ទោះបីជាមានការព្រមានពីប្រធានាធិបតី វ្ល៉ាឌីមៀ ពូទីន អំពីការផ្គត់ផ្គង់អាវុធដល់ទីក្រុងកៀវក៏ដោយ៕ រក្សាសិទ្ធិដោយ៖ លឹម ហុង