អ្នកសារព័ត៌មានមកពីស្ថាប័នប្រាំពីរ រួមទាំង Reutersផងនោះ ត្រូវបានហាមឃាត់មិនឱ្យរាយការណ៍ព័ត៌មានពីពិធីផ្លូវការ នៃការប្រារព្ធខួបលើកទី 25 នៃការប្រគល់ទីក្រុងហុងកុងពីចក្រភពអង់គ្លេស ឱ្យស្ថិតក្នុងការគ្រប់គ្រងរបស់ចិនដែលប្រធានាធិបតី Xi Jinping នឹងត្រូវចូលរួម។
អ្នកនាំពាក្យរបស់រដ្ឋាភិបាលហុងកុងបាននិយាយថា រដ្ឋាភិបាលកំពុង “ធ្វើឱ្យមានតុល្យភាពតាមដែលអាចធ្វើទៅបាន” រវាងតម្រូវការសម្រាប់ការផ្សាយព័ត៌មាន និងតម្រូវការសន្តិសុខជាតិ។ អ្នកនាំពាក្យរូបនេះបាននិយាយដោយមិនបញ្ជាក់លម្អិតថា៖ «យើងនឹងមិនធ្វើអត្ថាធិប្បាយលើលទ្ធផលការទទួលស្គាល់របស់អង្គការនិងបុគ្គលណាមួយនោះទេ»។
សមាគមអ្នកកាសែតហុងកុងបាននិយាយកាលពីល្ងាចថ្ងៃអង្គារទី28 ខែមិថុនាថា យ៉ាងហោចណាស់អ្នកកាសែត 10 នាក់មកពីប្រព័ន្ធផ្សព្វផ្សាយក្នុងស្រុកនិងក្រៅស្រុកចំនួន 7 ឬច្រើនជាងនេះត្រូវបានរារាំងក្នុងពិធីកាលពីថ្ងៃសុក្រកន្លងទៅ។
អង្គភាពសារព័ត៌មានដែលមានឈ្មោះថា South China Morning Post, Hong Kong 01, Now TV និង Ming Pao, និង Agent France-Presse ដែលស្ថិតក្នុងចំណោមការហាមឃាត់ទាំងនោះ។ ប្រភពចំនួនប្រាំមួយដែលដឹងអំពីបញ្ហានេះបានប្រាប់រ៉យទ័រថា អ្នកកាសែត Bloomberg ទូរទស្សន៍រដ្ឋ RTHK និងតាគង់ប៉ាវ ដែលគាំទ្រដោយរដ្ឋក៏ត្រូវបានដកចេញផងដែរ។ កាសែត South China Morning Post បានរាយការណ៍ថា អ្នកថតរូបម្នាក់មកពីនាយកដ្ឋានសេវាកម្មព័ត៌មានរបស់រដ្ឋាភិបាល (ISD) ស្ថិតក្នុងចំណោមអ្នកដែលត្រូវបានដកចេញ។ គ្មានប្រព័ន្ធផ្សព្វផ្សាយណាមួយក្នុងចំណោមប្រព័ន្ធផ្សព្វផ្សាយទាំងប្រាំបីបានឆ្លើយតបនឹងសំណើសុំការអត្ថាធិប្បាយរបស់ Reuters ទេ។ រ៉យទ័រ មិនអាចបញ្ជាក់ភ្លាមៗថាប្រព័ន្ធផ្សព្វផ្សាយណាដែលត្រូវបានអនុញ្ញាឱ្យចូលរួមយកព័ត៌មានពីពិធីនេះទេ។
អ្នកនាំពាក្យរបស់ទីភ្នាក់ងារព័ត៌មាន Reuters បានបញ្ជាក់ថា អ្នកសារព័ត៌មានពីររូបនៃទីភ្នាក់ងារព័ត៌មានត្រូវបានរារាំងពីការរាយការណ៍អំពីកម្មវិធី។ Reuters កំពុងស្វែងរកត៌មានបន្ថែមអំពីបញ្ហានេះ។ ការរារាំងអ្នកសារព័ត៌មានកើតឡើងនៅពេលដែលប៉ូលីសនៅក្នុងមជ្ឈមណ្ឌលហិរញ្ញវត្ថុពិភពលោកបានដាក់ពង្រាយប្រតិបត្តិការសន្តិសុខយ៉ាងទូលំទូលាយសម្រាប់ការពារដំណើរទស្សនកិច្ចរបស់លោក Xi ដែលជាការធ្វើដំណើរដែលគេស្គាល់ជាលើកដំបូងរបស់លោកនៅខាងក្រៅប្រទេសចិនដីគោកក្នុងរយៈពេលជាង 2 ឆ្នាំចំពេលមានការរីករាលដាលនៃ COVID-19 ។
ទីក្រុងប៉េកាំងបានដាក់ច្បាប់សន្តិសុខជាតិយ៉ាងទូលំទូលាយលើទីក្រុង បន្ទាប់ពីមានការតវ៉ាប្រឆាំងរដ្ឋាភិបាលដោយហឹង្សាជាញឹកញាប់ក្នុងឆ្នាំ 2019 ដែលបង្កឱ្យមានការរិះគន់ពីអន្តរជាតិថា សេរីភាពដែលបានសន្យាទីក្រុងនៅពេលប្រគល់នេះកំពុងបាត់បង់។ មន្ត្រីចិន និងហុងកុងបាននិយាយថា ច្បាប់ថ្មីនេះមានសារៈសំខាន់ណាស់ក្នុងការធានាស្ថិរភាព ហើយសិទ្ធិ និងសេរីភាពបុគ្គល រួមទាំងសេរីភាពសារព័ត៌មាននៅតែរក្សាដដែល៕ ប្រភព៖រ៉យទ័រ
