នៅថ្ងៃទី១ ខែកក្កដា ឆ្នាំ ២០២២ គេហទំព័រ ETtoday បានចេញផ្សាយរបាយការណ៍ដ៏គួរឱ្យភ្ញាក់ផ្អើលមួយ អំពី Chow Huixian អាយុ ២៣ ឆ្នាំ ជាគ្រូបង្រៀនយូហ្គាហុងកុង និងត្រូវបានគេស្គាល់ផងដែរថាជា Aqua Chow ដែលនាងមានរូបសម្រស់ដ៏ទាក់ទាញ និងសុខភាពល្អគួរឱ្យសរសើរ និងថែមទាំងទទួលបានប្រជាប្រិយភាព ក្លាយជាតារាល្បីក្នុងបណ្តាញសង្គម ប៉ុន្តែ មិននឹកស្មានថា នាងបានក្លាយជាសាកសពត្រូវបានគេប្រទះឃើញស្លាប់រួមនឹងស្នាមរបួសចំនួន ៣០ កាំបិត បន្ទាប់ពីនាងបានបាត់ខ្លួនកាលពីប៉ុន្មានថ្ងៃមុន។
យោងតាមរបាយការណ៍បានឱ្យដឹងថា ដំបូងឡើយ Chow គ្រោងនឹងហោះហើរទៅកាន់សហរដ្ឋអាមេរិកនៅថ្ងៃទី៣០ ខែមិថុនា វេលាម៉ោង 2:00 ព្រឹក ដើម្បីបន្តការសិក្សារបស់នាង។ ប៉ុន្តែមុននោះ នៅថ្ងៃទី២៩ មិថុនា វេលាម៉ោង៤និង៣០នាទីរសៀល នាងបានទៅប្រមូលរបស់របរនៅផ្ទះអតីតសង្សារ ។ ខណៈពេលដែលនាងនៅក្នុងជណ្តើរយន្ត មិត្តប្រុសរបស់នាងបានដើរចូលមក ហើយអ្នកទាំងពីរបានចាកចេញពីផ្ទះល្វែងជាមួយគ្នា។ នេះជារូបភាពចុងក្រោយដែលថតដោយ CCTV ហើយបន្ទាប់ពីនោះមកគ្មានអ្នកណាអាចទាក់ទងនាងបានទៀតទេ។
បន្ទាប់ពីបាត់ការទាក់ទង ក្រុមគ្រួសារ សាច់ញាតិ របស់ Chow បានបង្ហោះប្រកាសស្វែងរកនៅលើបណ្តាញសង្គមហ្វេសប៊ុកសាធារណៈ សង្ឃឹមថា អ្នកទាំងអស់គ្នានឹងជួយស្វែងរកកន្លែងចុងក្រោយ មុនពេលទូរស័ព្ទរបស់ Chow ត្រូវបានបិទគឺស្ថិតនៅផ្លូវ Tainan។ ដោយឡែក វេលាថ្ងៃត្រង់ថ្ងៃទី៣០ មិថុនា គ្រួសាររបស់នាង ក៏បានដាក់ពាក្យបណ្តឹងទៅសមត្ថកិច្ចស្រុក Sam Shui Po ដោយយល់ថា វាជាករណីបាត់ខ្លួនទូទៅ ហើយសង្ឃឹមថានឹងឃើញនាងឆាប់ៗ។
ប៉ុន្តែ នៅល្ងាចថ្ងៃដដែលនោះមិត្តប្រុសរបស់ Chow ជាមួយមេធាវី បានប្រគល់ខ្លួនឱ្យប៉ូលិស ដោយបង្ហាញកាតបន្ទប់ដល់សណ្ឋាគារមួយ ប៉ុន្តែ បដិសេធមិននិយាយអ្វីទាំងអស់។
បន្ទាប់មក ក្រុមស៊ើបអង្កេតបានពន្លឿនការស៊ើបអង្កេត និងធ្វើដំណើរទៅកាន់សណ្ឋាគារ។ ពេលបើកបន្ទប់ មន្ត្រីក៏បានរកឃើញដាននៃការប្រតាយប្រតប់គ្នា និងមានប្រឡាក់ឈាមពេញបន្ទប់ខណៈ Chow ដេកស្លាប់ក្នុងបន្ទប់ទឹកមានស្នាមចាក់ចំនួន ៣២ កន្លែង និងកាំបិតប្រវែង២៧សង់ទីម៉ែត្រ ក៏ត្រូវបានរកឃើញនៅកន្លែងកើតហេតុ។
លទ្ធផលពិនិត្យកោសល្យវិច្ច័យបានបង្ហាញថា Chow បានស្លាប់មិនដល់២៤ម៉ោងមុនពេលមន្ត្រីបានរកឃើញ។ ស្នាមរបួសធំចំនួន២កន្លែង ចំទ្រូងប្រវែងប្រហែល ៨សង់ទីម៉ែត្រ និងក។
បន្ទាប់ពីការស៊ើបអង្កេត បានរកឃើញថា បន្ទប់សណ្ឋាគារនេះត្រូវបានកក់ទុកដោយមិត្តប្រុសរបស់ Chow កាលពីថ្ងៃទី២៨ ខែមិថុនា។ គាត់បានស្នាក់នៅទីនោះអស់រយៈពេលពីរថ្ងៃ មុនពេលកើតហេតុ។ បច្ចុប្បន្នគាត់កំពុងស្ថិតក្រោមការស៊ើបអង្កេតលើករណីឃាតកម្មនេះ។ សមត្ថកិច្ចបានសន្និដ្ឋានជំហានដំបូងថា ករណីនេះអាចទាក់ទងនឹងការឈ្លោះប្រកែកគ្នា ដោយសារបញ្ហាហិរញ្ញវត្ថុ ខណៈដែលបុរសជាមិត្តប្រុសរូបនេះនៅស្ងៀម៕ រក្សាសិទ្ធិដោយ៖ លឹម ហុង
