ពិតជារឿងគួរឲ្យអស់សំណើច ខណៈដែលអ្នកគ្រូបង្រៀនថ្នាក់មត្តេយ្យដ៏ស្រស់ស្អាតម្នាក់ ដែលមើលទៅដូច Angelababy ត្រូវបានម្តាយៗរបស់សិស្សជំទាស់ និងដាក់សម្ពាធដល់សាលា ឲ្យបណ្ដេញចេញ ព្រោះតែសម្រស់របស់នាងជាហេតុផលធ្វើឲ្យបុរសៗជាឪពុក «ឈ្លក់វង្វេង» យ៉ាងខ្លាំង សម្រុកមកទទួលកូន។
នៅថ្ងៃទី២៩ ខែមិថុនា ឆ្នាំ ២០២២ គេហទំព័រ ETtoday បានរាយការណ៍ថា ពិភពអនឡាញបានផ្ទុះឡើង បន្ទាប់ពីរូបថតរបស់គ្រូបង្រៀនថ្នាក់មត្តេយ្យវ័យក្មេងម្នាក់ ត្រូវបានចែករំលែក។ ជាមួយនឹងសម្រស់ដ៏មិនធម្មតា ជាមួយនឹងរាងរៅខ្ពស់ស្លីម និងភ្នែកមូលធំមើលទៅស្រដៀងនឹង Angelababy ដែលជាតារាសម្ដែងដ៏ល្បី។ ហើយបូករួមនឹងទឹកចិត្តដ៏ល្អរបស់នាង ក៏បានធ្វើឲ្យក្មេងៗពេញចិត្តខ្លាំងផងដែរ។
ប៉ុន្តែ ផ្ទុយពីការចូលចិត្តរបស់កូនៗដោយសារសម្រស់របស់នាងបែរជាបានធ្វើឱ្យនាង ត្រូវអ្នកម្តាយមួយចំនួនមានចិត្តច្រណែនយ៉ាងខ្លាំង ព្រោះតែស្រ្តីជាប្រពន្ធទាំងនោះ ឃើញទង្វើរបស់ប្តីរបស់ពួកគេ នាំគ្នាសម្រុកទៅសាលា ដើម្បីទទួលកូនៗ។ សម្រាប់ហេតុផលនេះ ពួកគេក៏បាននាំគ្នាដាក់សម្ពាធ ទាមទារឲ្យសាលាបណ្ដេញអ្នកគ្រូរូបនេះទៀតផង។
ទោះជាយ៉ាងណា របាយការណ៍បានបង្ហាញថា អ្នកគ្រូនោះមិនបានប្រព្រឹត្តអំពើមិនសមរម្យណាមួយឡើយ។ គ្រាន់តែសម្រស់លេចធ្លោខ្លាំងធ្វើឱ្យស្រ្តីៗជាម្ដាយប្រឆាំងទៅនឹងរូបនាងទៅវិញ។ ជាសំណាងល្អ សាលាមិនបានយកចិត្តទុកដាក់ចំពោះសំណើមិនសមហេតុផលរបស់ពួកគេឡើយ។
ក្រោយពីបានលឺរឿងនេះត្រូវបានលាតត្រដាង អ្នកនិយមលេងអ៊ីនធឺណិតបានអបអរចំពោះនាង ដោយពួកគេបាននិយាយថា វាហាក់ដូចលើសពេកហើយក្នុងការបង្ខំមនុស្សឲ្យឈប់ពីការងារ ដោយសារភាពច្រណែន ប្រច័ណ្ឌដ៏ខុសទំនងទៅលើរូបរាងស្អាតរបស់គេបែបនេះ។ ទន្ទឹមនឹងនោះ ក៏អ្នកនិយាយលេងថា «ឃើញសម្រស់អ្នកគ្រូបែបនេះ ខ្ញុំពិតជាចង់ត្រឡប់ទៅមត្តេយ្យវិញណាស់!»៕ រក្សាសិទ្ធិដោយ៖ លឹម ហុង
