ភ្នំពេញ៖ គម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ ត្រូវបានអនុវត្តក្នុងដំណាក់កាលទី២ (SCFS II) ក្នុងបំណងលើកស្ទួយអាជីវកម្មក្នុងវិស័យទេសចរណ៍ដែលបានរងគ្រោះដោយជំងឺកូវីដ-១៩ ដោយមានការគាំទ្រពីធនាគារសហគ្រាសធុនតូច និងមធ្យម កម្ពុជា និងធនាគារ ជីប ម៉ុង ។
គិតត្រឹមខែមេសា ឆ្នាំ២០២២ គម្រោងនេះបានបញ្ចេញឥណទានសរុបចំនួន ១៩២លានដុល្លារអាមេរិក ក្នុងការជួយសហគ្រាសគោលដៅទូទាំងប្រទេសកម្ពុជាបានចំនួន ១៥៨៦ សហគ្រាស។
លោក ចន ប៊ែល អគ្គនាយករបស់ធនាគារ ជីប ម៉ុង បានមានប្រសាសន៍ថា យើងរីករាយដែលបានក្លាយជាចំណែកមួយគាំទ្រគម្រោងនេះ ដែលវានឹងផ្ដល់ជាប្រយោជន៍ដល់សហគ្រាសនៅក្នុងប្រទេសឲ្យរួចផុតពីវិបត្តិ ហើយវាក៏ជាផ្នែកមួយនៃការគាំទ្រការអនុវត្តក្របខណ្ឌយុទ្ធសាស្ត្រ និងកម្មវិធីស្ដារ និងជម្រុញសេដ្ឋកិច្ចកម្ពុជាក្នុងការរស់នៅជាមួយកូវីដ១៩ តាមគន្លងប្រក្រតីថ្មី ឆ្នាំ ២០២១-២០២៣។
គួរបញ្ជាក់ថា ធនាគារ ជីប ម៉ុង និង ធនាគារសហគ្រាសធុនតូច និងមធ្យម កម្ពុជា បានប្រារព្ធពិធីចុះហត្ថលេខាលើអនុស្សារណៈយោគយល់គ្នាស្ដីពីការអនុវត្តគម្រោងសហហិរញ្ញប្បទានស្តារនិងជំរុញកំណើនក្នុងវិស័យទេសចរណ៍។ គម្រោងនេះត្រូវបានផ្ដួចផ្ដើមឡើងដោយធនាគារសហគ្រាសធុនតូច និងមធ្យម កម្ពុជា និងគាំទ្រដោយរដ្ឋាភិបាលកម្ពុជា និងគ្រឹះស្ថានហិរញ្ញវត្ថុចូលរួមចំនួន៣២ គ្រឹះស្ថាន៕
