ភ្នំពេញ៖ វាពិតជាគួរឲ្យសង្វេគពន់ពេកណាស់ ខណៈដែលកូនស្រីកំពុងតែដឹកដៃឆ្លងផ្លូវ ហើយត្រូវរថយន្តដឹកដែក បើកមកបុកនិងកិនអោយស្លាប់ភ្លាមៗនៅចំពោះមុខនោះ។ ប៉ុន្តែទោះបីជាយ៉ាងណាក្តីជនបង្កក៏ត្រូវបានឃាត់ខ្លួនភ្លាមដែរ។
គ្រោះថ្នាក់ចរាចរណ៍ដ៏រន្ធត់នេះ បង្កជាការភ្ញាក់ផ្អើលឡើងនៅវេលាម៉ោង៩និង៣០នាទីយប់ ថ្ងៃចន្ទ ទី២១ ខែឧសភា ឆ្នាំ២០១៨ នៅក្បែរច្រកចូលបុរីស្កាយឡែន តាមបណ្ដោយផ្លូវ៣៧១ ស្ថិតក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
សាក្សីឃើញហេតុការណ៍ផ្ទាល់ភ្នែកបាន ប្រាប់ឲ្យ ដឹងថា នៅមុនពេលកើតហេតុ ក្មេងស្រីរងគ្រោះអាយុ៦ឆ្នាំ រួមជាមួយម្ដាយរបស់គេ បានដើរឆ្លងផ្លូវ៣៧១ ជាមួយគ្នា តែមិនដឹងថា ម្ដាយនាំកូនឆ្លងផ្លូវប្រហែសឬយ៉ាងម៉េចទេ ស្រាប់តែមានរថយន្តកុងតឺន័រ ពណ៌ខៀវ ពាក់ស្លាកលេខ ភ្នំពេញ 3A-5205 ដែលមានដឹកដែកសរសៃ ធ្វើដំណើរតាមបណ្ដោយផ្លូវ៣៧១ ទិសដៅពីកើតមកលិចក្នុងល្បឿនលឿន ហើយក៏បុកក្មេងស្រីរងគ្រោះខាងលើ បណ្ដាលឲ្យស្លាប់នៅនឹងកន្លែងភ្លាមៗតែម្ដង។ ចំណែកឯម្ដាយពុំរងរបួសនោះទេ។
ក្រោយកើតហេតុភ្លាមៗ រថយន្តបង្កបានព្យាយាមបើករត់ រហូតដល់ផ្លូវព្រះមុនីរ៉េត (ផ្លូវ២១៧) កែងផ្លូវ៣៧១ ចំណុចស្ពានដែកចំការដូង ក៏ត្រូវបានប្រជាពលរដ្ឋដេញឃាត់បានទាំងរថយន្ត និងអ្នកបើកបរ ហើយប្រគល់ឲ្យសមត្ថកិច្ចមូលដ្ឋានយកទៅកាន់ប៉ុស្ដិ៍បឹងទំពុន២ ដើម្បីសួរនាំផងដែរ។
រថយន្តបង្កត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយតាមច្បាប់។ ដោយឡែក សពក្មេងស្រីរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ឲ្យឪពុកម្ដាយ ដឹកយកទៅស្រុកកំណើតធ្វើបុណ្យតាមប្រពៃណីនៅវត្តច្បារអំពៅ៕ ដោយ៖បញ្ញាស័ក្តិ
