មនុស្សជាង ១,១០០ នាក់ បានបាត់បង់ជិវិតនៅក្នុងទឹកជំនន់ ដែលត្រូវបានពិពណ៌នាដោយនាយករដ្ឋមន្ត្រីប៉ាគីស្ថាន Shebaz Sharif ថា គឺជាគ្រោះធម្មជាតិដ៏អាក្រក់បំផុតនៅក្នុងប្រវត្តិសាស្ត្ររបស់ប្រទេស។
យោងតាមកាសែត The Guardian (ចក្រភពអង់គ្លេស) រូបភាពពីផ្កាយរណបពីក្រុមហ៊ុនពីរ Planet Labs និង Maxar បង្ហាញវាលស្មៅបៃតង ភូមិ និងអគារនានា ដែលបង្ហាញពីភាពធ្ងន់ធ្ងរនៃការខូចខាត នៅពេលដែលទឹកជំនន់ជាប្រវត្តិសាស្ត្រ បានចាប់ផ្តើមវាយប្រហារប៉ាគីស្ថានក្នុងខែមិថុនា។
តំបន់ជាច្រើនត្រឹមតែប៉ុន្មានខែ ឬច្រើនសប្តាហ៍ក្រោយមក ត្រូវបានគ្របដណ្តប់ដោយទឹកល្ហល្ហេវ និងភក់។ នៅកន្លែងខ្លះ ផ្លូវបានបាត់អស់ ហើយទឹកជំនន់បានបង្កើតទន្លេ ចាប់ពីខេត្ត Sindh នៅភាគខាងត្បូង រហូតដល់ទន្លេ Kabul នៅភាគខាងជើង ពោលគឺគ្រប់ទីកន្លែង គឺជាសមុទ្រទឹកដ៏ធំទូលាយ។
ទឹកជំនន់ដែលត្រូវបានពិពណ៌នាដោយនាយករដ្ឋមន្ត្រី Shebaz Sharif ថាជាគ្រោះមហន្តរាយដ៏អាក្រក់បំផុតក្នុងប្រវត្តិសាស្ត្រប៉ាគីស្ថាន រហូតមកដល់ពេលនេះបានសម្លាប់មនុស្សជាង ១,១០០ នាក់ និងរាប់លាននាក់បានផ្លាស់ទីលំនៅចេញពីផ្ទះរបស់ពួកគេ។ លោក Sharif បាននិយាយថា នឹងចំណាយប្រាក់យ៉ាងតិច ១០ ពាន់លានដុល្លារ ដើម្បីជួសជុលហេដ្ឋារចនាសម្ព័ន្ធ ដែលរងផលប៉ះពាល់ដោយទឹកជំនន់។
យោងតាមស្ថិតិ ប្រជាជនជាង ៣៣ លាននាក់ ឬ ១ក្នុងចំណោម ៧ ប្រជាជនប៉ាគីស្ថាន ត្រូវបានរងផលប៉ះពាល់ដោយទឹកជំនន់។
ប្រហែលកន្លះលាននាក់ នៃអ្នកភៀសខ្លួនទាំងនោះ កំពុងរស់នៅក្នុងជំរុំដែលបានរៀបចំ ខណៈពេលដែលអ្នកផ្សេងទៀតត្រូវស្វែងរកទីជំរកសុវត្ថិភាពដោយខ្លួនឯង។
ភ្លៀងធ្លាក់ដែលបានចាប់ផ្តើមក្នុងខែមិថុនា បានបោកបក់បំផ្លាញផលដំណាំ និងខូចខាត ឬបំផ្លាញផ្ទះជាងមួយលានខ្នង។
អាជ្ញាធរប៉ាគីស្ថាន និងអង្គការសប្បុរសធម៌កំពុងតស៊ូពន្លឿនការផ្តល់ជំនួយដល់អ្នករងគ្រោះ។ នេះគឺជាកិច្ចការដ៏លំបាកមួយនៅក្នុងតំបន់ដាច់ស្រយាលដោយទឹកជំនន់ ដោយសារតែផ្លូវ និងស្ពានជាច្រើន ត្រូវបានខូចខាតយ៉ាងធ្ងន់ធ្ងរ។
នាយករដ្ឋមន្ត្រី Sharif បាននិយាយថា ទឹកជំនន់បានបំផ្លាញដំណាំយ៉ាងធ្ងន់ធ្ងរ ហើយថា រដ្ឋាភិបាលប៉ាគីស្ថានកំពុងពិចារណាលើការនាំចូលស្រូវសាលី ដើម្បីជៀសវាងការខ្វះខាតស្បៀងអាហារ។ ប្រទេសប៉ាគីស្ថានជួបប្រទះនឹងភ្លៀងធ្លាក់ខ្លាំងក្នុងរដូវមូសុងជារៀងរាល់ឆ្នាំ ប៉ុន្តែភ្លៀងធ្លាក់ក្នុងរយៈពេលថ្មីៗនេះ គឺមិនធ្លាប់មានពីមុនមកក្នុងរយៈពេល៣ទសវត្សរ៍ មកនេះ។
មនុស្សជាច្រើនជឿថា ស្ថានភាពទឹកជំនន់បច្ចុប្បន្ននៅក្នុងប្រទេសប៉ាគីស្ថាន គឺជាលទ្ធផលនៃការប្រែប្រួលអាកាសធាតុ ដោយសារតែភាពញឹកញាប់ និងអាំងតង់ស៊ីតេនៃអាកាសធាតុខ្លាំង កំពុងកើនឡើងនៅជុំវិញពិភពលោក។
អគ្គលេខាធិការអង្គការសហប្រជាជាតិ លោក Antonio Guterres បាននិយាយថា ទឹកជំនន់នៅក្នុងប្រទេសប៉ាគីស្ថាន គឺជាសញ្ញាមួយសម្រាប់ពិភពលោកក្នុងការបង្កើនសកម្មភាពប្រឆាំងនឹងការប្រែប្រួលអាកាសធាតុ៕ រក្សាសិទ្ធិដោយ៖ លឹម ហុង
