ភ្នំពេញ ៖ បុរសម្នាក់លង់ទឹកស្លាប់ក្រោយបើករថយន្តមួយគ្រឿងធ្លាក់ចេញពីផ្លូវបណ្ដាលក្រឡាប់ធ្លាក់ចូលប្រឡាយទឹកខ្ទៀតចេញតៃកុងចូលក្នុងទឹក បណ្ដាលឲ្យស្លាប់។
ហេតុការណ៍គ្រោះថ្នាក់ចរាចរណ៍ដ៍រន្ធត់នេះ បានកើតឡើងនៅវេលាម៉ោងជិត២យប់រំលងអធ្រាត្រ ឈានចូលថ្ងៃទី៣១ ខែឧសភា ឆ្នាំ២០១៨ ស្ថិតនៅតាមបណ្ដោយផ្លូវទំនប់កប់ស្រូវ ក្នុងភូមិត្រពាំងវែង សង្កាត់គោករកា ខណ្ឌព្រែកព្នៅ រាជធានីភ្នំពេញ ។
សពជនរងគ្រោះមិនត្រូវបានស្គាល់អត្តសញ្ញាណនៅឡើយទេ ។ អ្នកនៅកន្លែងកើតហេតុបានឲ្យដឹងថា ៖មុនពេលកើតហេតុ គេឃើញបុរសម្នាក់បើករថយន្តសេណាពណ៌ស ពាក់ស្លាកលេខ,កំពង់ឆ្នាំង2A-2567 បានធ្វើដំណើរទិសដៅពីលិចទៅកើត ក្នុងល្បឿនលឿន ខណៈមកដល់ចំណុចកើតហេតុខាងលើ ដោយផ្លូវកោង និងងងឹតផងនោះ ក៏បានធ្លាក់ចេញពីផ្លូវ បណ្ដាលរថយន្តក្រឡាប់ជាច្រើនត្រឡប់ហើយខ្ទាតតៃកុងចេញពីរថយន្តស្លាប់គួររន្ធត់ជាទីបំផុត រីឯរថយន្តធ្លាក់ចូលប្រឡាយទឹកផ្ងារជើងច្រង៉ាង ដោយរថយន្តរងការខូចខាតស្ទើរទាំងស្រុង។
អ្នកភូមិបន្តថា៖ក្រោយកើតហេតុសមត្ថកិច្ចមូលដ្ឋានសហកាជាមួយជំនាញវាស់វែងយករថយន្តទៅរក្សាទុកនៅការិយាល័យស្នងការរាជធានីភ្នំពេញ ។ ដោយឡែកសពជនងគ្រោះសមត្ថកិច្ចបានដឹកយកមកតម្កល់ទុកនៅវត្តទឹកថ្លារង់ចាំប្រគល់ជូនចាស់ញាតិយកទៅ ទៅស្រុកកំណើត៕ ដោយ៖បញ្ញាស័ក្តិ