កណ្តាល ៖ ធ្វេសប្រហែសតែបន្តិច ជាងជួសជុលរថយន្តម្នាក់ ត្រូវខ្សែភ្លើងឆក់ស្លាប់ ចោលប្រពន្ធ កូន គួរឲ្យអាសូរពន់ពេក។ ហេតុការណ៍ដ៏រន្ធត់នេះ កើតឡើង នៅថ្ងៃទី៣០ខែឧសភាឆ្នាំ២០១៨ វេលាម៉ោង៩ នៅចំណុចភូមិព្រែកថ្មី ឃុំព្រែកអំបិល ស្រុកស្អាង ខេត្តកណ្តាល។
នគរបាលស្រុកស្អាង បានឲ្យដឹងថា ជនរងគ្រោះ ឈ្មោះ ង៉ែត បូណា ភេទប្រុស អាយុ ៣៥ឆ្នាំ ជនជាតិខ្មែរមុខរបរជាងធ្វើឡាន មានទីលំនៅភូមិ ឃុំ កើតហេតុខាងលើ។ នៅថ្ងៃខែខាងលើ ឈ្មោះង៉ែត បូណា បានយកឌុយអាំងវទ័រ ទៅដោតតភ្ជាប់ជាមួយភ្លើងអគ្គិសនី ពេលតភ្ជាប់រួចហើយ ក៏យកអាំងវ័រទ័រនោះ ដាក់នៅផ្ទាល់ដីក្បែរឡាន រួចក៏យកដង្គៀប អាគុយ ទៅចាប់ជាមួយនឹងក្បាលអាគុយ ដើម្បីសាកភ្លើងបញ្ឆេះឡាន ។ បន្ទាប់មកជនរងគ្រោះ ក៏ដើរទៅមើល ប្រពន្ធឆាយដីមុខផ្ទះក្បែរនោះ បាន១៥នាទី ក៏ដើរមកកន្លែងធ្វើឡានវិញ រួចក៏លើកអាំងវ័រទ័រដាក់លើក្បាលឡាន ហើយក៏ទ្រោបលើទ្វារឡាន ដើម្បីបញ្ឆេះ ស្រាប់តែភ្លាមនោះ មានឆ្លងចរន្តអគ្គិសនីជាមួយអាំងវ័រទ័រ បណ្តាលឲ្យឆក់ស្លាប់តែម្តង ។
តាមការបំភ្លឺរបស់ឈ្មោះឡុង ស្រស់ ភេទស្រី អាយុ៣១ឆ្នាំ ត្រូវជាប្រពន្ធរបស់ជនរងគ្រោះ បានប្រាប់សមត្ថកិច្ចថា នៅវេលាម៉ោងខាងលើខ្លួនកំពុងឆាយដីមុខផ្ទះបានឮសំឡេងស្រែកអូយ ខ្លួនក៏ស្ទុះមកមើលកន្លែងប្តីធ្វើឡាន ក៏ឃើញប្ដី ឆក់ខ្សែភ្លើង ដួលទៅលើដី ភ្លាមនោះ ខ្លួនបានស្ទុះដកឌុយចេញពីព្រីភ្លើង បន្ទាប់មកបានស្រែកហៅអ្នកជិតខាងឲ្យជួយផង ប្តីខ្ញុំឆក់ខ្សែរភ្លើងហើយ ភ្លាមនោះដែរ ក៏មានបងប្អូន ស្ទុះមកជួយលើកដាក់លើគ្រែយកមកធ្វើចលនា លុះធ្វើចលនាមិនដឹងខ្លួន ក៏ហៅឡានដឹកទៅមន្ទីពេទ្យស្រុកស្អាង ប៉ុន្តែប្តីរបស់គាត់បានស្លាប់តាមផ្លូវតែម្តង។
ក្រោយពីទទួលបានព័ត៌មាន កម្លាំងប៉ុស្តិ៍នគរបាលរដ្ឋបាល និងកម្លាំងជំនាញពិនិត្យហេតុការណ៍នេះ ដោយមានការចូលរួមពី លោកមេភូមិ ក្រុមប្រឹក្សាឃុំពិនិត្យលើខ្លួនជនរងគ្រោះ មានស្នាមជាំខ្លោចលើដើមទ្រូងដោយសារឆក់ចរន្ដអគ្គិសនី ក្រៅពីនេះពុំមានស្លាកស្នាមអ្វីឡើយ៕ ដោយ៖បញ្ញាស័ក្តិ