សារព័តមានវៀតណាម S.H បានចុះផ្សាយឲ្យដឹងថា កាលពីថ្ងៃទី២៧ ខែតុលា ទីភ្នាក់ងារសារព័ត៌មានកម្ពុជា (AKP) បានដកស្រង់សម្តីលោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុង ដោយបានបញ្ជាក់អំពីហ្វូស៊ីលឆ្អឹងសត្វ ដែលបានរកឃើញនៅលើកោះពោធិ៍ ឃុំបាក់ខ្លង ស្រុកមណ្ឌលសីមា ក្នុងខេត្តនេះ គឺជាឆ្អឹងដាយណូស័រ។
លោក ម៉ារ៉ាឌី បាននិយាយថា ហ្វូស៊ីលនេះត្រូវបានរកឃើញប្រហែលមួយឆ្នាំមុន។ ក្រុមស្រាវជ្រាវរបស់ក្រសួងបរិស្ថាន ក៏បានចុះទៅអង្កេត និងសិក្សាហ្វូស៊ីលឆ្អឹងសត្វនេះផងដែរ។ ដំបូងឡើយ ក្រុមការងារបានកំណត់ថា ទាំងនេះជាឆ្អឹងដាយណូស័រ ប៉ុន្តែវាមិនទាន់ច្បាស់ថាជាប្រភេទសត្វអ្វីនោះទេ។
ជាមួយគ្នានេះដែរ នៅលើទំព័រហ្វេសប៊ុកផ្ទាល់ខ្លួនរបស់លោក សាយ សំអាល់ រដ្ឋមន្ត្រីក្រសួងបរិស្ថានកម្ពុជា ក៏បានផុសរូបភាពឆ្អឹងសត្វលាតត្រដាងនៅលើផ្ទាំងថ្ម ដោយបានសរសេរខ្លីៗថា «ហ្វូស៊ីលឆ្អឹងដាយណូស័រដំបូងគេ ដែលរកឃើញនៅស្រុកខ្មែរ»។
នេះជាលើកទី២ហើយ ដែលមន្ត្រីបរិស្ថានកម្ពុជាបានប្រកាសរកឃើញហ្វូស៊ីលដាយណូស័រ នៅកោះប៉ោ ជិតដែនជម្រកសត្វព្រៃតាតៃ ក្នុងឃុំបាក់ខ្លង។ យោងតាមផែនទីភូមិសាស្ត្រ តំបន់នេះជាកម្មសិទ្ធិរបស់សម័យកាល II ដែលមានអាយុកាលប្រហែល ៦៥ ទៅ ១៩០ លានឆ្នាំមុន ប្រហែលជាទាក់ទងទៅនឹងសត្វដែលរស់នៅក្នុងសម័យកាលដែលដាយណូស័រនៅតែមានជីវិត។
យ៉ាងណាមិញ ក្រឡេកមកមើលមតិមហាជនវិញ បានសួរដេញដោលគ្នាព្រោងព្រាតតែម្តង ដែលផ្តើមចេញពីមនុស្សជាច្រើនមិនជឿថា នៅស្រុកខ្មែរមានដាយណូស័រ និងក៏បានសួរទៅកាន់រដ្ឋមន្ត្រីក្រសួងបរិស្ថានថា មើលម៉េចដឹងថាឆ្អឹងដៃណូស័រ?។ ហើយក្នុងនោះ អ្នកដែលមិនជឿបាននិយាយបែបចំអកលេងសើចថា សង្ស័យឆ្អឹងរមាស និងខ្លះទៀតថា សង្ស័យឆ្អឹងបង្កងយក្ស, មើលយូរៗទៅ ដូចកន្ទុយសត្វខ្យាដំរី…។
តែទោះជាយ៉ាងណា ក៏មានអ្នកជឿថាដាយណូស័រ ប្រាកដជាមានលើភពផែនដី បានពន្យល់ទៅកាន់អ្នកសើចថា៖ «អ្នកចុចរូបសើច ប្រហែលអត់ដែលឃើញរូបចម្លាក់តាមជញ្ជាំងប្រាសាទទេមើលទៅ», «មនុស្សរាប់លានឆ្នាំដំណាលអំពីរឿងរ៉ាវអំពីរូបរាងប្រាប់តៗគ្នាពីមួយជំនាន់ទៅមួយជំនាន់ ទោះសត្វនោះផុតពូជក្ដី តែតាមរយៈការនិយាយដំណាលតៗគ្នា តាមរយៈការគូសវាសលើដី ឬនៅលើជញ្ជាំងរូងភ្នំប្រាប់តៗគ្នា វាបានធ្វើអោយរូបភាពទាំងនោះដក់ជាប់ក្នុងខួរក្បាលមនុស្សតៗជំនាន់ ហើយវាក៏បានក្លាយជារូបចម្លាក់នានាដែលបានបន្សល់ទុកមកនោះឯង»៕ រក្សាសិទ្ធិដោយ៖ លឹម ហុង
