ភ្នំពេញៈ ផ្ទុះការតវ៉ាពីសំណាក់ក្រុមកម្មករ ក្រុមជាងសំណង់ (ផ្នែកមេការ) ទទួលខុសត្រូវក្នុងការសាងសង់ អគារកាស៊ីណូ ឡឺម៉ាកាវ (Building12) ក្រុងបាវិត ខេត្តស្វាយរៀង ដោយសារតែក្រុមហ៊ុនមិនបើកលុយឲ្យពួកគេ និងរកលេសដោះស្រាយមិនព្រមទទួលខុសត្រូវ។ ដោយនៅក្នុងការតវ៉ានេះ ក្រុមអ្នតវ៉ាបានលើកបដារដោយមានសរសេរអក្សរថា “យើងខ្ញុំទាំងអស់គ្នាដែលជាមេជាងសំណង់នៅក្រុមហ៊ុន LE MACAU សរុបទាំងអស់ ១៨នាក់ បានព្រមព្រៀងដាក់តម្កល់លុយរវាងជាងជាមួយនឹងក្រុមហ៊ុន LE MACAU ចំនួន ៤៤.៧៥៨ដុល្លារ រយៈពេល ៦ខែ គិតមកដល់ពេលនេះ ផុតកំណត់ជិត ២ឆ្នាំមកហើយ យើងខ្ញុំសូមសំណូមពរដល់ក្រុមហ៊ុនមេត្តាជួយបើកលុយដែលបានតម្កល់ឲ្យយើងខ្ញុំផង។ ដោយសារយើងខ្ញុំជំពាក់គេ ចងបោលការគេច្រើន ដើម្បីបើកឲ្យកូនជាង”។
បើទោះបីជាមានការតវ៉ាយ៉ាងណាក៏ដោយ ក៏ភាគីខាងក្រុមហ៊ុនកាស៊ីណូឡឺម៉ាកាវ មិនព្រមដោះស្រាយ និងបានដោះសារយករួចខ្លួនទៅវិញ បានចុះកុងត្រាឬធ្វើកិច្ចសន្យាជាមួយមេការនិងក្រុមជាងកម្មករអ្វីនោះឡើយ។
ក្រុមអ្នកតវ៉ាបានលើកឡើងថា នេះគឺជាមិនទទួលខុសត្រូវរបស់លោក ចេង ប៊ុនថាំង អគ្គនាយកក្រុមហ៊ុនសណ្ឋាគារនិងកាស៊ីណូឡឺម៉ាកាវ និងចង់ស៊ីដាច់លុយតម្កល់ជាង ៤ម៉ឺនដុល្លារអាមេរិក ដែលផុតកំណត់ជិត ២ឆ្នាំមកហើយ មិនព្រមបើកឲ្យពួកគេ។ ហើយបែរជាទៅទម្លាក់កំហុសដាក់អ្នកផ្សេងឲ្យទទួលខុសត្រូវទៅវិញ។
ក្រុមកម្មករ ក្រុមជាងសំណង់ (ផ្នែកមេការ) ទទួលខុសត្រូវក្នុងការសាងសង់ អគារកាស៊ីណូ ឡឺម៉ាកាវ (Building12) ក្រុងបាវិត ខេត្តស្វាយរៀង ពួកគេនឹងបន្តតវ៉ា និងសុំអន្តរាគមន៍ពីសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជួយអន្តរាគមន៍និងរកយុត្តិធម៌ រឿងដែលលោក ចេង ប៊ុនថាំង អគ្គនាយកក្រុមហ៊ុនសណ្ឋាគារនិងកាស៊ីណូឡឺម៉ាកាវ មិនព្រមបើកលុយឲ្យពួកខ្លួន។
ចំណែកលោក ចេង ប៊ុនថាំង អគ្គនាយកក្រុមហ៊ុនសណ្ឋាគារនិងកាស៊ីណូឡឺម៉ាកាវ ក្រុងបាវិត មិនអាចសុំការអត្ថាធិប្បាយបានទេ៕ រក្សាសិទ្ធិដោយៈ ចេស្តារ