ស្ត្រីម្នាក់ត្រូវបានបញ្ជូនទៅសង្គ្រោះនៅមន្ទីរពេទ្យជាបន្ទាន់ បន្ទាប់ពីរថយន្តតាក់ស៊ីដែលនាងជិះ បានជួបគ្រោះថ្នាក់ចរាចរណ៍បុកជាមួយរថយន្តដឹកទំនិញ១គ្រឿង បណ្តាលឲ្យខ្មៅដៃគូរចិញ្ចើមត្រូវចាក់ដោតជាប់នឹងភ្នែកខាងឆ្វេងរបស់នាងគួរឲ្យអាសូរ ខណៈនាងកំពុងតែ makeup នៅក្នុងរថយន្ត ។
លោក Thanabodee Sabbodi អ្នកសង្គ្រោះស្ម័គ្រចិត្តម្នាក់ នៅកន្លែងកើតហេតុ បានពន្យល់ថា នៅខណៈពេលនៃគ្រោះថ្នាក់ចរាចរណ៍រថយន្តបុកគ្នានេះ គឺស្រាលទេ ប៉ុន្តែ ស្ត្រីអ្នកដំណើរម្នាក់ដែលអង្គុយនៅកៅអីក្រយ ត្រូវបានខ្មៅដៃគូរចិញ្ចើមបុកទម្លុះភ្នែកឆ្វេងរបស់គួរឲ្យអាណិតយ៉ាងខ្លាំង ។
ហេតុការណ៍នេះ ត្រូវបានគេរាយការណ៍ថា បានកើតឡើងនៅវេលាម៉ោងប្រហែល ៥ និង ៣០ នាទីយប់ ស្ថិតនៅផ្លូវ Din Daeng នៅពេលដែលស្ត្រីម្នាក់ និងសាច់ញាតិរបស់នាង កំពុងធ្វើដំណើរទៅកាន់សង្កាត់ Pratunam ក្នុងទីក្រុងបាងកក, នេះបើតាមសេចក្តីរាយការណ៍របស់ Sanook ។
លោក Thanabodee បានប្រាប់អ្នកកាសែតថា៖ «ភ្នែករបស់នាងពុំហូរឈាមច្រើនទេ ប៉ុន្តែ ចេញឈាមព្រិញៗហូរកាត់ច្រមុះរបស់នាង ព្រោះតែសរីរាង្គទាំងពីរនេះមានទំនាក់ទំនងគ្នាយ៉ាងជិតស្និទ្ធពេក» ។
វេជ្ជបណ្ឌិតនិយាយថា ស្ថានភាពរបស់ស្ត្រីរងគ្រោះ ពុំធ្ងន់ធ្ងរនោះទេ ព្រោះថា ខ្មៅដៃនោះបានឆ្លងកាត់ស្រោមភ្នែក ឬ ផ្នែកសនៅភ្នែក ហើយពួកគេបានគ្រប់គ្រងដកខ្មៅដៃនោះចេញដោយសុវត្ថិភាព ។ ហើយរបួសរបស់នាង នឹងរំពឹងថានឹងសះស្បើយនៅថ្ងៃឆាប់ៗខាងមុខនេះ ៕ ចន្ទី
