មន្រ្តីរាជរដ្ឋាភិបាល៖ ចំនួនប្រតិបត្តិការទូទាត់ក្នុងទម្រង់ឌីជីថល មានរហូតដល់ ៦៩៨,៨ លានប្រតិបត្តិការ ក្នុងរង្វង់ទឹកប្រាក់ ១៩៩,៧៦ ពាន់លានដុល្លារ ក្នុងឆ្នាំ២០២១  

ភ្នំពេញ៖ មន្រ្តីរាជរដ្ឋាភិបាល បានចាត់ទុកថា វិស័យបច្ចេកវិទ្យាឌីជីថល ជាកម្លាំងចលករដ៏មានសក្តានុពលខ្ពស់ ក្នុងការជំរុញកំណើនសេដ្ឋកិច្ចក្នុងតំបន់ និងទូទាំងពិភពលោក។ ដោយសារក្នុងអំឡុងពេលនៃវិបត្តិជំងឺកូវីដ-១៩ វិស័យបច្ចេកវិទ្យាឌីជីថល ពិសេសបច្ចេកវិទ្យាហិរញ្ញវត្ថុ ឬហៅកាត់ថា FinTech ត្រូវបានមើលឃើញកាន់តែច្បាស់ថា ជាកម្លាំងចលករដ៏មានសក្តានុពលខ្ពស់ ក្នុងការជំរុញកំណើនសេដ្ឋកិច្ចក្នុងតំបន់ និងទូទាំងពិភពលោក តាមរយៈតួនាទីសំខាន់ៗដូចជា ការបង្កើនភាពប្រកួតប្រជែង និងប្រសិទ្ធភាពនៃការផ្តល់សេវាកម្មហិរញ្ញវត្ថុ។ ការបង្កើតទីផ្សារថ្មី និងការពង្រឹងទីផ្សារដែលមានស្រាប់។ ការលើកកម្ពស់បរិយាប័ន្នហិរញ្ញវត្ថុ តាមរយៈថ្នាលឌីជីថល ដែលងាយស្រួលប្រើប្រាស់ និងការពង្រឹង និងពង្រីកប្រព័ន្ធអេកូឡូស៊ីនៃសហគ្រាសខ្នាតមីក្រូ តូច និងមធ្យម  ក៏ដូចជាធុរកិច្ចបង្កើតថ្មី។

ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញ​វត្ថុ  ក្នុងពិធីបើកវេទិកាបច្ចេកវិទ្យាហិរញ្ញវត្ថុ នៃពិព័រណ៍បច្ចេកវិទ្យាកម្ពុជា ២០២២ កាលពីពេលថ្មីៗនេះថាមានប្រសាសន៍ថា ក្នុងយុគសម័យសកលភាវូបនីយកម្មឌីជីថលនេះ បច្ចេកវិទ្យាឌីជីថល បានរីកចម្រើនលូតលាស់យ៉ាងលឿនឆាប់រហ័ស និងបានក្លាយជាកត្តាគន្លឹះសម្រាប់ជំរុញការតភ្ជាប់សេដ្ឋកិច្ច និងសង្គមនៅទូទាំងពិភពលោក ឱ្យកាន់តែស្អិតរមួត, ខិតជិតគ្នា និងពឹងពាក់គ្នាទៅវិញទៅមក។ បច្ចេកវិទ្យាឌីជីថលបានដើរតួនាទីកាន់តែសំខាន់ខ្លាំងឡើង សើ្ទរតែក្នុងគ្រប់វិស័យទាំងអស់នៃសេដ្ឋកិច្ច ដូចជា ឧស្សាហកម្ម, សេវាកម្ម, កសិកម្ម, និងហិរញ្ញវត្ថុ។ ហើយរួមទាំងជីវិតរស់នៅប្រចាំថ្ងៃរបស់មនុស្សផងដែរ។

ឯកឧត្តម បានលើកឡើងថា បច្ចេកវិទ្យាហិរញ្ញវត្ថុ បាននិងកំពុងផ្លាស់ប្តូរមុខមាត់នៃឧស្សាហកម្មហិរញ្ញវត្ថុទាំងមូលនៅក្នុងការផ្តល់ និងការទទួលបានសេវាកម្មហិរញ្ញវត្ថុ, ដោយបានចូលរួមយ៉ាងសកម្ម និងខ្លាំងក្លាក្នុងការគាំទ្រ និងជំរុញកំណើនសេដ្ឋកិច្ច។ ជាងនេះទៅទៀត, ក្នុងអំឡុងពេលនៃការរីករាលដាលនៃជំងឺកូវីដ-១៩ ការប្រើប្រាស់បច្ចេកវិទ្យាហិរញ្ញវត្ថុ ក៏បានរួមចំណែកក្នុងការបន្តដំណើរការសកម្មភាពសេដ្ឋកិច្ចសំខាន់ៗ ដូចជាការធ្វើពាណិជ្ជកម្ម និងការវិនិយោគ ពិសេសការប្រើប្រាស់ប្រព័ន្ធទូទាត់ តាមប្រព័ន្ធអេឡិចត្រូនិកបាននិងកំពុងបន្តកើនឡើងជាលំដាប់។ ជាក់ស្តែង តាមរបាយការណ៍ធនាគារជាតិនៃកម្ពុជា, ក្នុងឆ្នាំ២០២១ ចំនួននៃការធ្វើប្រតិបត្តិការទូទាត់ក្នុងទម្រង់ឌីជីថលមានរហូតទៅដល់ ៦៩៨,៨ លានប្រតិបត្តិការ ក្នុងរង្វង់ទឹកប្រាក់ ១៩៩,៧៦ ពាន់លានដុល្លារអាមេរិក៕