នាយករដ្ឋមន្ត្រីឥណ្ឌា លោក ណារិនត្រា ម៉ូឌី (Narendra Modi) កាលពីថ្ងៃម្សិលមិញ បានជំរុញឱ្យមានការវិល ត្រឡប់ទៅរកការចរចារផ្នែកការទូតវិញ ដើម្បីបញ្ចប់សង្គ្រាមរុស្ស៊ី និងអ៊ុយក្រែន ដោយបានរំលឹកឡើងវិញនូវការអំពាវនាវរបស់ប្រទេសអាស៊ីខាងត្បូងដើម្បីសន្តិភាពនៅក្នុងជម្លោះដែលកំពុងបន្ត។
ឥណ្ឌាមិនបានថ្កោលទោសការឈ្លានពានរបស់ក្រុងមូស្គូមកលើអ៊ុយក្រែនទេ ប៉ុន្តែលោក Modi បានប្រាប់ប្រធានាធិបតីរុស្ស៊ីលោក Vladimir Putin កាលពីខែកញ្ញាថា “សម័យបច្ចុប្បន្ននេះមិនមែនជាសម័យសង្រ្គាមទេ”។
លោក Modi បាននិយាយនៅក្នុងសុន្ទរកថាបើករបស់គាត់នៅឯកិច្ចប្រជុំកំពូលក្រុម 20 (G20) នៅកោះបាលី ប្រទេសឥណ្ឌូនេស៊ីថា “ខ្ញុំបាននិយាយម្តងហើយម្តងទៀតថា យើងត្រូវរកវិធីដើម្បីត្រឡប់ទៅរកផ្លូវនៃបទឈប់បាញ់ និងការទូតនៅអ៊ុយក្រែន” ។ “តម្រូវការនៃពេលវេលានាពេលនេះ បង្ហាញពីការតាំងចិត្តជាក់ស្តែង និងសមូហភាព ដើម្បីធានាសន្តិភាព សុខដុមរមនា និងសន្តិសុខនៅក្នុងពិភពលោក”។ កិច្ចប្រជុំកំពូលនេះគឺជាលើកទីមួយ ដែលមេដឹកនាំ G20 កំពុងជួបប្រជុំគ្នា ចាប់តាំងពីការលុកលុយខែកុម្ភៈ របស់រុស្ស៊ីមកលើអ៊ុយក្រែន ដែលទីក្រុងម៉ូស្គូ ពិពណ៌នាថាជា “ប្រតិបត្តិការយោធាពិសេស”។
ប្រទេសរុស្ស៊ីគឺជាអ្នកផ្គត់ផ្គង់សម្ភារៈយោធាដ៏ធំបំផុតរបស់ឥណ្ឌាអស់រយៈពេលជាច្រើនទសវត្សរ៍មកហើយ ហើយវាគឺជាទីផ្សារធំបំផុតទី 4 សម្រាប់ផលិតផលឱសថឥណ្ឌា។ ឥណ្ឌាបានក្លាយជាអតិថិជនប្រេងដ៏ធំបំផុតរបស់រុស្ស៊ីបន្ទាប់ពីប្រទេសចិន ខណៈដែលក្រុមហ៊ុនចម្រាញ់ប្រេងរបស់ខ្លួនចាប់យកទំនិញបញ្ចុះតម្លៃប្រេងឆៅដែលត្រូវបានជៀសវាងដោយអ្នកទិញលោកខាងលិច។
មន្ត្រីឥណ្ឌាបាននិយាយថា ក្រុមហ៊ុនចម្រាញ់ប្រេងក្នុងស្រុកនឹងបន្តទិញប្រេងរុស្ស៊ីដោយបញ្ចុះតម្លៃ បើទោះជាមានការខិតខំប្រឹងប្រែងរបស់សហរដ្ឋអាមេរិក និងសម្ព័ន្ធមិត្តលោកខាងលិចក្នុងការដាក់កម្រិតតម្លៃលើការនាំចេញប្រេងរបស់រុស្ស៊ីក៏ដោយ ដោយសារតែនេះផ្តល់ផលប្រយោជន៍ដល់សេដ្ឋកិច្ចរបស់ប្រទេសឥណ្ឌា។
លោក Modi បាននិយាយថា មិនគួរមានការរឹតបន្តឹងលើការផ្គត់ផ្គង់ថាមពល និងស្ថិរភាពនៅក្នុងទីផ្សារថាមពលគួរតែត្រូវបានធានានោះទេ។ លោក Modi បាននិយាយថា “សន្តិសុខថាមពលរបស់ឥណ្ឌាក៏មានសារៈសំខាន់សម្រាប់កំណើនពិភពលោក” នេះបើយោងតាមសេចក្តីថ្លែងការណ៍ដែលចេញផ្សាយដោយក្រសួងការបរទេសឥណ្ឌា។
លោក Modi បាននិយាយផងដែរថា “កង្វះខាតជីថ្ងៃនេះ គឺជាវិបត្តិស្បៀងអាហារនៅថ្ងៃស្អែក ដែលពិភពលោកនឹងមិនមានដំណោះស្រាយ។ យើងគួរតែធ្វើកិច្ចព្រមព្រៀងគ្នាទៅវិញទៅមក ដើម្បីរក្សាខ្សែសង្វាក់ផ្គត់ផ្គង់ទាំងជី និងគ្រាប់ធញ្ញជាតិមានស្ថេរភាព និងធានា”៕ ប្រភព៖ Reuters/ga