យុវជនក្នុងទីក្រុងបាងកក ៤ នៅទីបំផុត ត្រូវបានចាប់ខ្លួនហើយ និងផាកពិន័យ ពីបទបង្កការរំខាននៅទីសាធារណៈ បន្ទាប់ពីវីដេអូមួយរបស់ពួកគេបង្ហោះនៅលើ YouTube បានធ្វើឲ្យមហាជនរិះគន់យ៉ាងខ្លាំង ។
កាលពីម្សិលមិញនេះ បុរស៤នាក់ដែលមានអាយុចន្លោះពី ១៦ ទៅ ២០ ឆ្នាំ ត្រូវបានប៉ូលីសកោះហៅឲ្យចូលខ្លួនយ៉ាងឆាប់ បន្ទាប់ពីវីដេអូមួយរបស់ពួកគេ បានបង្ហាញឲ្យឃើញពួកគេធ្វើសកម្មភាពរត់ឡើងជាន់លើរថយន្តគេជាច្រើន ខណៈកំពុងជាប់ស្ទះចរាចរណ៍ និងទីកន្លែងដទៃទៀតដូចជា ដាំក្បាលចូលចានបង្គន់, រអិលខ្លួនចុះនៅលើបង្កាន់ដៃជណ្តើរយន្ត MRT និងសកម្មភាពបង្កការរំខានដទៃទៀត ។ នេះបើតាមសេចក្តីរាយការណ៍របស់ Morning News ។
យុវជន២នាក់មានអាយុ ២០ ឆ្នាំ ដូចគ្នា ត្រូវបានកំណត់អត្តសញ្ញាណមានឈ្មោះ Wanchalerm Premkasem និង Supod Srakobkaew ។ រីឯ២នាក់ទៀតមានអាយុ ១៦ និង ១៧ ឆ្នាំ ពុំត្រូវបានបញ្ចេញឈ្មោះនោះទេ ។
ប៉ូលីសនិយាយថា ៣នាក់ក្នុងចំណោមពួកគេទាំង៤ នោះមានឈ្មោះ Wanchalerm និងក្មេងប្រុសជំទង់ទាំង២ ត្រូវបានផាកពិន័យ ១ ពាន់បាត (ប្រហែល ៣០ ដុល្លារ) សម្រាប់សកម្មភាពបង្កការរំខាននៅទីសាធារណៈ ។ ចំណែក Supod ដែលបានធ្វើសកម្មភាពរត់ឡើងជាន់លើរថយន្តគេ នៅផ្លូវប្រសព្វ Asoke ពុំត្រូវបានចោទប្រកាន់ទេ ដរាបណាម្ចាស់រថយន្តទាំងនោះ ចេញមកប្តឹងតាមផ្លូវច្បាប់ ។
ទោះយ៉ាងណា វីដេអូរបស់ក្រុមនេះនៅលើមានវត្តមាននៅលើផេកហ្វេសប៊ុករបស់ Wanchalerm ។ វាឥឡូវនេះ មានអ្នកទស្សនាជាង១លានផងដែរ ៕ ចន្ទី
