ភ្នំពេញ៖ កម្លាំងសមត្ថកិច្ចប្រឆាំងបទល្មើសសេដ្ឋកិច្ច បានរកឃើញទីតាំងផលិតបាយក្ដាំងពិសេស ចំនួន៣ទីតាំង ដោយប្រកបអាជីវកម្មគ្មានច្បាប់ គ្មានអនាម័យ បាយក្ដាំងដាក់នៅលើដី គ្មានគ្រប កាលពីថ្ងៃទី១៥ខែមិថុនានេះ នៅសង្កាត់ច្បារអំពៅ ខណ្ឌច្បារអំពៅ។
ទីតាំងផលិតបាយក្បាំង គឺមានសត្វសុនខ៥ទៅ៦ក្បាល រត់ចុះរត់ឡើង ពេលយប់ ត្រូវសត្វកណ្ដុរធ្វើសមយុទ្ធទៀត ហាលខោអាវពីលើទៀត ហើយយកប្រេងកាកសំណល់មកបំពងទៀត នៅដីឡូត៍គ្មានលេខ ផ្លូវបេតុង សង្កាត់ច្បារអំពៅ២ ខណ្ឌច្បារអំពៅ។
ករណីនេះ ត្រូវបានសមត្ថិចម្រុះសម្រេចឲ្យ ផ្អាកអាជីវកម្មជាបណ្ដោះអាសន្ន រង់ចាំធ្វើច្បាប់ និងរៀបចំកន្លែងឲ្យមានសោភ័ណភាព និងមានអនាម័យត្រឹមត្រូវ ទើបអនុញ្ញាតឲ្យដំណើរការឡើងវិញ។
មន្ដ្រីជំនាញបានដកហូតសំណាក យកទៅមន្ទីពិសោធន៍ ដើម្បីពិនិត្យរកមើលកម្រិតមេរោគ និងសារធាតុគីមី ហាមឃាត់ ដាក់លើបាយក្តាំងនោះ៕ ដោយ៖បញ្ញាស័ក្តិ
