ក្មេងៗក្រុមបាល់ទាត់មានអាយុចន្លោះ ១១ ទៅ ១៦ ឆ្នាំ ចំនួន ១២ នាក់ និងគ្រូបង្វឹករបស់ពួកគេម្នាក់អាយុ ២៥ ឆ្នាំ បានចូលនៅក្នុងរូង Luang Khun Nam Nang Non កាលពីរសៀលថ្ងៃសៅរ៍ ចុងសប្តាហ៍មុន ។ ប៉ុន្តែ ពួកគេបានបាត់ខ្លួនសូន្យឈឹងចាប់តាំងពីពេលនោះ រហូតមកទល់ពេលនេះមានរយៈពេល ៨ ថ្ងៃ ហើយ ខណៈក្រុមសង្គ្រោះនៅតែបន្តស្វែងរកពួកគេយ៉ាងសស្រាក់សស្រាំបំផុត ។
នៅថ្ងៃទី៣០ មិថុនា នេះផងដែរ អាជ្ញាធរបានចាប់ផ្តើមប្រើប្រាស់ម៉ាស៊ីនបូមទឹកទាំងខ្លាចតូច និងយក្ស ដើម្បីបូមទឹកជំនន់ចេញពីក្នុងរូងនេះ ដើម្បីសម្រួលដល់ការស្វែងរកក្រុមដែលកំពុងបាត់ខ្លួនទាំងនេះ ។
ទាក់ទិននឹងករណ៍បាត់ខ្លួនមនុស្សផ្ទុះការភ្ញាក់ផ្អើលពេញពិភពលោកនេះផងដែរ បើយោងតាមគេហទំព័រព័ត៌មានថៃ Sanook បានចុះផ្សាយឲ្យដឹងថា នេះមិនមែនជាលើកទី១ទេ ដែលមនុស្សបានបាត់ខ្លួននៅក្នុងរូងភ្នំនេះ ព្រោះថានៅក្នុងឆ្នាំ ២០១៦ មានភ្ញៀវទេសចរម្នាក់ឈ្មោះ Sutirod Polyutasat ក៏បានបាត់ខ្លួននៅទីនេះដែរ ។
នៅថ្ងៃទី១២ ខែសីហា ឆ្នាំ២០១៦ លោក Sutirod Polyutasat បានទុកកង់របស់គាត់ផ្ញើនឹងអាជីវកលក់ដូរក្នុងផ្សារនៅក្នុងតំបន់នេះ ដោយគាត់បានប្រាប់ថា «គាត់មានគម្រោងស្វែងរករូងភ្នំ ដើម្បីតាំងសមាធិរយៈពេល២ថ្ងៃ» ។
ប៉ុន្តែ នៅពេលពុំឃើញគាត់ចេញមកវិញអស់រយៈពេល ៧ ថ្ងៃ ទៅហើយ អាជ្ញធរក៏ត្រូវបានគេហៅឲ្យស្វែងរក Sutirod ប៉ុន្តែ ពួកគេពុំអាចរកឃើញដានរបស់គាត់ទេ ។ រយៈពេលជិត៣ខែក្រោយមក នៅចុងខែតុលា គាត់បានបង្ហាញមុខនៅរមណីយដ្ឋានមួយ ដោយស្នើសុំបន្ទប់គេស្នាក់នៅ ប៉ុន្តែ អះអាងថា គាត់មិនមានលុយ១កាក់១សេននៅក្នុងខ្លួនទេ ។
Sutirod ក្រោយមក បានពន្យល់ប្រាប់ប៉ូលីសថា គាត់ត្រូវជាប់គាំងនៅក្នុងរូងនោះ ដោយសារទឹកជំនន់ ប៉ុន្តែ គាត់មានអាហារផ្គត់ផ្គង់រាល់ថ្ងៃ ។ នៅពេលគាត់រត់ចេញ គាត់បានដើរវង្វេងចូលផ្សារមួយក្នុងតំបន់ និងបានវិលត្រឡប់ចូលមកក្នុងរូងវិញ នៅចងខែតុលា ។ នេះជាផ្នែកមួយនៃការ «បាត់ខ្លួន» ប៉ុន្តែ វានៅតែ….ចម្លែក ។
ខណៈដែលយើងមិនអាចបញ្ជាក់ពីភាពត្រឹមត្រូវមួយ នៃរឿងរ៉ាវនេះបាន ប្រជាជនរស់នៅក្នុងខេត្ត Chiang Rai មិនបដិសេធប្រវត្តិអាថ៌កំបាំងរបស់រូងនេះ ដោយសារពួកគេជឿថាមានបារមីស័ក្ដិសិទ្ធិនៅក្នុងរូងភ្នំនេះ ។ ហើយពួកគេថែមទាំងបាននិយាយថា៖ «ប្រសិនបើអ្នកមិនជឿរឿងផ្លូវងងឹតនេះ សូមកុំប្រមាថ!!» ៕ ឧត្តម