រូបថតក្លែងក្លាយដែលមានចំណងជើងថា «អតីតប្រធានាធិបតីអាមេរិក Donald Trump ត្រូវបានចាប់ខ្លួន» បានទាក់ទាញអ្នកចូលមើលជាង 6.4 លានដង នៅក្នុងការបង្ហោះ Twitter ។
តែបើយោងតាម Wired បានបញ្ជាក់ឲ្យដឹងថា ប្រព័ន្ធផ្សព្វផ្សាយសង្គម ដែលបានផ្សព្វផ្សាយរូបភាពក្លែងក្លាយជាច្រើនសន្លឹក បង្ហាញពីអតីតប្រធានាធិបតីអាមេរិក Donald Trump ត្រូវបានប៉ូលិសឡោមព័ទ្ធចាប់ខ្លួន រត់ចេញ អង្គុយសោកសៅនៅលើកៅអីក្នុងពន្ធនាគារ បន្ទាប់មកពាក់ម៉ាស់ ពាក់ឯកសណ្ឋានពណ៌ទឹកក្រូចរបស់ពន្ធនាគារអាមេរិក ជាដើម ទាំងនេះគឺជារូបភាពដែលបង្កើតឡើងដោយបច្ចេកវិទ្យាបញ្ញាសិប្បនិម្មិត (AI)។
ពិតណាស់ សម្រាប់ព័ត៌មានលម្អិតមួយចំនួននៅក្នុងរូបថតទាំងនោះ គឺមើលទៅ “គួរឱ្យជឿជាក់” ។ ហើយការបង្ហោះជាបន្តបន្ទាប់ គឺធ្វើឡើងដោយលោក Eliot Higgins ដែលជាស្ថាបនិកនៃអង្គការ Bellingcat និងជាមនុស្សដំបូងគេដែលបង្ហោះរូបថតក្លែងក្លាយទាំងនេះ បានទាក់ទាញការចូលមើលរហូតជាង 6.4 លានដង។ នៅក្នុងរូបថតខ្លះ Higgins បានដាក់ចំណងជើងយ៉ាងច្បាស់ថា នេះជារូបភាព AI ហើយខ្លះទៀតមិនមែនទេ។
តើស្ថាបនិកម្នាក់នេះ គិតថាអ្នកទស្សនាមិនអាចបែងចែករវាងរូបភាពក្លែងក្លាយ និងរូបភាពពិត ដែលពាក់ព័ន្ធនឹងករណីអតីតប្រធានាធិបតី Donald Trump?។ ទន្ទឹមនឹងនោះ អ្នកយកព័ត៌មាន Wired ក៏បានទាក់ទងទៅគាត់ដើម្បីស្វែងរកចម្លើយ ហើយលោក Higgins ក៏បានសរសេរថា «ខ្ញុំបានបង្កើតរូបភាពជាច្រើនជាមួយនឹងប្រធានបទនេះ ជាក់ស្តែង មាតិការូបភាពជាធម្មតា គឺផ្តោតលើកម្មវត្ថុដំបូងដែលបានពណ៌នា – ក្នុងករណីនេះ សមាជិកនៃគ្រួសារ Trump គឺជាញឹកញាប់មានគុណវិបត្តិជាច្រើន»។
បើទោះបីជាមានការកើនឡើងនៃប្រជាប្រិយភាពនៃបច្ចេកវិទ្យា AI ក៏ដោយ ក៏អ្នកជំនាញជាច្រើនបានចង្អុលបង្ហាញថា វានៅតែមានការលំបាក ក្នុងការចម្លងរូបរាងកាយមនុស្សឱ្យជាប់លាប់ និងតាមធម្មជាតិ។
បើយើងក្រឡេកមើលរូបភាព AI របស់លោក Trump ដែលបានចែករំលែកនៅលើ Twitter នោះ យើងនឹងឃើញថា មុខនៅក្នុងរូបថតជាច្រើនសន្លឹក មើលទៅពិតជាពិតៗ ដៃក៏ដូចគ្នាដែរ។ ទោះជាយ៉ាងណាក៏ដោយ សមាមាត្រនៃរាងកាយរបស់អតីតប្រធានាធិបតីអាមេរិករូបនេះ ហាក់ដូចជាត្រូវបានបង្ខូចទ្រង់ទ្រាយ ឬរួមបញ្ចូលគ្នាជាមួយនឹងរាងកាយរបស់ប៉ូលីសដែលឈរក្បែរគាត់ផងដែរ។
ចំណែកការបង្ហាញដ៏ឈឺចាប់នៅលើមុខរបស់ Melania Trump (កូនស្រីរបស់លោក Trump) មើលទៅហាក់ដូចជាការសម្ដែងឡើងវិញនៃ Edvard Munch’s The Scream ឬនៅតែជាខ្សែភាពយន្តភ័យរន្ធត់ ដែលមិនទាន់បានចេញផ្សាយជាជាងរូបដែលថតដោយអ្នកថតរូប។
ម្យ៉ាងវិញទៀត គេក៏បានកត់សម្គាល់បន្ថែមថា មេដឹកនាំពិភពលោក ឬតារាល្បី ឬអ្នកមានឥទ្ធិពលលើប្រព័ន្ធផ្សព្វផ្សាយសង្គម មានរូបភាពជាច្រើនដែលត្រូវបានរក្សាទុកតាមអ៊ីនធឺណិត។ នេះធ្វើឱ្យវាអាចទៅរួចសម្រាប់រូបថត AI របស់ពួកគេ ដែលមើលទៅពិតប្រាកដជាងមនុស្សដែលកម្របង្ហាញនៅលើអ៊ីនធឺណិត។
លោក Higgins បាននិយាយថា “ជាក់ស្តែង មនុស្សកាន់តែល្បីល្បាញ រូបភាពកាន់តែច្រើន ដែល AI រៀន ។ ដូច្នេះ ជនល្បីៗតែងតែត្រូវបានធ្វើឲ្យយ៉ាងល្អបំផុត” ។
ពិតណាស់ ដោយសារតែបច្ចេកវិទ្យា Deepfake កំពុងវិវឌ្ឍន៍យ៉ាងឆាប់រហ័ស និងកាន់តែទំនើបនោះ ហេតុនេះ កាលពីពេលកន្លងមក នៅលើបណ្តាញអ៊ីនធឺណេត វីដេអូក៏ត្រូវបានចែកចាយផងដែរ ដែលបង្ហាញពីអតីតប្រធានាធិបតី បារ៉ាក់ អូបាម៉ា ប្រើពាក្យជេរប្រមាថលើប្រធានាធិបតី ដូណាល់ ត្រាំ ឬអតីតប្រធានាធិបតី រីឆាត និច្សុន…។
តែយ៉ាងណាមិញ វីដេអូទាំងអស់នោះ គឺជាវីដេអូក្លែងក្លាយ ដែលបង្កើតឡើងក្នុងគោលបំណង ផ្សព្វផ្សាយព័ត៌មានមិនពិត បង្កការភ័ន្តច្រឡំដល់សហគមន៍ប៉ុណ្ណោះ។
លោក Higgins ក៏បានទទួលទណ្ឌកម្មដែរ ប៉ុន្តែមិនមែនពីរដ្ឋាភិបាលអាមេរិកទេ។ ផ្ទុយទៅវិញ ស្ថាបនិក Bellingcat រូបនេះត្រូវបានរារាំងដោយ Midjourney ដែលជាក្រុមហ៊ុន AI ដែលបង្កើតរូបថតក្លែងក្លាយ ដោយរារាំងការចូលទៅកាន់បណ្តាញរបស់ Midjourney ទៀតទេ។
ទោះជាយ៉ាងណាក៏ដោយ ក្រុមហ៊ុន Midjourney មិនបានពន្យល់ពីហេតុផល សម្រាប់ការពិន័យណាមួយ ទៅលើលោក Higgins ដែលបានបំពានទេ៕ រក្សាសិទ្ធិដោយ៖ លឹម ហុង
