ភ្នំពេញ៖ ក្នុងវគ្គបណ្តុះបណ្តាលជាស៊េរីលើកទី១ ស្តីពីគម្រោង “ពង្រឹងភាពអង់អាចផ្នែកសេដ្ឋកិច្ចដល់ស្ត្រី ក្នុងប្រព័ន្ធឌីជីថល” ជាមួយប្រទេសជាសមាជិកមេគង្គ ឡានឆាន (កម្ពុជា វៀតណាម ថៃ) នាថ្ងៃទី១១ ខែមេសា ឆ្នាំ២០២៣ថ្មីៗនេះ ឯកឧត្តម ថេ ឈុនហាក់ អគ្គនាយក នៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ច ក្រសួងកិច្ចការនារី បានលើកឡើងថា គម្រោងស្តីពីការពង្រឹងភាពអង់អាចផ្នែកសេដ្ឋកិច្ចដល់ស្ត្រី ក្នុងយុគសម័យឌីជីថល នៅក្នុងប្រទេសកម្ពុជា វៀតណាម និងថៃ មានគោលដៅរួមចំណែកដោះស្រាយបញ្ហាប្រឈម និងបើកកាលានុវត្តភាព សម្រាប់ការពង្រឹងភាពអង់អាចផ្នែកសេដ្ឋកិច្ចរបស់ស្ត្រី ក្នុងយុគញគសម័យឌីជីថល តាមរយៈការសាកល្បងគំនិតផ្តួចផ្តើមថ្មីៗ នៅក្នុងតំបន់មេគង្គ-ឡានឆាង ប្រកបដោយចីរភាព និងបរិយាប័ន្ន ព្រមទាំងជួយដល់ការតភ្ជាប់គ្នា និងសមាហរណកម្មសេដ្ឋកិច្ច ក្នុងតំបន់។
គម្រោងស្តីពីការពង្រឹងភាពអង់អាចផ្នែកសេដ្ឋកិច្ចដល់ស្ត្រី ក្នុងយុគសម័យឌីជីថល តាមរយៈមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង ត្រូវបានប្រកាសដាក់ឲ្យដំណើរការជាផ្លូវការ កាលពីខែកក្កដា ឆ្នាំ២០២២។ គោលបំណង នៃវគ្គបណ្តុះបណ្តាលនេះ ធ្វើឡើងដើម្បីបង្ហាញពីសេចក្តីផ្តើម គោលគំនិតក្នុងការពង្រីកឱកាសសេដ្ឋកិច្ចដល់ស្ត្រី នៅតាមជនបទតាមរយៈបច្ចេកវិទ្យាឌីជីថល និងរបៀបសរសេរគម្រោងសាកល្បងទម្រង់តូច សម្រាប់ប្រទេសសមាជិក និងផ្តល់ចំណេះដឹងបច្ចេកទេស ដើម្បីអនុវត្ត និងវាយតម្លៃគម្រោងសាកល្បង នៅក្នុងប្រទេស។
បើតាមឯកឧត្តម ថេ ឈុនហាក់ បានបញ្ជាក់ថា គម្រោងស្តីពីការពង្រឹងភាពអង់អាចផ្នែកសេដ្ឋកិច្ចដល់ស្ត្រី ក្នុងយុគសម័យឌីជីថល នៅក្នុងប្រទេសកម្ពុជា វៀតណាម ថៃ មានលទ្ធផលរំពឹងទុកចំនួន៣៖ ទី១. ការផ្លាស់ប្តូរយោបល់ ចំណោមប្រទេសក្នុងតំបន់ និងការចែករំលែកបទពិសោធន៍ការងារ រវាងវិស័យសាធារណៈ និងវិស័យឯកជន។ ទី២. ការសិក្សារួមគ្នារវាងអ្នកបង្កើតគោលនយោបាយ ព្រមទាំងការអភិវឌ្ឍសមត្ថភាព និងពង្រឹងភាពអង់អាចផ្នែកសេដ្ឋកិច្ចដល់ស្ត្រី នៅក្នុងយុគសម័យឌីជីថលរបស់កម្ពុជា ថៃ និងវៀតណាម និងទី៣. ការចែករំលែក និងកិច្ចសហប្រតិបត្តិការផ្នែកបច្ចេកទេសរបស់ប្រទេស នៃកិច្ចសហប្រតិបត្តិការមេគង្គ-ឡានឆាង សម្រាប់ការអភិវឌ្ឍ និងការធ្វើសមាហរណកម្មសេដ្ឋកិច្ច តាមរយៈគម្រោងសាកល្បង នៅក្នុងប្រទេសទាំងបី៕
