ភ្នំពេញ៖ ក្រុមហ៊ុនអាកាសចរណ៍ជាតិកម្ពុជា អង្គរអ៊ែរ បានចាប់ផ្ដើមបើកជើងហោះហើរត្រង់ សៀមរាប-វៀងច័ន្ទ ដោយហោះ១ជើងក្នុង១សប្តាហ៍ គឺនៅរៀងរាល់ថ្ងៃច័ន្ទ ដោយប្រើយន្តហោះប្រភេទ Airbus-A321។
យោងតាមសេចក្តីប្រកាសព័ត៌មានរបស់ក្រុមហ៊ុន បានឲ្យដឹងថា ជើងហោះហើរត្រង់សៀមរាប-វៀងច័ន្ទនេះ គឺជាផ្នែកមួយនៃការប្ដេជ្ញាចិត្តរបស់ក្រុមហ៊ុនអាកាសចរណ៍ជាតិ ក្នុងការផ្តល់សេវាកម្មដ៏ល្អឥតខ្ចោះ ជូនភ្ញៀវទេសចរទៅកាន់គោលដៅ ដោយប្រើពេលវេលាខ្លីបំផុត។
ជើងហោះហើរត្រង់ថ្មីនេះ ចេញដំណើរពីអាកាសយានដ្ឋានអន្តរជាតិសៀមរាប នៅម៉ោង៦៖០០នាទីព្រឹក ចុះចតនៅអាកាសយានដ្ឋានអន្តរជាតិនៅរដ្ឋធានីវៀងច័ន្ទ វេលាម៉ោង៧:០៥នាទីព្រឹក ដោយជើងហោះហើរលេខ K៦ ៩០៨។ ហើយត្រឡប់មកវិញ នៅវេលាម៉ោង៧ :៥០នាទីព្រឹក ដោយមកដល់សៀមរាបនៅម៉ោង៩:០០នាទីព្រឹក ត្រូវនឹងជើងហោះហើរលេខ K៦ ៩០៩។ ក្រុមហ៊ុននឹងបន្ថែមជើងហោះហើរជាច្រើនទៀតទៅតាមតម្រូវការរបស់ភ្ញៀវទេសចរ។
សេចក្ដីប្រកាសព័ត៌មានបញ្ជាក់ថា ជើងហោះហើរត្រង់សៀមរាប-វៀងច័ន្ទនេះ គឺជាផ្នែកមួយនៃការប្ដេជ្ញាចិត្តរបស់ក្រុមហ៊ុនអាកាសចរណ៍ជាតិ ក្នុងការផ្តល់សេវាកម្មដ៏ល្អឥតខ្ចោះ ជូនភ្ញៀវទេសចរទៅកាន់គោលដៅ ដោយប្រើពេលវេលាខ្លីបំផុត។ ជើងហោះហើរថ្មីនេះ នឹងទាក់ទាញភ្ញៀវទេសចរ អ្នកធុរកិច្ច និងអ្នកធ្វើដំណើរជាច្រើនទៀត ដែលអាចនឹងរួមចំណែកដល់ការអភិវឌ្ឍវិស័យទេសចរណ៍ និងសេដ្ឋកិច្ចនៃប្រទេសទាំងពីរ។
គួរបញ្ជាក់ថា ក្រុមហ៊ុនអាកាសចរណ៍ជាតិកម្ពុជាអង្គរអ៊ែរ ជាក្រុមហ៊ុនអាកាសចរណ៍ជាតិដំបូងគេ និងតែមួយគត់របស់ប្រទេសកម្ពុជា ដែលទទួលបានវិញ្ញាបនបត្រសុវត្ថិភាព IOSA ពីសមាគមន៍ដឹកជញ្ចូនផ្លូវអាកាសអន្តរជាតិ (IATA) ហើយក៏ជាក្រុមហ៊ុនអាកាសចរណ៍ផ្លូវការ ដែលតំណាងឱ្យរាជរដ្ឋាភិបាលកម្ពុជា ក្នុងការជួយផ្សព្វផ្សាយយុទ្ធនាការឆាំ្នទស្សនាកម្ពុជា ២០២៣ផងដែរ៕