អភិបាលខេត្តព្រះសីហនុ៖ ការវិនិយោគនៅលើកោះ កំពុងតែមានការទាក់ទាញខ្លាំង ពីសំណាក់ភ្ញៀវទេសចរជាតិ និងអន្តរជាតិ

ព្រះសីហនុ៖ នៅក្នុងខេត្តព្រះសីហនុ មានកោះចំនួនប្រមាណ ៣០កោះ ក្នុងនោះ មានកោះជាង ២០កោះ ត្រូវបានរាជរដ្ឋាភិបាល​ តាមរយៈក្រុមប្រឹក្សាអភិវឌ្ឍន៍កម្ពុជា (CDC) បានអនុម័តឲ្យក្រុមហ៊ុនឯកជនវិយោគ។​

ឯកឧត្តម គួច ចំរើន អភិបាលខេត្តព្រះសីហនុ បានលើកឡើងថា ការវិនិយោគនៅលើកោះ កំពុងតែមានការទាក់ទាញខ្លាំងពីសំណាក់ភ្ញៀវទេសចរជាតិ និងអន្តរជាតិ។ អភិបាលខេត្ត បានបន្ថែមថា តម្លៃនៃការការវិនិយោគ និងការចំណាយទៅលើការធ្វើទេសចរនៅលើកោះ មានការចំណាយច្រើនជាងការចំណាយនៅលើដីគោកធម្មតា។ បើតាមការវាយតម្លៃរបស់ឯកឧត្តម គួច ចំរើន ការវិនិយោគលើកោះ អាចចំណាយលើសការរវិនិយោគ​នៅលើដីគោកប្រមាណ៣ដង។

អភិបាលខេត្តព្រះសីហនុ បានឲ្យដឹងថា ក្នុងចំណោមកោះទាំងនោះ គឺមានតែកោះចំនួន៥ប៉ុណ្ណោះ ដែលមានការអភិវឌ្ឍលេចធ្លោជាងគេ ក្រៅពីនេះ ពុំសូវមាការអភិវឌ្ឍន៍នោះទេ។ កោះទាំង៥ ដែលមានការអភិវឌ្ឍន៍ខ្លាំងជាងគេនោះ រួមមាន កោះរុង, កោះរុងសន្លឹម, កោះឫស្សី, កោះក្របី និងកោះសង្សារ ហើយនៅមុនជំងឺកូវីដ-១៩ រាតត្បាត មានអ្នកវិនិយោគជាង ៥០% បានមកអភិវឌ្ឍន៍លើកោះទាំងនេះ ដែលក្រុមហ៊ុនទទួលបានសិទ្ធិវិនិយោគ។

គួរបញ្ជាក់ថា បើតាមឯកឧត្តម គួច ចំរើន ចំពោះតម្លៃសេវានៅលើកោះ ដែលមានតម្លៃថ្លៃ ត្រូវបានឯកឧត្តម ចាត់ទុកថា ជាការលើកទឹកចិត្តមួយដល់អ្នកវិនិយោគ ដោយសារតែវាជាឱកាសសម្រាប់អ្នកវិនិយោគត្រូវចាប់យក ហើយនៅពេលដែលមានការវិនិយោគច្រើន ការផ្គត់ផ្គង់នៅលើកោះ កាន់តែមានភាពសម្បូរបែប ដែលអាចធ្វើឱ្យតម្លៃទំនិញ និងសេវាកម្មនៅទីនោះ អាចនឹងមានការថយចុះជាងមុន និងមានភាពប្រកួតប្រជែង៕