យុវជនម្នាក់ ដែលចំណាយពេលដើរទិញអាគុយចាស់ៗ ក្នុងតម្លៃថោកៗ រយៈពេល១ឆ្នាំ ប្រមូលបានចំនួន ២០០ អាគុយ បានសម្រេចចិត្តលក់ទាំងអស់ បន្ទាប់ពីមានឈ្មួញ ហ៊ានឲ្យថ្លៃដ៏មិននឹកស្មាន។
គេជឿថា អ្នកប្រើប្រាស់រថយន្តជាច្រើន ប្រាកដជាធ្លាប់មានបទពិសោធន៍ផ្លាស់ប្តូរអាគុយ ហើយមួយចំនួនតូចពេលដូរ ក៏បានដោះដូរ (កាត់តម្លៃ) ជាមួយអាគុយថ្មី នៅហាងលក់អាគុយ ប៉ុន្តែ តើអ្នកដឹងទេថា អាគុយចាស់អាចមានតម្លៃជាងអ្វីដែលអ្នកគិត។
យុជនរូបនោះ បាននិយាយក្នុងឃ្លីបថា គាត់បានដើរប្រមូលទិញអាគុយចាស់ៗ ដែលលែងដំណើរការ រយៈពេល១ឆ្នាំ មានទៅតាមទំហំតូចធំ ខ្លះមើលទៅចាស់ ហើយទំនងមិនអាចប្រើបានទេ ប៉ុន្តែនៅតែមានអ្នកទិញយកទាំងអស់។
យុវជននោះ បានរៀបរាប់ឲ្យដឹងថា គាត់បានទិញអាគុយជជុះប្រហែល ២០០ គ្រាប់។ ប៉ុន្តែ ក្នុងអំឡុងពេលនេះតម្លៃឡើងថ្លៃ គាត់ក៏សម្រេចលក់ទាំងអស់។ ជាក់ស្តែង តាមរយៈការបង្ហាញក្នុងក្រដាសតម្លៃទិញអាគុយជជុះនេះ គេបានឃើញម៉ូដែលនីមួយៗមានតម្លៃខុសៗគ្នា។
ក្នុងនោះ អាគុយទំហំ 70 ប្រើក្នុងឡានភីកអាប់ លក់ក្នុងតម្លៃ 600 បាត, អាគុយទំហំ 35 ប្រើក្នុងឡាន sedan លក់ក្នុងតម្លៃ 350 បាត, អាគុយទំហំ 120 លក់ ក្នុងតម្លៃ 800-900 បាត និងអាគុយទំហំ 200 ក្នុងឡានក្រុង អាចលក់បានក្នុងតម្លៃ ១៣០០ បាត។ សរុប អាគុយជជុះចំនួន ២០០ គ្រឿង ទទួលបានប្រាក់ចំនួន ១៩០.០៩០ បាត (ស្មើជាង ៥០០០ ដុល្លារ)។
ក្រោយបង្ហោះ វីដេអូឃ្លីបនេះ ទាក់ទាញការចូលមើលដល់ទៅ 1.6 លានដង។ ក្នុងនោះ មនុស្សភាគច្រើនដែលធ្លាប់ដូរអាគុយ បានប្រាប់ឲ្យដឹងទាំងសោកស្តាយថា ពួកគេលក់ឲ្យហាងក្នុងតម្លៃត្រឹមតែ ១០០-២០០ បាត ដោយមិនដឹងថា អាគុយជជុះនឹងថ្លៃជាងការគិតនោះទេ។ អ្នកខ្លះដែលបានដឹង ក៏បានប្រាប់ថា អ្នកដែលទិញអាគុយចាស់ៗ គេមានវិធីដើម្បីស្តារស្ថានភាពអាគុយឡើងវិញ ពោលគឺឧបករណ៍ចាស់ អាចត្រឡប់មកប្រើធម្មតាម្តងទៀតបាន៕ រក្សាសិទ្ធិដោយ៖ លឹម ហុង
