នាងក្រមុំវៀតណាមម្នាក់ បានចែករំលែករឿងរ៉ាវ ធ្លាប់ទៅស៊ីការបងប្រុសជិតផ្ទះម្នាក់កាលពី ១០ឆ្នាំមុន តែពេលនេះនាងក្លាយជាកូនក្រមុំរបស់គេ និងបានអះអាងយ៉ាងម៉ឺងម៉ាត់ថា នាងមិនមែនជាជនទី៣ទេ។
ព្រហ្មលិខិត ជារឿងមួយដែលគ្មានអ្នកណាដឹងមុនឡើយ យើងគ្មានថ្ងៃដឹងថា តើអនាគត អ្នកណាជាគូជីវិតរបស់យើង និង តើយើងនឹងបានរៀបការជាមួយអ្នកណាឡើយ? ដូចគ្នានឹងគូស្នេហ៍ជនជាតិវៀតណាម ១គូនេះដែរ កាលពីខាងស្រីនៅក្មេង នាងធ្លាប់បានទៅចូលរួមពិធីមង្គលការរបស់ខាងប្រុស លុះពេលវេលាកន្លងទៅ នាងក៏បានរំកិលឋានៈ ពីភ្ញៀវ មកជាកូនក្រមុំខ្លួនឯងម្ដង។
តាមរយៈរូបភាព ក្នុងអំឡុងពេលនោះ នាងនៅជាក្មេងស្រីវ័យជំទង់នៅឡើយ នាងបានថតរូបជាមួយបងប្រុសអ្នកជិតផ្ទះម្នាក់ទុកជាអនុស្សាវរីយ៍ និងចូលរួមជូនពរឱ្យសេចក្ដីស្នេហារបស់គាត់រីករាយ និងស្រស់ថ្លា តែគ្មាននរណានឹកស្មានដល់ឡើយថា អនាគត នាងនឹងក្លាយជាភរិយារបស់គាត់។
ប្រាកដណាស់ មនុស្សជាច្រើនអាចនឹកសង្ស័យចំពោះសម្ព័ន្ធភាពស្នេហ៍នេះ តែនាងបានអះអាងថា នាងមិនបានចូលទៅធ្វើជាជនទី៣ បំផ្លាញសេចក្ដីសុខគ្រួសារអ្នកណាឡើយ ព្រោះខាងប្រុសបានលែងលះដាច់ជាមួយអតីតភរិយារួចហើយ មុននឹងមកជួបនាង។
“កាលពីជិត ១០ឆ្នាំមុន ខ្ញុំបានទៅចូលរួមពិធីមង្គលការរបស់បងប្រុសរបស់អ្នកជិតផ្ទះម្នាក់ដោយគ្មានគិតអ្វីទាំងអស់ តែពេលនេះខ្ញុំបានក្លាយជាភរិយារបស់គាត់ ខ្ញុំមិនបានធ្វើឱ្យគ្រួសារគាត់បែកបាក់គ្នាទេ ពួកគាត់លែងលះគ្នាតាំងពី ២-៣ឆ្នាំមុនម្ល៉េះ មុននឹងយើងរៀបការនឹងគ្នា”
រឿងរ៉ាវនេះ បានទទួលការចាប់អារម្មណ៍យ៉ាងច្រើនពីបណ្ដាញសង្គមអនឡាញ អ្នកខ្លះក៏នៅតែនឹកសង្ស័យអំពីសម្ព័ន្ធភាពស្នេហ៍មួយនេះ តែភាគច្រើននាំគ្នាសរសើរចំពោះព្រហ្មលិខិតស្នេហ៍មួយនេះ…”គឺជាគោលបំណងរបស់ព្រះជាម្ចាស់”… “ព្រហ្មលិខិតតែងតែពិសេសជានិច្ច យើងមិនដែលដឹងមុនថា យើងនឹងជួបនរណា ស្រឡាញ់នរណា និងរៀបការជាមួយនរណាឡើយ”… “អូ! ជួនកាលមនុស្សប្រុសម្នាក់ ជិតស្និទ្ធជាមួយខ្ញុំខ្លាំងណាស់ តែមិនទាន់ដល់ពេលវេលា គេក៏មិនទាន់បង្ហាញខ្លួនដែរ…”៕
