កាលពីដើមសប្តាហ៍នេះ ថ្ងៃអង្គារ៍ (១០ កក្កដា) សេចក្តីរាយការណ៍មួយបានឲ្យដឹងថា ជើងហោះហើរ Air China ដែលដឹកអ្នកដំណើរ ១៥៣ នាក់ និងក្រុមសមាជិកអាកាសយានិក ៩ នាក់ ដែលហោះពីហុងកុង ទៅកាន់ Dalian ប្រទេសចិន ស្រាប់តែបានធ្លាក់ចុះក្នុងរយៈកម្ពស់ប្រហែល ៧,៦០០ ម៉ែត្រ) ក្នុងរយៈពេល ១០ នាទី ក្នុងអំឡុងពេលកំពុងធ្វើដំណើរលើអាកាស ។
ព័ត៌មាននៃហេតុការណ៍នេះ បានចាប់ផ្តើមរីករាលដាលនៅលើបណ្តាញសង្គមចិន ខណៈពេលដែលបណ្តារូបភាពអ្នកដំណើរ កំពុងពាក់ម៉ាសអុកស៊ីហ្សែននៅក្នុងយន្តហោះ ដែលធ្វើឲ្យអ្នកលេងអ៊ីនធើរណេតមានការព្រួយបារម្ភយ៉ាងខ្លាំង ។ មនុស្សជាច្រើនបានភ្ញាក់ផ្អើលនឹងការធ្លាក់ចុះភ្លាមៗរបស់យន្តហោះនោះ ហើយធ្វើឲ្យមនុស្សមានការងឿងឆ្ងល់ពីអ្វីដែលបណ្តាលឲ្យកើតមានឧបទ្ទវហេតុនេះឡើង ។
យោងតាមកាសែត South China Morning Post បានឲ្យដឹងថា រដ្ឋបាលអាកាសចរណ៍ស៊ីវិលនៃការស៊ើបអង្កេតបឋមរបស់ប្រទេសចិន បានបង្ហាញថា អ្នកបើកបរយន្ដហោះបានព្យាយាមបិទកង្ហាសាភាយខ្យល់ ដោយពុំបានប្រាប់អ្នកបើកយន្តហោះទេ បន្ទាប់ពីជក់បារីអេឡិចត្រូនិច (e-cigarette) ។ គាត់បានធ្វើបែបនេះ ដើម្បីទប់ស្កាត់ផ្សែងមិនឱ្យចូលក្នុងបន្ទប់អ្នកដំណើរធុំក្លិន ។
ទោះយ៉ាងណាក៏ដោយ នោះគឺជាអ្វីៗដែលខុសឆ្គង ព្រោះគាត់បានបិទម៉ាស៊ីនត្រជាក់ដោយចៃដន្យជំនួសវិញបែបនេះ ដែលបង្កឲ្យកម្រិតអុកស៊ីហ្សែនធ្លាក់ចុះខ្សោយ ហើយធ្វើឲ្យមានការព្រមានពីរយៈកម្ពស់! ។
លោក Qiao Yibin មន្ត្រីការិយាល័យសុវត្ថិភាពរដ្ឋបាលអាកាសចរណ៍ស៊ីវិល ត្រូវបានដកស្រង់សម្តីនិយាយថា៖ «បច្ចុប្បន្ននេះ យើងខ្ញុំកំពុងបើកការស៊ើបអង្កេតរកមូលហេតុលម្អិតស៊ីជម្រៅ ហើយប្រសិនការស៊ើបអង្កេតបង្ហាញថាវាជាករណីពិត នោះយើងខ្ញុំនឹងដោះស្រាយវាទៅតាមផ្លូវច្បាប់ និងបទបញ្ជា និងដោះស្រាយវាឲ្យបានធ្ងន់ធ្ងរ» ។
បន្ទាប់ពីការធ្លាក់ចុះភ្លាមៗ រហតូដល់រយៈកម្ពស់ប្រហែល ៣,០០០ ម៉ែត្រ សំណាងហើយ ដែលយន្តហោះបានត្រឡប់មកស្ថានភាពល្អប្រសើរឡើងវិញ ដោយនៅពេលនោះ វាបានគ្រប់គ្រងត្រឡប់ទៅកាន់រយៈកម្ពស់ប្រហែល ៧,៩០០ ម៉ែត្រ និងទីបំផុត វាបានចុះចតដោយសុវត្ថិភាព ៕ ឧត្តម (ប្រភព៖ worldofbuzz)
