ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានឲ្យដឹងថា ថៃ បានឈរលើកំពូលតារាងក្នុងចំណោមភ្ញៀវទេសចរបរទេស ដែលមកកម្សន្តនៅកម្ពុជា ក្នុងអំឡុងពីខែមករា ដល់ខែមិថុនាឆ្នាំ២០២៣នេះ បន្ទាប់មកគឺប្រទេសវៀតណាម ចិន ឡាវ និងសហរដ្ឋអាមេរិក។
រដ្ឋមន្ត្រីក្រសួងទេសចរណ៍ បានឲ្យដឹងទៀតថា មានភ្ញៀវទេសចរបរទេសប្រមាណ ២,៥៧ លាននាក់បានមកកម្សាន្តនៅកម្ពុជា ក្នុងឆមាសទី១នៃឆ្នាំ ២០២៣នេះ ដែលមានការកើនឡើងពីចំនួន ៤០៩% ឬស្មើនឹង ៥០៦,៧៦២នាក់ បើធៀបនឹងរយៈពេលដូចគ្នាកាលពីឆ្នាំមុន។
ឯកឧត្តម បានលើកឡើងទៀតថា “ភ្ញៀវទេសចរបរទេសប្រមាណ ៩១០.០០០នាក់ បានមកទស្សនាកម្ពុជាតាមផ្លូវអាកាស កើនឡើង ២៧៩% ផ្លូវគោក ១.៦៣ លាននាក់ កើនឡើង ៥២៦% និងផ្លូវទឹកចំនួន ៣០.០០០ នាក់ កើនឡើង ៥៨៦%” ដោយលោកបានបន្ថែមថា កម្ពុជាបានស្វាគមន៍ជើងហោះហើរអន្តរជាតិសរុបចំនួន ១០,៦៣៥ នៅក្នុងឆមាសទីមួយនៃឆ្នាំនេះ។
ផ្អែកលើការព្យាករណ៍ចុងក្រោយ កម្ពុជាអាចទទួលបានទេសចរបរទេសដល់ ៥ លាននាក់នៅឆ្នាំ២០២៣ កើនឡើង ១២០% ឬស្មើនឹង ២,២៧ លាននាក់ ក្នុងឆ្នាំ ២០២២”។ ចំនួនភ្ញៀវបរទេសមកកម្ពុជាត្រូវបានព្យាករណ៍ថានឹងកើនឡើងដល់ ៧ លាននាក់ក្នុងឆ្នាំ២០២៥។ ការស្ទុះងើបឡើងវិញនៃវិស័យទេសចរណ៍ បានរួមចំណែកយ៉ាងសំខាន់ដល់កំណើនសេដ្ឋកិច្ចក្រោយជំងឺរាតត្បាតកូវីដ១៩ ដែលត្រូវបានព្យាករណ៍ថា នឹងសម្រេចបាន ៥.៦% នៅឆ្នាំ២០២៣នេះ។ ការបើកប្រទេសចិនឡើងវិញនៅដើមឆ្នាំនេះ ក៏បានជំរុញកំណើនទេសចរណ៍របស់កម្ពុជាដែរ ហើយកម្ពុជារំពឹងថា នឹងទាក់ទាញភ្ញៀវទេសចរចិនពី ៨០ម៉ឺននាក់ ទៅ១លាននាក់ នៅឆ្នាំ២០២៣នេះផងដែរ។ នេះបើតាមរដ្ឋមន្ត្រីក្រសួងទេសចរណ៍ឯកឧត្តម ថោង ខុន។
គួរបញ្ជាក់ថា វិស័យទេសចរណ៍ ជាសសរស្តម្ភមួយ ដែលជួយដល់សេដ្ឋកិច្ចរបស់ប្រទេសកម្ពុជា បន្ថែមពីលើការនាំចេញសម្លៀកបំពាក់ កសិកម្ម សំណង់ និងអចលនទ្រព្យ។ លើសពីនេះ កម្ពុជាត្រូវបានគេទទួលស្គាល់ថា ជាប្រទេសដែលមានតំបន់បេតិកភណ្ឌពិភពលោកចំនួនបី គឺឧទ្យានបុរាណវត្ថុអង្គរ ប្រាសាទព្រះវិហារ និងរមណីយដ្ឋានប្រាសាទសំបូរព្រៃគុក។ ក្រៅពីនេះ កម្ពុជា ក៏មានឆ្នេរសមុទ្រ កាត់ខេត្តចំនួន ៤ គឺខេត្តព្រះសីហនុ កោះកុង កំពត និងខេត្តកែប៕