ថ្មីៗនេះ គេហទំព័រ CNA បានរាយការណ៍អំពីគ្រោះថ្នាក់ដ៏គួរឱ្យភ័យខ្លាចមួយ ដែលបានសម្លាប់មនុស្សចំនួន ៥ នាក់ នៅនឹងកន្លែង នៃរមណីយដ្ឋាន Ayuterra ស្ថិតនៅក្នុងតំបន់ទេសចរណ៍ Ubud កោះបាលី ប្រទេសឥណ្ឌូនេស៊ី។ ឧប្បត្តិហេតុនេះកើតឡើងដោយសារតែជណ្តើរយន្តរបស់រមណីយដ្ឋានស្រាប់តែដាច់ខ្សែ ធ្លាក់ចំងាយ១០០ម៉ែត្រចូលទៅក្នុងជ្រោះ បង្កជាសំឡេងផ្ទុះលាន់ឮយ៉ាងខ្លាំង និងសម្លាប់មនុស្សដែលមានវត្តមាននៅក្នុងជណ្តើរយន្តទាំងអស់។
គួរកត់សម្គាល់ថា ជណ្តើរយន្តនេះត្រូវបានគេស្គាល់ថា ជាកន្លែងចុះឈ្មោះក្នុងបញ្ជី នៃ “ការរស់នៅបែបនិម្មិត” និងជាទីពេញចិត្តរបស់អ្នកទេសចរជាច្រើន ដែលមកកម្សាន្តនៅរមណីយដ្ឋាននេះ ដោយសារតែភាពពិសេស និងក៏ដូចជាកន្លែងជិតស្និទ្ធនឹងធម្មជាតិ។
គេបានដឹងថា ជនរងគ្រោះ៥នាក់ (ប្រុស២នាក់ ស្រី៣នាក់) សុទ្ធតែជាបុគ្គលិកក្រុមហ៊ុន Ayuterra ហើយនៅវ័យក្មេងៗតែម្តង ក្នុងនោះជនរងគ្រោះមានឈ្មោះ Sang Putu Bayu Adi Krisna អាយុ ១៩ឆ្នាំ, Kadek Yanti Pradewi ១៩ឆ្នាំ, Ni Luh Supernigsih អាយុ 20 ឆ្នាំ, Wayan Aries Setiawan អាយុ 23 ឆ្នាំ និង Kadek Hardiyanti អាយុ 24 ឆ្នាំ។
បន្ទាប់ពីមានសោកនាដកម្មនេះ វីដេអូមួយបានបង្ហាញពីពេលដែលបុគ្គលិកចូលទៅក្នុងជណ្តើរយន្ត មុនពេលវាចាប់ផ្តើមឡើងចំណោត ហើយសោកនាដកម្មក៏បានកើតឡើង។ នៅក្នុងវីដេអូនោះគេអាចមើលឃើញថា បន្ទាប់ពីឡើងដល់ចំណោត ជណ្ដើរយន្តក៏បានរអិលចុះពីលើផ្លូវក្នុងល្បឿនយ៉ាងលឿនក្នុងពេលដ៏ខ្លី។
ចែករំលែកជាមួយអ្នកសារព័ត៌មានអំពីសោកនាដកម្មនេះ មេចុងភៅរបស់រមណីយដ្ឋាន លោក Ketut Suwiarham បាននិយាយថា គាត់បានឮសំឡេងស្រែក និងសំឡេងខ្លាំងៗ នៅពេលឧបទ្ទវហេតុជណ្តើរយន្តកើតឡើង។
បច្ចុប្បន្ន ប៉ូលីសប្រចាំតំបន់បាលី កំពុងបន្តស៊ើបអង្កេតមូលហេតុ ថាតើគ្រោះថ្នាក់នេះកើតឡើងដោយសារការធ្វេសប្រហែសដែរ ឬទេ។ ប្រធាននាយកដ្ឋានទំនាក់ទំនងសាធារណៈរបស់ប៉ូលីសបាលី លោក Jansen Avitus Panjaitan បាននិយាយថា ជណ្ដើរយន្តត្រូវបានសាងសង់មិនសូវល្អ ដោយគ្រាន់តែមានខ្សែយោងមួយប៉ុណ្ណោះ និងបានបញ្ជាក់ថា ជណ្តើរយន្តនេះមិនមានហ្វ្រាំងសង្គ្រោះបន្ទាន់ទេ។
លោក Jansen ក៏បានឲ្យដឹងថា “ទាក់ទងនឹងឧប្បត្តិហេតុនេះ យើងបាននិងកំពុងកំណត់ថាតើ បណ្តាលមកពីការមិនអនុលោមតាមនីតិវិធីប្រតិបត្តិការស្តង់ដារ (SOP) មានធាតុផ្សំនៃការធ្វេសប្រហែសនៅក្នុងឧប្បត្តិហេតុនេះ ឬយ៉ាងណា”។
ទោះជាយ៉ាងណា ម្ចាស់រមណីយដ្ឋាន Linggawati Utomo បានផ្ញើសាររំលែកទុក្ខដល់ក្រុមគ្រួសារជនរងគ្រោះថា៖ «សម្រាប់ថ្លៃធ្វើបុណ្យ និងបញ្ចុះសព យើងខ្ញុំនឹងរ៉ាប់រងការចំណាយទាំងអស់ ហើយយើងនឹងផ្តល់សំណងដល់ក្រុមគ្រួសារផងដែរ»៕ រក្សាសិទ្ធិដោយ៖ លឹម ហុង
