មនុស្ស​ជាង ៣០០ នា​ក់ ប្រើ​ដ្រូន ដើម្បី​ស្វែងរក​យុវជន​ម្នាក់ ដែល​បាន​បាត់ខ្លួ​ន ខណៈ​ចូល​ទៅ​រក​ឃ្មុំ​ក្នុង​ព្រៃ

មនុស្សជាង ៣០០ នាក់ រួមទាំងប៉ូលីស ទាហាន មន្ត្រីរដ្ឋាភិបាលក្នុងតំបន់ និងអ្នកស្រុក នៅក្នុងប្រទេសវៀតណាម បានកំពុងព្យាយាមស្វែងរកយុវជនម្នាក់ ដែលបានបាត់ខ្លួនជិតមួយសប្តាហ៍មកហើយ បន្ទាប់ពីចូលទៅក្នុងព្រៃ ដើម្បីរកឃ្មុំ។

នាព្រឹកថ្ងៃទី២០ កញ្ញា លោក Nguyen Huy Anh ប្រធានគណៈកម្មាធិការប្រជាជនឃុំ Nghia Loi ស្រុក Nghia Dan ខេត្ត Nghe An បានឲ្យដឹងថា មនុស្សជាង ៣០០ នាក់ រួមមានប៉ូលីស ទាហាន មន្ត្រីរដ្ឋាភិបាលក្នុងតំបន់ និងប្រជាជនកំពុងព្យាយាមស្វែងរកយុវជនឈ្មោះ Vi Van Nghia (អាយុ ២៤ ឆ្នាំ រស់នៅឃុំ Nghia Loi) បានបាត់ខ្លួនយ៉ាងអាថ៌កំបាំង ពេលរូបគេបានចូលទៅរកឃ្មុំក្នុងព្រៃ។

អាជ្ញាធរនៅតែកំពុងស្វែងរកយ៉ាងសកម្ម នៅក្នុងឃុំ Thanh Tan ស្រុក Nhu Thanh ខេត្ត Thanh Hoa។ លោក Huy Anh បានចែករំលែកថា ប្រជាជនបានប្រើប្រាស់យន្តហោះគ្មានមនុស្សបើក (ដ្រូន) ដើម្បីហោះហើរជុំវិញតំបន់នោះ ប៉ុន្តែរហូតមកដល់ពេលនេះ កន្លែងលាក់ខ្លួនរបស់ជនរងគ្រោះមិនត្រូវបានរកឃើញទេ។

Nghia Loi គឺជាឃុំមួយដែលមានព្រំប្រទល់ជាប់ឃុំ Thanh Tan នៃស្រុក Nhu Thanh (Thanh Hoa) ។ ហើយក្នុង​តំបន់​ជាប់​ព្រំដែន​នេះ​មាន​ព្រៃ​ជិត ១ ពាន់​ហិកតា។

លោក Huy Anh បាននិយាយថា “យើងកំពុងស្វែងរកក្នុងព្រៃ ក្នុងឃុំ Nghia Loi និង Thanh Tan រដ្ឋាភិបាលមូលដ្ឋានឃុំ Thanh Tan ក៏បានបញ្ជូនកម្លាំងទៅចូលរួមជួយរកផងដែរ។ ទោះជាយ៉ាងនេះក្តី ផ្ទៃដីព្រៃមានទំហំធំពេក ហើយអាកាសធាតុអាក្រក់ ធ្វើឲ្យការស្វែងរកមានការលំបាកនាពេលនេះ។ លោក Huy Anh ក៏បានឲ្យដឹង​ថា «មានអ្នក​ស្រុក​ម្នាក់​បាន​រាយការណ៍​ថា ពួក​គេ​បាន​ប្រទះ​ឃើញ​មនុស្ស​ស្រដៀង​នឹង​ការ​រៀបរាប់​នៅក្នុង​ព្រៃ ប៉ុន្តែ​បច្ចុប្បន្ន​គ្មាន​ដាន​អ្វី​ឡើយ»។

មុននោះនៅព្រឹកថ្ងៃទី១៤ ខែកញ្ញា យុវជនបាត់ខ្លួនឈ្មោះ Vi Van Nghia បានជិះម៉ូតូមួយគ្រឿងដឹកប្រអប់ស្នោពណ៌ស និងកាបូបស្ពាយពណ៌ខៀវងងឹត ចេញពីផ្ទះទៅស្រុក Nhu Thanh ដើម្បីស្វែងរកសំបុកឃ្មុំ។

លុះ​ដល់​ល្ងាច​ថ្ងៃ​ដដែល​ឈ្មោះ Nghia ពុំ​បាន​វិល​មក​ដូច​សព្វដង​ទេ គ្រួសារ​មានការ​ព្រួយបារម្ភ ក៏បាន​រាយការណ៍​ទៅ​សមត្ថកិច្ច​ឱ្យ​ជួយ​ស្រាវជ្រាវ។ ពេល​ទទួល​បាន​ដំណឹង​នេះ អាជ្ញាធរ​ឃុំបាន​ចុះ​ស្រាវជ្រាវ ហើយ​ទន្ទឹម​នឹង​នោះ​ក៏​បាន​ចេញ​សេចក្តី​ជូន​ដំណឹង​ឲ្យ​គ្រប់​គ្នាជួយ​ស្វែង​រកផងដែរ៕ រក្សាសិទ្ធិដោយ៖ លឹម ហុង