ប្រព័ន្ធផ្សព្វផ្សាយរដ្ឋរបស់ប្រទេសអ៊ីរ៉ាក់ បានរាយការណ៍កាលពីថ្ងៃពុធ (២៧ កញ្ញា) ថា អគ្គីភ័យបានឆាបឆេះភ្លាមៗនៅឯកន្លែងប្រារព្ធពិធីមង្គលការមួយក្នុងតំបន់ Hamdaniya នៃខេត្ត Nineveh ភាគខាងជើង ដែលបណ្តាលឱ្យមានអ្នកស្លាប់ និងរបួសយ៉ាងធ្ងន់ធ្ងរ។
Reuters បានដកស្រង់សម្តីលោក Hassan al-Allaq អភិបាលរងខេត្ត Nineveh ដែលបាននិយាយថា មនុស្ស ១១៣ នាក់ ត្រូវបានបញ្ជាក់ថាបានស្លាប់ ខណៈប្រព័ន្ធផ្សព្វផ្សាយរដ្ឋអ៊ីរ៉ាក់បាននិយាយថា ចំនួនអ្នកស្លាប់មានយ៉ាងហោចណាស់ ១០០ នាក់ និង ១៥០ នាក់ ផ្សេងទៀតរងរបួស។
ខ្សែវីដេអូដ៏រន្ធត់មួយ បានបង្ហាញពីទិដ្ឋភាពខណៈពេលដែលកូនកំលោះ និងកូនក្រមុំ កំពុងឱបគ្នា ស្រាប់តែភ្លាមៗនោះ បំណែកដុំភ្លើងដែលឆេះសន្ធោសន្ធៅ បានធ្លាក់ពីលើដំបូលជាបន្តបន្ទាប់ ហើយភ្ញៀវនៅកន្លែងកើតហេតុ បានរត់គេចចេញទាំងអ្នកខ្លះត្រូវរលាកភ្លើង។
ភ្នាក់ងារការពារស៊ីវិលក្នុងតំបន់ បាននិយាយថា មូលហេតុដែលបណ្តាលឲ្យភ្លើងបានឆាបឆេះពេញសាល គឺបន្ទាប់ពីកាំជ្រូចត្រូវបានដុត នៅក្នុងអំឡុងពេលប្រារព្ធពិធី។ ព័ត៌មានបឋមបានបញ្ជាក់ថា អគារមង្គលការធ្វើពីសម្ភារសំណង់ដែលងាយឆេះខ្លាំង ទើបបណ្តាលឱ្យបាក់រលំយ៉ាងឆាប់រហ័ស។
វីដេអូដែលថតនៅកន្លែងកើតហេតុ បានបង្ហាញពីក្រុមអ្នកពន្លត់អគ្គីភ័យ បានលូនតាមបំណែកបាក់បែកដែលកំពុងឆេះក្នុងអាគារ ដើម្បីស្វែងរកអ្នកនៅរស់រានមានជីវិត៕ រក្សាសិទ្ធិដោយ៖ លឹម ហុង
