កាលពីថ្ងៃទី២៦ ខែកញ្ញា ឆ្នាំ២០២៣ អគ្គីភ័យបានឆាបឆេះយ៉ាងធ្ងន់ធ្ងរនៅក្នុងពិធីមង្គលការមួយនៅស្រុក Al-Hamdaniya ខេត្ត Nineveh ភាគខាងជើងប្រទេសអ៊ីរ៉ាក់។ គេបានដឹងថា ខណៈពេលដែលភ្ញៀវ ៩០០ នាក់ និងកូនក្រមុំ-កូនកំលោះ កំពុងជប់លៀងយ៉ាងសប្បាយរីករាយនោះ អគ្គីភ័យដែលគេសង្ស័យថាបណ្តាលមកពីការដុតកាំជ្រួចអបអរ បានបង្កឲ្យឆាបឆេះ ហើយភ្លើងឆេះយ៉ាងសន្ធោសន្ធៅពេញសាលពិធីតែម្តង។
ថ្វីត្បិតតែរថយន្តពន្លត់អគ្គីភ័យត្រូវបានហៅភ្លាមៗទៅកាន់កន្លែងកើតហេតុក៏ដោយ ដោយសារតែភ្លើងបានរីករាលដាលលឿនពេក ឧបទ្ទវហេតុនេះបានធ្វើឱ្យមនុស្សយ៉ាងហោចណាស់ ២០០ នាក់បានរងរបួស និងបានសម្លាប់មនុស្ស ១១៤ នាក់ រួមទាំងកូនក្រមុំ និងកូនកំលោះផងដែរ។
មួយថ្ងៃក្រោយពេលកើតហេតុ គ្រួសារជនរងគ្រោះបានចាប់ផ្តើមរៀបចំពិធីបុណ្យសពជូនជនជនរងគ្រោះ។ សារព័ត៌មាន France24 បានរាយការណ៍ថា អ្នកកាន់ទុក្ខរាប់រយនាក់បានប្រមូលផ្តុំគ្នានៅទីបញ្ចុះសព ចម្ងាយជាងមួយម៉ាយល៍ភាគខាងជើងនៃទីក្រុង Qaraqosh និងនិយាយជាការលាគ្នាចុងក្រោយរបស់ពួកគេ ទៅកាន់ជនរងគ្រោះទាំងអស់ដែលបានស្លាប់ក្នុងគ្រោះអគ្គីភ័យនេះ។
ចែករំលែកអំពីសោកនាដកម្មនេះ បុរសអាយុ ៥០ ឆ្នាំម្នាក់ បាននិយាយថា “ខ្ញុំមិនមានអារម្មណ៍អ្វីទៀតទេ ពួកគេទាំងអស់គ្នាបានស្លាប់ហើយ។ មិនមានមនុស្សណាម្នាក់ ដែលមិនបានបាត់បង់សមាជិកនោះទេ។ នៅមុខផ្នូរគ្រួសារដែលមានទីតាំង នៅតាមដងផ្លូវក្នុងទីបញ្ចុះសព មនុស្សជាច្រើនមិនអាចគ្រប់គ្រងអារម្មណ៍របស់ពួកគេ និងស្រក់ទឹកភ្នែក អ្នកខ្លះមិនអាចឈរបាន”។
បន្ទាប់ពីបានដឹងមូលហេតុនៃអគ្គីភ័យនេះ កម្លាំងការពារស៊ីវិលបាននិយាយថា សាលទទួលភ្ញៀវនៃកន្លែងរៀបមង្គលការត្រូវបានដំឡើង ជាមួយនឹងបរិក្ខារគ្រឿងសំណង់ដែល “ងាយឆេះខ្លាំង និងផ្ទុយគ្មានស្តង់ដារសុវត្ថិភាព”។ ហេតុដូច្នេះហើយ វានឹងឆាបឆេះភ្លាមៗនៅពេលប៉ះនឹងកាំជ្រួច។ ភ្ញៀវដែលភ័យស្លន់ស្លោបានរត់ជាន់គ្នា ហើយមិនអាចគេចចេញពីសាលទាន់ពេលនោះទេ ដោយសារខ្វះច្រកចេញសង្គ្រោះបន្ទាន់៕ រក្សាសិទ្ធិដោយ៖ លឹម ហុង
