ពលករថៃ៦នាក់ ត្រូវបានគេរាយការណ៍ថាបានការស្លាប់នៅអ៊ីស្រាអែល បន្ទាប់ពីទាហានបានចុះទៅបោសសម្អាតតំបន់នោះ ហើយបានរកឃើញសាកសពរបស់ពួកគេ ដែលក្នុងនោះមាន៣នាក់ មកពីខេត្ត Udon Thani ខណៈពលរដ្ឋថៃជាងមួយពាន់នាក់ផ្សេងទៀត បានចុះហត្ថលេខាលើញត្តិឲ្យត្រឡប់ទៅប្រទេសថៃវិញ។
នេះបើតាមហ្វេសប៊ុករបស់ Anucha Nu ពលករថៃនៅអ៊ីស្រាអែល ដែលបង្ហោះសារកាន់ទុក្ខ បានបញ្ចាក់ថា ពលករថៃ ៦ នាក់ ដែលបានស្លាប់ក្នុងសង្គ្រាមរវាងក្រុមហាម៉ាសប៉ាឡេស្ទីន និងអ៊ីស្រាអែល បានកំពុងស្នាក់នៅ និងធ្វើការនៅ Kibus Kishufim ដែលស្ថិតនៅជាប់នឹងតំបន់ហ្គាហ្សាស្ទ្រីប។ បន្ទាប់ពីទាហានចុះទៅឈូសឆាយតំបន់នោះ ពួកគេបានរកឃើញកម្មករថៃទាំង៦នាក់ ដែលបានស្លាប់យ៉ាងអាណោចអាធ័ម។
ជាមួយគ្នានេះ ទំព័រហ្វេសប៊ុក Udon ក៏បានឲ្យដឹងថា ក្នុងចំណោមអ្នកស្លាប់ទាំង៦នាក់នោះ មាន៣នាក់ជាអ្នករស់នៅខេត្ត Udon Thani ម្នាក់ជាអ្នកភូមិ Nong Bua Daeng ឃុំ Nong Phai ស្រុក Nong Han និង២នាក់ទៀតជាអ្នកភូមិ Diam ឃុំឈៀងវេ ស្រុក Kumphawapi ខេត្ត Udon Thani។
បន្ទាប់មក គណនីហ្វេសប៊ុក Anucha Nu ក៏បានបង្ហាញឃ្លីបមួយ ដែលគាត់កំពុងលាក់ខ្លួននៅក្នុងផ្ទះគាត់ផងដែរ ខណៈសំឡេងគ្រាប់កាំភ្លើង បានផ្ទុះឡើងជាបន្តបន្ទាប់ ដោយមិនដឹងថាគ្រាប់នោះចេញពីខាងណានោះទេ ទាំងពេលថ្ងៃ និងពេលយប់។ ស្របពេលជាមួយគ្នានោះ ក៏មានមនុស្សម្នាបួងសួងឲ្យគាត់ឲ្យរួចផុតពីហេតុការណ៍ដ៏អាក្រក់នេះផងដែរ។
កន្លងមក Thai PBS បានរាយការណ៍ថា ស្ថានទូតថៃបានទទួលដំណឹងថា ប្រជាជនថៃ ១២ នាក់បានស្លាប់ ១១ នាក់ត្រូវបានចាប់ធ្វើជាចំណាប់ខ្មាំង និង ៨ នាក់បានរងរបួស ហើយបច្ចុប្បន្នកំពុងសម្រាកព្យាបាលនៅមន្ទីរពេទ្យ។ បច្ចុប្បន្ន អ៊ីស្រាអែលត្រូវបានគេចាត់ទុកថាកំពុងមានសង្រ្គាម បន្ទាប់ពីមានការវាយប្រហារដោយគ្រាប់រ៉ុក្កែតពីតំបន់ហ្គាហ្សា ហើយរដ្ឋាភិបាលអ៊ីស្រាអែលកំពុងព្យាយាមពន្លឿនការរឹតបន្តឹងតំបន់នេះ និងជួយសង្គ្រោះចំណាប់ខ្មាំង។ យ៉ាងហោចណាស់ ១០០ នាក់ក្នុងចំណោមជនស៊ីវិល ដែលត្រូវបានចាប់ខ្លួន គឺជនជាតិអ៊ីស្រាអែល មកពីបារាំង អាល្លឺម៉ង់ ហ្សកហ្ស៊ី និងថៃ។
ទោះជាយ៉ាងណា ក្នុងបញ្ជីឈ្មោះសាច់ញាតិអ្នកស្លាប់ ត្រូវតែទាក់ទង និងជូនដំណឹងរួចហើយ។ ប៉ុន្តែ អាជ្ញាធរអ៊ីស្រាអែល មិនអាចបញ្ជាក់ឈ្មោះបានទេ ហើយកងទ័ពអ៊ីស្រាអែល បានចាប់ផ្តើមជម្លៀសប្រជាជនថៃចេញពីតំបន់គ្រោះថ្នាក់ ទៅកាន់តំបន់ដែលមានសុវត្ថិភាពជាងមុន។ ចំណែកការធ្វើដំណើរត្រឡប់ទៅប្រទេសថៃវិញ កងទ័ពអាកាសនឹងជួយសម្រួលដល់យន្តហោះក្នុងបេសកកម្មជម្លៀសនេះ។
គួរបញ្ជាក់ថា មានប្រជាជនថៃចំនួន ៣០,០០០ នាក់ កំពុងរស់នៅ និងធ្វើការក្នុងប្រទេសអ៊ីស្រាអែល ក្នុងនោះ ៥,០០០ នាក់ នៅតំបន់ផ្ទុះសង្គ្រាមហ្គាហ្សាស្ទ្រីប ខណៈពលរដ្ឋថៃចំនួន ១.០៩៩ នាក់ បានបង្ហាញបំណងចង់ត្រឡប់ទៅប្រទេសថៃវិញ៕ រក្សាសិទ្ធិដោយ៖ លឹម ហុង
