ខេត្តព្រះសីហនុ ៖ អភិបាលខេត្តព្រះសីហនុ ឯកឧត្តម យន្ត មីន ថ្លែងក្នុងសន្និសីទសារព័ត៌មាន កាលពីព្រឹកថ្ងៃសុក្រ ទី២៦ ខែកក្កដា ឆ្នាំ២០១៨ នាសាលាខេត្តព្រះសីហនុ។ លោកបានបដិសេធថា មិនបានដឹងរឿង ការស្នើសុំដោះដូរទីតាំងស្នងការរដ្ឋាននគរបាលខេត្តព្រះសីហនុនោះទេ។
ឯកឧត្តមបន្តថា កន្លងមកនេះ មានអ្នកសួរនាំរូបលោកជុំវិញព័ត៌មាន នៃការដោះទីតាំងស្នងការដ្ឋាននគរបាលខេត្តព្រះសីហនុមួយចំនួនដែរ ប៉ុន្តែលោកមិនអាចឆ្លើយបានទេ ព្រោះលោកមិនបានដឹងរឿងនេះទាល់តែសោះ។
ទាក់ទិនបញ្ហានេះកន្លងមក មន្ត្រីនគរបាលថ្នាក់ទាប និងប្រជាពលរដ្ឋមួយចំនួន រស់នៅខេត្តព្រះសីហនុ បានរិះគន់ចំពោះអ្នកជាប់ពាក់ព័ន្ធ សកម្មភាពរត់ការដោះដូរដីទីតាំងស្នងការដ្ឋាននគរបាល ខេត្តព្រះសីហនុ ដែលនៅចំកណ្តាលក្រុង យកទៅដាក់ទីតាំងថ្មីនៅជាយក្រុង មានចម្ងាយផ្លូវប្រមាណ១៥គីឡូម៉ែត្រ ពីទីប្រជុំជនក្រុងព្រះសីហនុ។
ត្រង់ចំណុចនេះ ទាំងមន្ត្រីនគរបាល និងប្រជាពលរដ្ឋ មានឆ្ងល់ថា បើទីតាំងកម្លាំងសមត្ថកិច្ច សម្រាប់រក្សាការពារសន្តិសុខសណ្តាប់ធ្នាប់ ជូនប្រជាពលរដ្ឋ យកទៅដាក់ឆ្ងាយពីប្រជាពលរដ្ឋ ឬឆ្ងាយពីទីប្រជុំជន តើនៅពេលកើតមានបទល្មើស លួច ឆក់ ប្លន់ គ្រឿងញៀន និងហិង្សាផ្សេងៗ ឬអគ្គីភ័យកើតឡើង តើកម្លាំងសមត្ថកិច្ចអាច ចេញមកជួយធ្វើអន្តរាគមន៍ទាន់ពេលដែរឬទេ?
ផ្តើមពីបញ្ហានេះ មន្ត្រីនគរបាលថ្នាក់ទាប បានរអ៊ូរទាំថា ទីតាំងស្នងការថ្មី ដែលអាចមានចម្ងាយប្រមាណ ១៥គីឡូម៉ែត្រ ចេញពីទីក្រុង ហើយគួបផ្សំរាល់ថ្ងៃនេះ ចរាចរណ៍កកស្ទះផង ចុះបើមានបទល្មើសអ្វីមួយកើតឡើង មានដូចជា៖ បទល្មើសវាយកាប់គ្នា ចោរឆក់ប្លន់ ឬអគ្គីភ័យកើតឡើងជាដើម តើអាចចេញអន្តរាគមន៍ទាន់ពេលទេ..?។
ត្រង់ចំណុចនេះ ក្រុមមន្ត្រីនគរបាលមានឋានៈទាប និងប្រជាពលរដ្ឋមួយចំនួន រស់នៅខេត្តព្រះសីហនុ បានសំណូមពរដល់ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ជាពិសេស សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ឲ្យជួយអន្តរាគមន៍ទប់ស្កាត់ សកម្មភាពដោះដូរទីតាំងស្នងការនគរបាលខេត្តព្រះសីហនុ ទៅកាន់ទីតាំងថ្មី ដែលមានចម្ងាយប្រមាណ ១៥គីឡូម៉ែត្រ ឲ្យបានទាន់ពេល និងមានប្រសិទ្ធភាព ដោយអនុគ្រោះផង។
មន្ត្រីនគរបាលថ្នាក់ទាបមួយចំនួន បានឲ្យដឹងថា ពេលនេះទីតាំងស្នងការដ្ឋាននគរបាលខេត្តព្រះសីហនុ ដែលត្រៀមធ្វើការដោះដូរទៅកាន់ទីតាំងថ្មី គឺកំពុងស្នើសុំយោបល់ពីសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ពិនិត្យសម្រេចចុងក្រោយ។
នៅក្នុងលិខិតចុះថ្ងៃទី១៦ ខែមីនា ឆ្នាំ២០១៨ មានចុះហត្ថលេខា និងបោះត្រា ឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ ផ្ញើជូន សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានស្នើសុំគោលការដោះដូរអាគារស្នងការដ្ឋាននគរបាលខេត្តព្រះសីហនុ មានទីតាំងនៅភូមិ១ សង្កាត់៣ ខណ្ឌមិត្តភាព ខេត្តព្រះសីហនុ រួមមាន៖ អាគារការិយាល័យកណ្តាលសណ្តាប់ធ្នាប់, អាគារការិយាល័យកណ្តាលនគរបាលព្រហ្មទណ្ឌ និងអាគារកណ្តាលការិយាល័យកណ្តាលសន្តិសុខ នៃស្នងការដ្ឋាននគរបាលខេត្តព្រះសីហនុ និងស្នើសុំធ្វើប័ណ្ណកម្មសិទ្ធិមុនធ្វើការអភិវឌ្ឍន៍។
យ៉ាងណាក៏ដោយចុះ លោក ជួន ណារិន្ទ ស្នងការដ្ឋាននគរបាលខេត្តព្រះសីហនុ ក៏ធ្លាប់បានបំភ្លឺថា ទីតាំងស្នងការដ្ឋាននគរបាលខេត្តព្រះសីហនុ មិនមានការផ្លាស់ប្តូរទេ។
ទាក់ទិនការដោះដូរទីតាំងអាគារធ្វើការរដ្ឋនេះដែរ កន្លងមកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្លាប់បានរំលឹកជារឿយៗដល់មន្ត្រីស្ថាប័នពាក់ព័ន្ធក្រោមឱវាទ មិនឲ្យធ្វើការផ្លាស់ប្តូរទីតាំងអាគារធ្វើការរដ្ឋទៀតទេ ប៉ុន្តែបំរាមខាងលើនេះ នៅតែបន្តកើតមានជាដដែល ដោយតាមការកត់សម្គាល់ នៅមានមន្ត្រីក្រោមឱវាទ របស់សម្តេចតេជោ មួយចំនួនមិនយកត្រចៀកស្តាប់ និងមិនយកបំរាម របស់ប្រមុខដឹកនាំយកមកអនុវត្តតាមឲ្យមានប្រសិទ្ធិភាពឡើយ..៕ ដោយ ៖ ដែនសីមា
សូមអានលិខិតស្នើសុំដោះដូរទីតាំង អាគារស្នងការនគរបាលខេត្តព្រះសីហនុ ដែលឯកឧត្តមឧត្តមសេនីយ៍ នេត សាវឿន អគ្គស្នងការនគរបាលជាតិ ផ្ញើជូនសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ពិនិត្យកាលពីថ្ងៃទី១៦ ខែមីនា ឆ្នាំ២០១៨៖
