លោក Ashutosh Mahashabde ប្រធានការិយាល័យស្រាវជ្រាវបុរាណវិទ្យានៃប្រទេសឥណ្ឌា (ASI) នៅ Indore បាននិយាយថា កាក់មាសដែលបានរកឃើញនៅក្រោមផ្ទះមួយក្នុងសង្កាត់ Dhar នៃ Madhya Pradesh ហាក់ដូចជាមានអាយុកាលរហូតដល់ ២០០ ឆ្នាំ។
ទាក់ទិននឹងករណីដ៏ភ្ញាក់ផ្អើលនេះ គេបានឲ្យដឹងថា កម្មករសំណង់ចំនួន ៨ នាក់ បានចូលរួមជីកកកាយដីនៅ Madhya Pradesh ដែលមានទំហំ ៧៩២ ម៉ែត្រការ៉េ នៅទីក្រុង Dhar កាលពីថ្ងៃទី១៩ និង ២១ ខែសីហា កន្លងទៅ ដើម្បីសាងសង់ផ្ទះ។ ជាធម្មតា ពួកគេបានប្រើអេស្កាវ៉ាទ័រ ដើម្បីជីកដី ប៉ុន្តែមានរឿងនឹកស្មានមិនដល់ ធ្វើឲ្យការងារត្រូវផ្អាក នោះគឺពួកគេបានប្រទះឃើញប្រអប់ដែកមួយពោរពេញទៅដោយវត្ថុមាស ហើយគ្រប់គ្នាមិនអាចធ្វើអ្វីបាន ក្រៅពីមានការភ្ញាក់ផ្អើល លាយឡំជាមួយការសង្ស័យ។
នៅក្នុងប្រអប់នោះ គេបានរាប់កាក់មាសសរុបចំនួន ៨៤ កាក់ និងគ្រឿងអលង្ការមាសសុទ្ធមួយចំនួន ហើយពួកគេថែមទាំងខាំវាដើម្បីបញ្ជាក់។ ពួកគេមិនបញ្ឈប់សកម្មភាពទេ ដោយបានបន្តជីកបន្ថែមទៀត ហើយបានរកឃើញដុំមាសធំៗចំនួនពីរ នៅមិនឆ្ងាយពីកន្លែងដើម។
ទោះជាយ៉ាងណា ជំនួសឱ្យការរាយការណ៍ពីឧប្បត្តិហេតុនេះទៅរដ្ឋអំណាចក្នុងតំបន់ ឬប៉ូលីស កម្មករមួយក្រុមនេះបានសម្រេចចិត្តបែងចែកវាស្មើៗគ្នា ហើយយកកំណប់ទ្រព្យដែលមិនស្គាល់ប្រភពដើមទាំងនេះទៅផ្ទះដើម្បីរក្សាទុក។
ពួកគេបានគិតថា ករណីនេះនឹងត្រូវលាក់បាំង ប៉ុន្តែនៅដើមសប្តាហ៍ក្រោយ ប៉ូលិសបានមកដល់ដើម្បីស្រាវជ្រាវ និងចេញដីកាចាប់ខ្លួនក្រុមកម្មករសំណង់ទាំងនោះ។ នោះគឺដោយសារតែកម្មករម្នាក់ក្នុងចំណោម ៨ នាក់ បានលក់កាក់មាសដើម្បីលុបបំណុលរបស់គាត់ចំនួន 56,000 រូពី ហើយបន្ទាប់មក គាត់ថែមទាំងបានប្រារព្ធពិធីជប់លៀងជាមួយក្រុមគ្រួសារអ្នកជិតខាង និងមិត្តភក្តិ ដោយសារតែសំណាងនេះបានធ្លាក់ពីលើមេឃ។ ប៉ុន្តែ ការអួតអាងនេះ ដែលនាំឲ្យមានរឿងអាស្រូវ ទាក់ទាញការចាប់អារម្មណ៍ពីគ្រប់ៗគ្នា និងធ្វើឱ្យប៉ូលីសស៊ើបអង្កេតតែម្តង។
ប៉ូលិសបាននិយាយថា ពួកគេបានរកឃើញកាក់មាសចំនួន ៨៣ កាក់ និងមាស ២ ដុំ។ ក្រោយមក វត្ថុទាំងនោះត្រូវបានផ្ទេរទៅការិយាល័យស្រាវជ្រាវបុរាណវិទ្យានៃប្រទេសឥណ្ឌា (ASI), Indore សម្រាប់ការស៊ើបអង្កេត ដើម្បីរកប្រភពដើមរបស់កំណប់ទ្រព្យកាក់មាសទាំងនោះ។
លោក Ashutosh Mahashabde ប្រធានការិយាល័យ Indore របស់ ASI បាននិយាយថា កាក់មាសនេះត្រូវបានសន្និដ្ឋានថាមានអាយុកាល ២០០ ឆ្នាំ ។ ទោះជាយ៉ាងនេះក្តី លោក Mahashabde បានសង្កត់ធ្ងន់ថា វាគ្រាន់តែជាការទស្សន៍ទាយប៉ុណ្ណោះ ពួកគេនៅតែស្នើឱ្យអ្នកជំនាញស្តារ និងអានសិលាចារឹកនៅលើកាក់ ដើម្បីវាយតម្លៃអាយុកាល។
ASI ក៏បានចាប់ផ្តើមជីកកកាយនៅដីខាងលើ ដើម្បីស្វែងរកកំណប់ទ្រព្យផ្សេងទៀតដែលវាអាចរកបាននៅក្នុងដីនោះ។ Tehsildar Vinod Rathod និងអគ្គនាយកបន្ថែមនៃប៉ូលីស Devendra Patidar ត្រូវបានចាត់តាំងឱ្យដឹកនាំការស្វែងរកកាក់ដែលមិនទាន់ត្រូវបានរកឃើញ។
លោក Shivnarayan Rathod ម្ចាស់ផ្ទះទ្រុឌទ្រោមដែលរុះរើដើម្បីសាងសង់ថ្មី បានប្រាប់ប៉ូលីសថា គ្រួសាររបស់គាត់បានរស់នៅក្នុងផ្ទះនេះជាច្រើនឆ្នាំមកហើយៗ គ្រួសាររបស់គាត់មិនមានទ្រព្យសម្បត្តិលាក់កំបាំងទេ។
យោងតាមច្បាប់រតនវត្ថុឆ្នាំ 1878 របស់ឥណ្ឌា អ្នកណាម្នាក់ដែលរកឃើញកំណប់ទ្រព្យមានតម្លៃដ៏អស្ចារ្យ គឺត្រូវតែជូនដំណឹងដល់អាជ្ញាធរក្នុងតំបន់។ អ្នកស្វែងរកក៏ត្រូវប្រគល់វត្ថុនោះទៅមន្ត្រីមូលដ្ឋាន ឬប្តេជ្ញាថានឹងបង្ហាញវាទៅអាជ្ញាធរនៅពេលមានការស្នើសុំ។ រដ្ឋាភិបាលមានសិទ្ធិក្នុងការទិញយកទ្រព្យសម្បត្តិមកវិញ នៅពេលទូទាត់តម្លៃរបស់វា និងជូនបុព្វលាភ (រង្វាន់) ២០% ផងដែរ៕ រក្សាសិទ្ធិដោយ៖ លឹម ហុង
