រដ្ឋអំណាចខេត្តជាងស៊ូ ចាត់ទុកបទកំណត់ “មានតែបូជា” សពទើបអាចធានាបានធនធានដី ប៉ុន្តែគោលការណ៍នេះ បានរងទទួលនូវការរិះគន់យ៉ាងធ្ងន់ធ្ងរ ពីសំណាក់ពលរដ្ឋ និងប្រព័ន្ធផ្សព្វផ្សាយមជ្ឈឹម ។
យុទ្ធនាការមួយនៅខេត្តជាងស៊ូ ភាគអាគ្នេយ៍ប្រទេសចិន ដែលហាមឃាត់មិនឲ្យសាច់ញាតិ បញ្ចុះសពបងប្អូនដែលបានអនិច្ចកម្ម និងបានរឹបអូស ឬកម្ទេចចោលមឈូស ញ៉ាំងឲ្យពលរដ្ឋក្នុងតំបន់ផ្ទុះកំហឹង ហើយប្រព័ន្ធផ្សព្វផ្សាយបានហៅទង្វើនេះថា “មិនធម្មតា និងព្រៃផ្សៃ” ។
មឈូសជាច្រើន របស់ពលរដ្ឋត្រូវរឹបអូស និងកម្ទេចចោល ។
គោលនយោបាយ ដែលបង្កប់អត្ថន័យអភិរក្សធនធានដីនេះ ត្រូវបានប្រកាស ៦ខែមុន ហើយបាន “ជ្រុលហួសហេតុ” គ្រាដែលក្រុមគ្រួសារក្រីក្រ ត្រូវចំណាយពេលវេលា ច្រើនដើម្បីសន្សំលុយទិញទុកបាននោះ បានត្រូវគេរឹបអូស ឬកម្ទេចចោលតែម្តង ។ ទីក្រុងជាច្រើននៅជាងស៊ូ ដាក់កំហិតត្រឹមខែកញ្ញា គឺ “គ្មានកប់ទេ មានតែបូជា” ប៉ុណ្ណោះ ។ រីឯការផលិតមឈូសក៏ត្រូវបញ្ចប់ ។ មានតែមូលដ្ឋានមួយប៉ុណ្ណោះ ដែលអនុវត្តគោលការណ៍ សងប្រាក់ ២៩០ USD សម្រាប់ការស្ម័គ្រចិត្ត យកមឈូសមកប្រគល់ឲ្យរដ្ឋអំណាច ។
តាម SCMP ទោះបីយូរយារមកហើយ ដែលចិនមានប្រពៃណីពីការយកមឈូសមកទុកក្នុងផ្ទះសម្រាប់មនុស្សចាស់ៗ ដើម្បីមានអាយុវែង!។ ហេតុនេះ ពួកគេភាគច្រើន បានប្រឹងរឹតត្បិតការចាយវាយដើម្បីទិញមឈូសទុកឲ្យជីតា ជីដូន ឬឪពុកម្តាយ ឥឡូវសុខៗស្រាប់តែរឹបអូសយក ឬកម្ទេចចោលទៀត ។
ប្រព័ន្ធផ្សព្វផ្សាយធំៗនៅមជ្ឈិម បានលើកឡើងថា ៖ គប្បីបន្សល់ណែនាំ រួមទាំងមានការទូទាត់សងពលរដ្ឋឲ្យបានត្រឹមត្រូវ ធ្វើឲ្យគេយល់ គេស្ម័គ្រចិត្ត ពុំគួរប្រើអំណាចចាប់បង្ខំឲ្យពួកគេផ្ទុះកំហឹងរងរបួសផ្លូវចិត្តយ៉ាងនេះសោះ ៕ ចន្ទ្រា