ទីភ្នាក់ងារសារព័ត៌មានបរទេស បានរាយការណ៍ថា ឧបទ្ទវហេតុមួយបានកើតឡើងនៅក្នុងប្រទេសជប៉ុនទៀតហើយ គឺនៅពេលដែលយន្តហោះរបស់ក្រុមហ៊ុនអាកាសចរណ៍ Korean Air បានបុកជាមួយយន្តហោះ Cathay Pacific នៅអាកាសយានដ្ឋាន New Chitose នៅលើកោះហុកកៃដូ ភាគខាងជើងប្រទេសនេះ កាលពីវេលាម៉ោងប្រហែល ៥ និង ៥០ នាទី ល្ងាចនៅថ្ងៃអង្គារ ទី១៦ ខែមករា ឆ្នាំ២០២៤។
Korean Air មានអ្នកដំណើរ និងរួមទាំងនាវិកចំនួន ២៨៩ នាក់ ចំណែកយន្តហោះ Cathay Pacific មិនមានអ្នកដំណើរទេ។ មន្ត្រីក្រុមហ៊ុនអាកាសចរណ៍បាននិយាយថា គ្រោះថ្នាក់នេះបានកើតឡើងដោយសារតែរថយន្តទួរីសមួយគ្រឿង បានរុញយន្តហោះ Korean Air ថយក្រោយលើផ្លូវតាក់ស៊ី។ បន្ទាប់មក វាបានរអិលលើព្រិល បណ្តាលឱ្យស្លាបខាងឆ្វេងនៃយន្តហោះ បុកជាមួយស្លាបកន្ទុយខាងស្តាំនៃយន្តហោះ Cathay Pacific ។ ទោះជាយ៉ាងណា របាយការណ៍បឋមបានឲ្យដឹងថា ពុំមានមនុស្សរងរបួសក្នុងគ្រោះថ្នាក់នេះទេ។
គួររម្លឹកថា កាលពីថ្ងៃទី០២ ខែមករា ឆ្នាំ២០២៤ កន្លងទៅថ្មីៗនេះ ប្រទេសជប៉ុន ទើបតែបានកើតមានឧបទ្ទវហេតុធ្ងន់ធ្ងរមួយ គឺនៅពេលដែល Japan Airlines (JAL) Flight 516 បានបុកជាមួយយន្តហោះឆ្មាំឆ្នេរសមុទ្រជប៉ុននៅលើផ្លូវរត់ដូចគ្នា នៅអាកាសយានដ្ឋាន Haneda ក្នុងទីក្រុងតូក្យូ ដែលបណ្តាលឱ្យយន្តហោះទាំងពីរឆេះ និងសមាជិកនាវិក ៥ នាក់ នៅលើយន្តហោះឆ្មាំឆ្នេរសមុទ្របានស្លាប់ ហើយអ្នកបើកបរម្នាក់បានរួចជីវិត ប៉ុន្តែបានរងរបួសយ៉ាងធ្ងន់ធ្ងរ។
អ្នកដំណើរ និងនាវិកទាំងអស់ ៣៧៩ នាក់ នៅលើយន្តហោះរបស់ Japan Airlines មានសុវត្ថិភាព និងអាចជម្លៀសចេញពីយន្តហោះបានទាន់ពេលវេលាផងដែរ៕ រក្សាសិទ្ធិដោយ៖ លឹម ហុង
