ទារកម្នាក់បាននៅមានជីវិតដ៏អស្ចារ្យ នៅក្នុងគ្រោះថ្នាក់ក្រឡាប់រថយន្តយ៉ាងសាហាវ ដែលបណ្តាលឲ្យទារិការនេះត្រូវ «ខ្ទាចចេញ» ពីស្បូនម្តាយរបស់នាង និងផ្លោងទៅលើវាលស្មៅ ។
យោងតាមប្រភពព័ត៌មានបានឲ្យដឹងថា ស្ត្រីមានផ្ទៃពោះគ្រប់ខែម្នាក់ បានកំពុងធ្វើដំណើរនៅក្នុងរថយន្តដឹកក្តារឈើ ។ អ្នកបើកបរបានបាត់បង់ម្ចាស់ការ បណ្តាលឲ្យរថយន្តក្រឡប់ផ្ងារជើងនៅលើផ្លូវហាយវេជិត Cajati រវាង Sao Paulo និង Curitiba នៅភាគខាងត្បូងនៃប្រទេសប្រេស៊ីល ។
លទ្ធផលនៃការប៉ះទង្គិចដ៏ធ្ងន់ធ្ងរនេះ ស្ត្រីមានផ្ទៃពោះត្រូវបានគ្រវែងពីក្នុងកាប៊ីនរថយន្ត មុនពេលត្រូវបានសង្កត់ដោយគំនរក្តារឈើដែលផ្ទុកនៅលើរថយន្ត ។
យោងតាមរបាយការណ៍ព័ត៌មាន ករណីដ៏រន្ធត់នេះបានបំបែកទារកចេញពីស្បូនម្តាយ ដែលធ្វើឲ្យក្រុមគ្រូពេទ្យភ្ញាក់ផ្អើលយ៉ាងខ្លាំង នៅពេលរកឃើញទារកស្រីម្នាក់កំពុងស្រែកយំនៅលើវាលស្មៅ ចម្ងាយប៉ុន្មានម៉ែត្រពីម្តាយ ។
ទារិការនោះត្រូវបានរកឃើញពុំមានស្នាមកោសអ្វីនៅលើខ្លួននាងទេ ហើយទងផ្ចិតរបស់នាងត្រូវបានផ្តាច់ដោយសារគ្រោះថ្នាក់នេះ ។ បច្ចុប្បន្ន ទារិការនេះកំពុងត្រូវបានព្យាបាលក្នុងផ្នែកសង្គ្រោះបន្ទាន់នៃមន្ទីរពេទ្យ Pariquera-Acu ។
សូមបញ្ជាក់ថា ម្តាយរបស់នាងត្រូវបានដឹងថាបានកំពុងមានផ្ទៃពោះ ៣៩ សប្តាហ៍ ហើយ ។ ប៉ុន្តែ គួរឲ្យសោកស្តាយ ដែលនាងបានស្លាប់បាត់ជីវិត នៅក្នុងហេតុការណ៍គ្រោះថ្នាក់ចរាចរណ៍រថយន្តដ៏រន្ធត់នេះ ។
អ្នកបើកបរត្រូវបានចោទប្រកាន់ពីបទមនុស្សឃាត បន្ទាប់ពីបានបង្កកើតហេតុការណ៍នេះ ៕ ឧត្តម (news.asiantown)
