ភ្នំពេញ ៖ បុរសម្នាក់បានបើករថយន្តម៉ាក FORD TERRITORY មួយគ្រឿង ក្នុងល្បឿនលឿនខ្វះការប្រុងប្រយ័ត្ន ក៏បានរេចង្កូតទៅបុករបាំងថ្មពុះចែកទ្រូងផ្លូវខូចខាតអស់មួយកង់ ចំណែករថយន្តបាក់កាឡេកង់មុខចំហៀងខាងឆ្វេងខូចខាតយ៉ាងដំណំ។
ហេតុការណ៍គ្រោះថ្នាក់ចរាចរណ៍ខាងលើនេះដែរ បានកើតឡើងកាលពីវេលាម៉ោង ១០និង ៣០នាទីយប់ថ្ងៃទី៣១ខែមករាឆ្នាំ ២០២៤ ស្ថិតនៅលើផ្លូវឧកញ៉ាម៉ុងរិទ្ធី ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
បើយោងតាមប្រភពពីកន្លែងកើតហេតុបានប្រាប់ឲ្យដឹងថា នៅមុនកើតហេតុគេឃើញរថយន្តមួយគ្រឿងម៉ាក FORD TERRITORYពណ៌សពាក់ផ្លាកលេខ កម្ពុជា KMD.7007 បើកបរដោយបុរសម្នាក់ធ្វើដំណើរ
តាមបណ្ដោយផ្លូវឧកញ៉ាម៉ុងឬទ្ធី ក្នុងទិសដៅពីលិចមកកើតក្នុងល្បឿនលឿន ខណៈពេលបើកមកដល់ចំណុចកើតហេតុខាងលើ មិនបានប្រយ័ត្នក៏រ៉េចង្កូតទៅបុកនិងរបាំងថ្មពុះចែកទ្រូងផ្លូវពេញទំហឹង បណ្តាលឲ្យបាក់ចំនួនមួយកង់ វៀចចេញពីកន្លែងដើមរងការខូចខាត ចំណែករថយន្តបង្កវិញ បានបាក់កាឡេកង់ខាងឆ្វេងផ្នែកខាងមុខខូចខាត យ៉ាងដំណំ សំណាងល្អមិនបង្កឲ្យប៉ះពាល់ទៅដល់មនុស្ស។ ក្រោយមកក៏មានប្រជាពលរដ្ឋធ្វើដំណើរ ឆ្លងកាត់បានរាយការណ៍ទៅសមត្ថកិច្ចមូលដ្ឋានប៉ុស្តិ៍នគរបាលភ្នំពេញថ្មី ឲ្យចុះមកទីតាំងកើតហេតុភា្លមៗផងដែរ៕ រក្សាសិទ្ធដោយ ៖សាមេត
