កម្ពុជា មានរោងចក្រធុនធំបថ្មីចំនួន ២៨១រោងចក្រ ក្នុងឆ្នាំ២០២៣ ដែលមានទុនវិនិយោគជាង ១,៨​ពាន់​លានដុល្លារ

ភ្នំពេញ៖ របាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងថា រោងចក្រធុនធំចំនួន ២៤១រោងចក្រ ត្រូវបានបង្កើតថ្មី នៅឆ្នាំ២០២៣នៅកម្ពុជា ក្នុងតម្លៃទុនវិនិយោគសរុបប្រមាណ ១.៨៧៥​លានដុល្លារអាមេរិក ដែលតួលេខនេះ ធ្វើឲ្យចំនួនរោងចក្រធុនធំសរុបនាពេលបច្ចុប្បន្ន កើនដល់ ២.១២៥រោងចក្រ នៅទូទាំងប្រទេសកម្ពុជា ដែលមានតម្លៃទុនវិនិយោគសរុបប្រមាណ ១៨,៥៦ពាន់លានដុល្លារអាមេរិក។

រោងចក្រធុនធំ ទាំងនោះរួមមាន៖ រោងចក្រផ្គុំ និងដំឡើងរថយន្ត រោងចក្រផលិតគ្រឿងអេឡិចត្រូនិក រោងចក្រផលិតស៊ីម៉ង់ត៍ រោងចក្រផលិតបរិក្ខាអគ្គិសនី រោងកច្រផលិតបន្ទះសូឡា និងរោងចក្រផលិតសំបកកង់រថយន្ត ជាដើម។

ការទាក់ទាញឧស្សាហកម្មធុនធ្ងន់ ជាអ្វីដែលរាជរដ្ឋាភិបាលកម្ពុជា ចង់បានយ៉ាងខ្លាំង ដើម្បីឆ្ពោះទៅសម្រេចគោលដៅប្រែក្លាយកម្ពុជា ទៅជាប្រទេសមានចំណូលធម្យមកម្រិតខ្ពស់នៅឆ្នាំ ២០៣០ និងប្រទេសមានចំណូលខ្ពស់នៅឆ្នាំ ២០៥០។វត្តមានរោងចក្រទាំងនេះ បានបង្កើតការងាររាប់សែនកន្លែងជូនដល់ប្រជាពលរដ្ឋ ជាមួយការផ្តល់ប្រាក់ចំណូលសម្រាប់ជួយដល់សេដ្ឋកិច្ចគ្រួសារ និងសេដ្ឋកិច្ចជាតិ។

យោងតាមក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថា នៅឆ្នាំ ២០២៣ កម្ពុជា បានអនុម័តលើគម្រោង​វិនិយោគសរុបចំនួន ២៦៨គម្រោង ដែលមានទុនវិនិយោគសរុប ៤,៩ប៊ីលានដុល្លារអាមេរិក កើនឡើង ២២% បើធៀបឆ្នាំ ២០២២។

យោងតាមរបាយការណ៍លទ្ធផលចុងក្រោយនៃជំរឿនសេដ្ឋកិច្ចនៅព្រះរាជាណាចក្រកម្ពុជា ឆ្នាំ ២០២២ បានឲ្យដឹងថា នៅប្រទេសកម្ពុជា មានអង្គភាពសេដ្ឋកិច្ចសរុបទូទាំងប្រទេសប្រមា ណជាង ៧៥ម៉ឺនសហគ្រាស/អាជីវកម្ម ដែលអាចបង្កើតការងារបានប្រមាណ ២,៩៨លាននាក់។ ក្នុងនោះអង្គភាពសេដ្ឋកិច្ចខ្នាតធំ មានប្រមាណ ២១៦៥សហគ្រាស ដែលអាចបង្កើតការងារបានរហូតដល់ទៅ ១,៨៧លាននាក់ ស្មើនឹងជាង ៦២% នៃការងារសរុប។

របាយការណ៍នេះបានកត់សម្គាល់ឃើញថា ចំពោះសហគ្រាសសេដ្ឋកិច្ចខ្នាតធំភាគច្រើនប្រមូលផ្តុំនៅរាជធានីភ្នំពេញ ដែលមានរហូតដល់ជិត ៩០០សហគ្រាស បន្ទាប់មកខេត្តកណ្តាលជាង ២០០សហគ្រាស តាមពីក្រោយដោយកំពង់ស្ពឺមានជាង ១០០សហគ្រាស ខេត្តព្រះសីហនុជាង ១០០កសហគ្រាស ខេត្តស្វាយរៀង ជាង ១០០សហគ្រាស និងខេត្តតាកែវ មានជិត ១០០សហគ្រាស៕