នេះជារឿងគួរឲ្យភ្ញាក់ផ្អើល និងគួរឲ្យអស់សំណើចមួយ ខណៈដែលស្ត្រីម្នាក់បានគ្រប់គ្រងផ្តួលចោរស្រវឹងម្នាក់ទៅនឹងដីពុំអាចរើរួច បន្ទាប់ពីបុរសរូបនេះបានឆក់កាបូបរបស់នាង ។
យោងតាមប្រភពព័ត៌មានបានឲ្យដឹងថា ស្ត្រីម្នាក់រស់នៅក្នុងទីក្រុង Kirov ប្រទេសរុស្ស៊ី បានរុញចោរម្នាក់ផ្ទប់ទៅនឹងដី និងឡើងជិះសង្កត់ជាប់តែម្តង រហូតទាល់តែប៉ូលីសមកដល់អន្តរាគមន៍ ។
ស្ត្រីរងគ្រោះបានប្រាប់ប៉ូលីសថា បុរសស្រវឹងម្នាក់បានដេញតាមនាង និងបានឆក់យកកាបូបរបស់នាង ហើយរត់ចេញយ៉ាងលឿន ប៉ុន្តែ នៅពេលនោះ នាងក៏បានរត់ដេញតាមប្រផិតប្រផើយ រហូតធ្វើឲ្យបុរសស្រវឹងរូបនេះដង្ហក់ខ្យល់រត់លេងរួច ។ ស្ត្រីរងគ្រោះដែលជាម្ចាស់កាបូប បន្ទាប់មក ក៏បានចាប់វាយផ្តួលចោររូបនេះទៅនឹងដីតែម្តង ។
នៅក្នុងវីដេអូឃ្លីប ស្ត្រីរងគ្រោះបានពោបជិះពីលើជាប់ ខណៈក្បាលរបស់ចោរត្រូវផ្ទប់នឹងដី និងដៃក៏ត្រូវព័ទ្ធទៅក្រោយយ៉ាងវេទនា ។ ក្មេងប្រុសជំទង់ម្នាក់ ត្រូវបានឃើញយកទឹក១កែវ ចាក់ពីលើក្បាលចោរ រួចឲ្យស្ត្រីរងគ្រោះផឹក ។ នាងបន្ទាប់មក ក៏បានបង្ខំឲ្យចោរនោះផឹកទឹក និងស៊ីដី ។
ទោះយ៉ាងណា មួយសន្ទុះក្រោយមក ប៉ូលីសក៏បានមកដល់កន្លែងកើតហេតុ និងចាប់ចោរស្រវឹងរូបនេះដាក់ខ្នោះ រួចរុញចូលក្នុងរថយន្តដឹកចេញទៅ ។ ពួកអ្នកភូមិនៅក្នុងតំបន់ ក៏បានសាទរយ៉ាងខ្លាំង ចំពោះសកម្មភាពដ៏ក្លាហានរបស់នាង ៕ ឧត្តម
