លំហូរ​អ្នក​ធ្វើ​ដំណើរ​ឆ្លង​កាត់​អាកាសយានដ្ឋាន​សៀមរាប​អង្គរ ក្នុងមួយ​ថ្ងៃ​មាន​ជើង​ហោះហើរ​ទាំង​ឡើង​ទាំង​ចុះ ​ជាង ៥០ ជើង

អាកាសយានដ្ឋាន​សៀមរាប​​អង្គរ បាន​បើក​ដំណើរការ​ជា​ផ្លូវ​កាលពី​ខែ​តុលា ឆ្នាំ ២០២៣ ​​វិនិយោគ​​ជាង ១៣០០ លាន​ដុល្លារ។ អាកាសយានដ្ឋាន​ថ្មី​នេះ​ មាន​ទីតាំង​ស្ថិត​នៅ​ស្រុក​សូទ្រនិគម​ មាន​ចម្ងាយ​ជាង ៥០ គីឡូម៉ែត្រ​ពី​ក្រុង​សៀមរាប ជា​ព្រលាន​យន្តហោះ​កម្រិត​ 4E ដែល​អាច​ទទួល​យន្តហោះ​ឆ្លង​ទ្វីបចុះចត​បាន​។

មន្រ្តី​សម្របសម្រួល​នៅ​អាកាសយានដ្ឋាន​សៀមរាប​អង្គរ បាន​ឲ្យ​ដឹង​ថា លំហូរ​អ្នក​ធ្វើ​ដំណើរ​ឆ្លង​កាត់​អាកាសយានដ្ឋាន​សៀមរាប​អង្គរមួយ​ថ្ងៃ​មាន​ជាង ៥០០០នាក់ ​ចំនួន​ជើង​ហោះហើរ​ទាំង​ឡើង​ទាំង​ចុះ ​មាន​ជាង ៥០ ជើង ខណៈបច្ចុប្បន្ន មាន​ក្រុមហ៊ុន​អាកាសចរ​ណ៍​ចំនួន ១១ បាន​ភ្ជាប់​ការ​ហោះហើរ​ មក​អាកាសយានដ្ឋាន​​សៀមរាប​អង្គរ​ថ្មី​។

លោក យឹម សានីរាន មន្រ្តី​សម្របសម្រួល​នៅ​អាកាសយានដ្ឋាន​សៀមរាប​អង្គរ​ បាន​ឲ្យ​កម្ពុជា​ថ្មី​ដឹង​ថា ក្រុមហ៊ុន​អាកាសចរ​ណ៍​ទាំង ១១នោះ ​មានដូចជា ក្រុមហ៊ុន China Eastern Airlines (MU) ក្រុមហ៊ុន Cambodia Angkor Air (K6) ក្រុមហ៊ុន Vietnam Airlines (VN) ក្រុមហ៊ុន Singapore Airlines (SQ) ក្រុមហ៊ុន Malaysia AirAsia (AK) ក្រុមហ៊ុន Thai AirAsia (FD) ក្រុមហ៊ុន Thai Airways (TG) ក្រុមហ៊ុន Bangkok Airways (PG) ក្រុមហ៊ុន Lao Airlines (QV) ក្រុមហ៊ុន Vietjet Air (VJ) ក្រុមហ៊ុន Sky Angkor Airlines (ZA)។

គួរបញ្ជាក់ថា ជាមួយ​គ្នា​នេះ មាន​ទីក្រុង​ចំនួន ១៥ ដែល​បាន​តភ្ជាប់​ជើង​ហោះហើរ​មក​អាកាសយានដ្ឋាន​សៀមរាប​អង្គរ ​មាន​ទីក្រុង​គុនមីង (ប្រទេស​ចិន) ទី​ក្រុង​ភ្នំពេញ និង​ក្រុងព្រះសីហនុ (ប្រទេស​កម្ពុជា) ទីក្រុង​ប៉ាក់សេ និង​ហ្លួងព្រះបាង (ប្រទេស​ឡាវ) ទីក្រុង​កូឡាឡាំពួរ (ប្រទេស​ម៉ាឡេស៊ី) ទីក្រុង​បាងកក​ (ប្រទេស​ថៃ) ទីក្រុង​សិង្ហបុរី (ប្រទេស​សិង្ហបុរី) ទីក្រុង​​ហូជីមីញ ហាណូយ ដាណាង (ប្រទេស​វៀតណាម) ទីក្រុង​អីងជុន ដេគូ ប៊ូសាន និងម៉ូន (ប្រទេស​កូរ៉េ​ខាង​ត្បូង)៕