ភ្នំពេញ ៖ នៅព្រឹកថ្ងៃទី១១ ខែមិថុនា ឆ្នាំ២០២៤នេះ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានអញ្ជើញជាអធិបតីភាពដឹកនាំកិច្ចប្រជុំឆ្លងសេចក្ដីព្រាងសេចក្ដីណែនាំ ស្ដីពីការកំណត់របៀបរបបនៃការធ្វើចំណាត់ការលិខិតស្នាម ឬឯកសាររដ្ឋបាល របស់អគ្គស្នងការដ្ឋាននគរបាលជាតិ។ កិច្ចប្រជុំនេះ ត្រូវបានប្រព្រឹត្តទៅនៅទីស្ដីការក្រសួងមហាផ្ទៃ ដោយមានការចូលរួមពីអគ្គស្នងការរង, ប្រធាននាយកដ្ឋានកណ្ដាល, ប្រធាននាយកដ្ឋានរដ្ឋបាលទូទៅ និងប្រធានលេខាធិការដ្ឋាន។នេះបើតាមការចេញផ្សាយព័ត៌មាន របស់អគ្គស្នងការដ្ឋាននគរបាលជាតិ។
កិច្ចប្រជុំនេះ ធ្វើឡើងដើម្បីកំណត់របៀបរបប នៃការធ្វើចំណាត់ការលិខិតស្នាម ឬឯកសាររដ្ឋបាល និងដើម្បីពង្រឹងរបៀបរបបនៃការបែងចែក និងការធ្វើចរាចរណ៍លិខិតស្នាម ឬឯកសាររដ្ឋបាល នៅក្នុងក្របខណ្ឌរបស់អគ្គស្នងការដ្ឋាននគរបាលជាតិ ឲ្យកាន់តែស៊ីចង្វាក់ និងប្រកបដោយប្រសិទ្ធភាព សំដៅឆ្លើយតបចំពោះសំណូមពរក្នុងការចង្អុលដឹកនាំអគ្គស្នងការដ្ឋាននគរបាលជាតិ។
ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានឡើងរាយការណ៍អំពីដំណើរការ សេចក្ដីព្រាងសេចក្ដីណែនាំនេះ ដោយបានរៀបចំឡើងជាពីរជម្រើស ដាក់ជូនឯកឧត្តម នាយឧត្តមសេនីយ៍ អគ្គស្នងការនគរបាលជាតិ និងអង្គពិធីដើម្បីចូលរួមជាមតិយោបល់ផងដែរ។
ឯកឧត្តម នាយឧត្តមសេនីយ៍ ស ថេត បានគូសបញ្ជាក់ថា កន្លងទៅនេះរបៀបរបប នៃការធ្វើចំណាត់ការលិខិតស្នាម ឬឯកសាររដ្ឋបាលនានា ហាក់នៅមានចន្លោះប្រហោងដោយអន្លើរ ដូច្នេះហើយតាមរយៈសេចក្ដីព្រាងសេចក្ដីណែនាំនេះ នឹងក្លាយជាយន្ដការថ្មីមួយច្បាស់លាស់ និងរបៀបរបបទៅតាមឋាននុក្រម ក្នុងការចាត់ចែងលិខិតស្នាមនានា។ លើសពីនេះ សំដៅពង្រឹងដល់ប្រសិទ្ធភាព នៃការអនុវត្តតួនាទី ភារកិច្ចផងដែរ៕ រក្សាសិទ្ធដោយ ៖ សុទ្ធលី
![](https://cen.com.kh/wp-content/uploads/2024/06/633b9d6609181ed5b589c4cd5c209e2a-1024x564.jpeg)
![](https://cen.com.kh/wp-content/uploads/2024/06/038fb6f589dbddf2b60105b282ac9c20-1024x559.jpeg)
![](https://cen.com.kh/wp-content/uploads/2024/06/de2c74a64a7c2c46f01d98d4ef0fc501-1024x518.jpeg)
![](https://cen.com.kh/wp-content/uploads/2024/06/712c1459163682fa18cb2989956b72fa-1024x541.jpeg)
![](https://cen.com.kh/wp-content/uploads/2024/06/fd30ba49ec53f27909be5bad68c870a9-1024x554.jpeg)
![](https://cen.com.kh/wp-content/uploads/2024/06/ee4367787f4c4a688d7e9bd22f4df80c-1024x554.jpeg)
![](https://cen.com.kh/wp-content/uploads/2024/06/71b36df437b8c4e684007ebd8d8b7920-1024x554.jpeg)
![](https://cen.com.kh/wp-content/uploads/2024/06/11b14ea711d0a61523460b70d0e7ea3c-1024x481.jpeg)
![](https://cen.com.kh/wp-content/uploads/2024/06/20b25e95520228f90e6bbb92c287f1ea-1024x549.jpeg)
![](https://cen.com.kh/wp-content/uploads/2024/06/83420b60a2acdda041fdcdb7c5cede51-1024x554.jpeg)