ភ្នំពេញ៖ ការផ្តួចផ្តើមសាងសង់ផ្លូវចម្ងាយប្រមាណ៣០០ គីឡូម៉ែត្រ សម្រាប់ជិះកង់ និងរត់តាមឆ្នេរសមុទ្រពីកែប ទៅកោះកុងនេះត្រូវបានបង្ហាញជាសាធារណៈដំបូងដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងឱកាសពិធីសម្ពោធកំពង់ផែពហុគោលបំណងខេត្តកំពតដំណាក់កាលទីមួយ កាលពីដើមខែមិថុនានេះ។
សម្តេចធិបតី ហ៊ុន ម៉ាណែត បានបញ្ជាក់ថា នៅពេលដែលផ្លូវថ្មើរជើងសាងសង់រួចរាល់ ភ្ញៀវទេសចរជាតិ និងអន្តរជាតិ អាចជិះកង់ ឬរត់ម៉ារ៉ាតុងបានចម្ងាយ ២០០-៣០០គីឡូម៉ែត្រ តាមដងផ្លូវនេះ។
មន្រ្តីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា គម្រោងសាងសង់ផ្លូវចម្ងាយ ២០០-៣០០ គីឡូម៉ែត្រ សម្រាប់ជិះកង់ និងរត់តាមឆ្នេរសមុទ្រពីកែបទៅកោះកុងនេះ នឹងទាក់ទាញវិស័យអេកូទេសចរណ៍ ទេសចរណ៍ផ្សងព្រេង និងទេសចរណ៍កីឡាជាដើម។ ប៉ុន្តែការបើកដំណើរការការសាងសង់ផ្លូវថ្មើរជើង និងចំណុចផ្លូវពិតប្រាកដ នៅមិនទាន់ត្រូវបានមន្ត្រីបង្ហើបឱ្យដឹងនៅឡើយទេ។
ទាក់ទងនឹងការអភិវឌ្ឍន៍ភ្ជាប់ផ្លូវថ្មើរជើងនេះ គឺស្របតាមចក្ខុវិស័យបន្តរបស់រដ្ឋាភិបាល ក្នុងការប្រែក្លាយខេត្តកែប ទៅជាគោលដៅទេសចរណ៍សំខាន់ ក៏ដូចជាការអញ្ជើញភ្ញៀវទេសចរណ៍មកកាន់ខេត្តកោះកុងកាន់តែច្រើន។ ការអនុវត្តយុទ្ធសាស្ត្ររយៈពេលវែងនេះ កំពុងដាក់ឱ្យអនុវត្តន៍ ហើយរាជរដ្ឋាភិបាលកម្ពុជា បានដាក់ចេញនូវ “ផែនការមេអភិវឌ្ឍន៍ទេសចរណ៍ខេត្តកែប ២០២៣-២០៣៥” កាលពីឆ្នាំមុន។
នៅពេលដែលរាជរដ្ឋាភិបាលកម្ពុជាបានដាក់ចេញជាផ្លូវការនូវផែនការមេខេត្តកែបក្នុងខែសីហា តំណាងក្រសួងទេសចរណ៍ បានប្រកាសជាលើកដំបូងថា ផែនការនេះនឹងប្រើប្រាស់ “ការរួមបញ្ចូលគ្នានូវលក្ខណៈពិសេសរបស់ខេត្តដែលមានសម្បត្តិធម្មជាតិ វប្បធម៌ និងប្រវត្តិសាស្រ្ត ទន្ទឹមនឹងការប្រកាន់ខ្ជាប់នូវការអនុវត្តទេសចរណ៍ប្រកបដោយ ចីរភាព សុវត្ថិភាព និងប្រកបដោយការប្រកួតប្រជែង។
យុទ្ធសាស្ត្រសំខាន់ៗនៃផែនការនេះ ដែលត្រូវបានបញ្ជាក់រួមមានការបង្កើតកន្លែងទាក់ទាញថ្មីៗដូចជា ទីលានវាយកូនហ្គោល កំពុងផែទេសចរណ៍ និងកន្លែងកីឡា និងការកម្សាន្តផ្សេងៗទៀត រួមជាមួយនឹងការធ្វើឱ្យប្រសើរឡើងនូវសម្ភារៈបរិក្ខារដែលមានស្រាប់ ដូចជាសណ្ឋាគារ និងឆ្នេរសមុទ្រ និងផ្សព្វផ្សាយពីការធ្វើដំណើរបែបប្រណីត ព្រឹត្តិការណ៍អាជីវកម្ម និងកម្មវិធីអាពាហ៍ពិពាហ៍។ ជាពិសេស ផែនការមេនេះ ផ្តល់សារៈសំខាន់លើការតភ្ជាប់ផ្នែកភស្តុភារកម្មរវាងខេត្តកែប និងតំបន់ទេសចរណ៍ ដែលកំពុងរីកចម្រើនផ្សេងទៀត រួមទាំងខេត្តកោះកុងជាដើម៕