នេះជាខណៈពេលដ៏រន្ធត់មួយ ដែលក្មេងស្រីអាយុ ១០ ឆ្នាំ ម្នាក់រស់នៅភាគខាងជើងនៃប្រទេសចិន បានត្រូវជាប់ជើងនៅលើផ្លូវដើរកំពុងចលនា បន្ទាប់ពីនាងទើបឈានជើងឡើងជណ្តើរយន្ត ។
Sina News រាយការណ៍ឲ្យដឹងថា ហេតុការណ៍នេះបានកើតឡើងនៅផ្សារទំនើបមួយ នៅ Guyuan តំបន់ស្វយ័ត Ningxia Hui កាលពីថ្ងៃទី៩ ខែសីហា ។
តាមរយៈវីដេអូពីកាមេរ៉ាសន្តិសុខ ក្មេងស្រីម្នាក់ត្រូវបានឃើញដើរឆ្ពោះផ្លូវជណ្តើរយន្ត ជាមួយក្មេងស្រីតូចម្នាក់ទៀតរបស់នាង ។
ប៉ុន្តែ បន្ទាប់ទើបតែឈានជើងឡើង ស្រាប់តែកាំមួយនៃផ្លូវជណ្តើរយន្ត ដែលនាងឈរលើបានបាក់ស្រុត បណ្តាលឲ្យជើងស្តាំរបស់នាងត្រូវជាប់នៅលើឧបករណ៍បញ្ជូន (conveyor) តែម្តង ។
ភ្លាមៗនោះ ស្រ្តីម្នាក់ដែលកំពុងស្ថិតនៅលើផ្លូវជណ្តើរយន្តបញ្ច្រាស់ទិសគ្នាម្ខាងទៀត បានប្រញាប់ប្រញាល់រត់ទៅជួយសង្គ្រោះនាង និងស្វែងរកជំនួយពីអ្នកដទៃ ។
ប៉ុន្មានវិនាទីក្រោយមក បុរសម្នាក់ក៏រហ័សរហួនទៅចុចប៊ូតុង «emergency stop» ។
បន្ទាប់មកទៀត មនុស្ស ៣ នាក់ ផ្សេងទៀត ក៏ប្រញាប់ប្រញាល់រត់មកជួយក្មេងស្រីរងគ្រោះជាបន្តបន្ទាប់ និងនៅទីបំផុត ក្រុមពន្លត់អគ្គីភ័យក៏បានមកដល់ និងទាញជើងនាងចេញពីកន្លែងជាប់គាំងដោយសុវត្ថិភាព ។
យោងតាម The Paper ក្មេងស្រីរងគ្រោះបន្ទាប់មក ត្រូវបាននាំយកទៅកាន់មន្ទីរពេទ្យ ដើម្បីព្យាបាលរបួស ។
បច្ចុប្បន្ន មូលហេតុនៃហេតុការណ៍នេះ កំពុងស្ថិតក្រោមការស៊ើបអង្កេតបន្ថែម ៕ ចន្ទី (nextshark)
