ភ្នំពេញ ៖ នៅថ្ងៃទី១៦ ខែកក្កដា ឆ្នាំ២០២៤ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពីការគ្រប់គ្រងការបាត់បង់ទឹក ដែលរៀបចំឡើងនៅរដ្ឋាករទឹកស្វយ័តក្រុងភ្នំពេញ។ វគ្គបណ្តុះបណ្តាលនេះប្រព្រឹត្តិទៅនៅថ្ងៃទី១៦-១៧ និង២៣ ខែកក្កដា ឆ្នាំ២០២៤ និងមានគោលដៅពង្រឹងសមត្ថភាពរដ្ឋាករទឹកទាំង១១នៅទូទាំងប្រទេស ដើម្បីអនុវត្តការគ្រប់គ្រងការផ្គត់ផ្គង់ទឹកស្អាតប្រកបដោយប្រសិទ្ធភាព។
យុទ្ធសាស្ត្របញ្ចកោណដំណាក់កាលទី១ បានកំណត់ “ទឹក” ជាវិស័យអាទិភាពមួយក្នុងចំណោមវិស័យអាទិភាពទាំង៥គឺ៖ មនុស្ស ផ្លូវ ទឹក ភ្លើង និងបច្ចេកវិទ្យា។ ហើយគោលដៅអភិវឌ្ឍន៍ប្រកបដោយចីរភាពកម្ពុជាក៏បានកំណត់ថា “ត្រឹមឆ្នាំ២០៣០ សម្រេចនូវការទទួលបានសាកលកម្ម និងសមធម៌នូវទឹកបរិភោគដែលមានសុវត្ថិភាព និងថ្លៃសមរម្យសម្រាប់ប្រជាជនទាំងអស់។” ដើម្បីសម្រេចបាននូវយុទ្ធសាស្ត្រ និងគោលដៅខាងលើ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាននិងកំពុងខិតខំ ពង្រីកការផ្គត់ផ្គង់ទឹកស្អាតនៅទូទាំងប្រទេស ដោយប្រើប្រាស់នូវមធ្យោបាយ និងធនធានរបស់ជាតិ និងកិច្ចសហប្រតិបត្តិការជាមួយដៃគូអភិវឌ្ឍន៍នានា និងស្ថាប័នពាក់ព័ន្ធ រួមទាំងវិស័យឯកជនផងដែរ។
ឯកឧត្តម ហែម វណ្ណឌី បានបញ្ជាក់ថា៖ “វគ្គបណ្តុះបណ្តាលនេះគឺជាផ្នែកមួយនៃផែនការសកម្មភាពរបស់ក្រសួង ដើម្បីពង្រឹងតួនាទីជាយុទ្ធសាស្ត្ររបស់រដ្ឋក្នុងការគ្រប់គ្រង និងដឹកនាំវិស័យទឹកស្អាត តាមរយៈការពង្រឹងសមត្ថភាពរបស់រដ្ឋាករទឹក។ ការគ្រប់គ្រងការបាត់បង់ទឹកប្រកបដោយប្រសិទ្ធភាព គឺជាកាតាលីករមួយក្នុងការចូលរួមអនុវត្តលក្ខខណ្ឌ “ថ្លៃសមរម្យ” នៃគោលការណ៍មូលដ្ឋានទាំង៤ នៃការផ្តល់សេវាផ្គត់ផ្គង់ទឹកស្អាត គឺគុណភាព សុវត្ថិភាព និរន្តរភាព និងថ្លៃសមរម្យ។”
នេះជាវគ្គបណ្តុះបណ្តាលលើកទី១ ហើយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍គ្រោងរៀបចំវគ្គបណ្តុះបណ្តាលផ្សេងៗទៀតនាពេលខាងមុខ សម្រាប់រដ្ឋាករទឹកសាធារណៈ ព្រមទាំងប្រតិបត្តិករទឹកស្អាតឯកជននៅទូទាំងប្រទេស និងសមាគមអ្នកផ្គត់ផ្គង់ទឹកស្អាតកម្ពុជា។
រ
តាមរយៈកម្មវិធីបណ្តុះបណ្តាលនេះ មន្ត្រីទទួលបន្ទុក និងរដ្ឋាករទឹកទាំងអស់នឹងទទួលបានការយល់ដឹងអំពីការគ្រប់គ្រងការបាត់បង់ទឹក ចែករំលែកបទពិសោធន៍ និងផ្តល់មតិយោបល់សម្រាប់ក្រសួងធ្វើជាមូលដ្ឋានក្នុងការរៀបចំបទដ្ឋានគតិយុត្ត ស្តីពីការគ្រប់គ្រងការបាត់បង់ទឹក សម្រាប់ជាគោលការណ៍រួមដាក់ឱ្យ អនុវត្តនៅទូទាំងប្រទេស។
សេវាផុ្គត់ផ្គង់ទឹកស្អាតមានសារៈសំខាន់មិនត្រឹមតែសម្រាប់តម្រូវការប្រចាំថ្ងៃប៉ុណ្ណោះទេ តែក៏សម្រាប់ការលើកកម្ពស់សុខភាពសាធារណៈ និងជំរុញការអភិវឌ្ឍវិស័យសេដ្ឋកិច្ចផ្សេងៗ ដូចជា ឧស្សាហកម្ម កសិកម្ម ទេសចរណ៍ និងសហគ្រាសធុនតូច និងមធ្យមផងដែរ៕ រក្សាសិទ្ធដោយ ៖ សុទ្ធលី
